Abrelatas - Presentación Llibru - Menú Les Fartures

Señes: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Comentarios: Hai díes qu'enxamás voi escaecer y que van pasar a la hestoria (personal y de Les Fartures), y ésti foi ún d'ellos. Por cuenta la presentación del llibru de "Les Fartures, ónde comer bien n'Asturies", Borja Alcazar propúnxome faer daqué orixinal y preparar un menú esclusivu nel que fuera incluyíu'l llibru.

Abrelatas ye ún de los nuesos sitios favoritos, pela so filosofía, pela so ilusión, pel so llabor recuperando y calteniendo sabores tradicionales, pela so capacidá p'afaelos a los nuevos tiempos; y amás, pelo bien que se come y bebe; y de xacíu, pela amistá que mos xune. Asina que punximos manes a la obra y xunimos llibros y gastronomía con Les Fartures como nexu d'unión.

Llocal llenu, n'una única mesa para comer ente amigos -conocíos y nuevos por conocer-, ambiente relaxáu, munches rises, munches esperiencies compartíes, unes cuantes botelles de vinu y, sobremanera, muches fartures.

Empezamos con una Anchoa Artesana de Ballota con Quesu del Duernu de Sariegu, mermelada de Pimientos del Piquillo y Vinagreta. Fascinante combinación.

Manines de Gochu Guisaes y Gamba Colorada a la Gabardina. L'adautación del pinchu finalista nel concursu de Pinchos d'Asturies 2018. Otra combinación xenial que maravió a la xente.

Bombón de Carrillera de Gochu Asturcelta al Porto. L'adautación del pinchu finalista nel Concursu de Pinchos d'Asturies 2017. Fascinante. Nunca voi cansar de comelo.

Nugget de Pitu Caleya con Mueyu de Mostaza llixera. Ún de los platos más conocíos del llocal. Un bocáu con sabor intenso qu'amiesta a la perfección cola mostaza. Tenéis que probalo.

Y la última sorpresa de la nueche, Salvador del Obispu, Cabrales "El Teyedu" y Mazana Asturiana. Adautación asturiana fecha pol cocineru y amigu David Montes del famosu platu entamáu por Olivier Roellinger, chef de Cancale.

Una especie de tosta fina de mazana, con amiestu de Teyedu con Salvador del Obispu. Dos de los meyores productos ellaboraos n'Asturies entemecíos pa crear un postre únicu. Espectacular.

Y la esplicación del tandem Alcázar-Montes ... memorable.

Pa beber, La Fanfarria de Nicolás Marcos, como siempres relación calidá-preciu bien bona.

Y acabamos con GinKiber, la xinebra d'Asturies, qu'amás cuntamos cola presencia de Sergio Carpio, el so ellaborador.

Menú + Bebida + Llibru por 30€. Un día emocionante, inolvidable, pol que voi tar eternamente agradecíu al Abrelatas.

Pd: Les semeyes de los platos son de Samu de Ntqdes TV, qu'amás acompañáronmos y fixéron esti vídeu tan prestosu.