El Curro

Direición: La Peruyal, 12 - Blimea

Teléfonu: 985 671 594

Facebook: https://www.facebook.com/ParrillabarElCurro/

Calidá: 3/5

Preciu: 25€

Comentarios: Siempres que podemos averamos a la Fiesta de les Cebolles Rellenes de Samartin, y teníamos gana de probar al ganador de les dos últimes ediciones: El Curro. Anguaño por problemes d'organización nun se celebró'l concursu, pero tamos seguros que volveríen tar nos primeres puestos dempués de probales. Inda rellambemos.

La Parrilla El Curro ta na Peruyal, un pueblu xubiendo por Blimea dende'l que puedes ver tol valle. Pel branu tien que ser una gociada xubir hasta ellí enriba, y tomar unos culetes. Tien un prao grande y unos xingadorios por que los crios puedan xugar, y un chamizu pa faer Corderu a la Estaca, qu'hai que probar sí o sí.

Como nós fuimos de nueche, y yá faía fríu, entramos dientro del local y tomamos Sidra Arbesú pa dir caleciendo. El local tien una pimpana chimenea que lo preside tou, al lláu d'una parrilla. La decoración colos puzzles na paré ye digna de ver. Indescribible.

El Menú de 25€ consistía en Cebolles Rellenes de primeru, callos o cabritu de segundu y bartolos de postre. Como nos sentamos 8 a cenar, probemos toos un pocu de too. Pidimos 7 menúes.

Empecemos polo importante: Les Cebolles. Taben espectaculares. Ensin dulda, les meyores que probé nunca, y mira que probé. Suaves, con bon rellenu y con un mueyu pa moyar pan hasta'l fin de nuesos díes.

Los Callos taben bien ricos. Anque baxaron un pocu'l nivel. Pero ricos, ¿eh? Lo que pasa que dempués de les cebolles ... El picante xustu, non mui gordos y con otru mueyu espectacular.

Y volvimos retomar el nivelazu col Cabritu con Patatinos. Terrible. Tienru, con un mueyu pa rellambese (nun sé les vegaes que tuvieron que reponer el pan), con patatinos de verdá y unos pimientos.

De postre, daqué típicu de Llaviana: Bartolos. Son unos pasteles con base d'hoxaldre y almendra. (Nun confundir colos Carbayones, qu'estos tienen una capa de yema y azucar y resulten más empalagosos). Punxéronnos unos cuantos, que namás probemos porque tábamos a puntu d'españar.

Eso sí, preparenmos nuna bolsa y a otru día almorzando dimos bona cuenta d'ellos.

Pa beber, siguimos con sidra y Alcorta Crianza 2012, una crianza tempranillo que cumplió'l so oxetivu. Anque hai ausencia de vinu asturiano na carta.

En total pagamos 175€ ente les 8 persones. Comida casera estupenda con unes vistes increíbles. Parrilla, sidra y corderu a la estaca pa probar. Bon descubrimientu.