Abrelatas - Music&Food 2.0

Señes: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Calidá: 4/5

Preciu: 30€

Comentarios: Vienres de nueche, lluces baxes y de colores (lo meyor pa la fotografía, asina que perdonái peles semeyes), una DJ, un menú zarráu y l'Abrelatas llenu. Esperiencia bien recomendable la de cenar con música presidiendo'l llocal. De normal la música siempres ye l'acompañante no fonderu, unes vegaes más acertada qu'otres, pero nel Music&Food adquier casi nivel de platu principal pa presidir tola cena.

Arantxa Nieto, al mandu de los platos, foi tresportandomos dende soníos más atmosféricos hasta'l heavy más cañero, siempres acorde cola intensidá de los platos yá'l ritmu que marcaben les nueses cabeces mientres comíamos. Y siempres col rock como nexu d'unión. Xenial esbilla musical d'una de les estrelles de la tele asturiana más prestoses que tenemos.

El rock entiende a la perfección la cocina de Borja Alcázar, anque tengo la sensación que maridaría con cualesquier tipu de música d'acompañante. Hai tanto talentu ya imaxinación que podría afaese a lo que-y pidieres. Nesta ocasión presentónos un menú gayoleru, informal, con un puntu atrevíu pero ensin salise de madre. Digamos qu'Arantxa ponía la guitarra rítmica, y Borja marcaba los punteos de guitarra.

Empezamos col so famosu Bombón de Carrillera de Gochu Asturcela guisada al Porto. Nun puede faltar. Dos bocaos de pura esplosión y contrastes de sabores y testures na boca. Sospriende enforma la primer vegada que lu pruebes, y una vegada probáu ... namás tas deseyando que sobeo dalgún pa pidir más y más.

Ensalada de Llagosta y Mayonesa Cítrica. Bien rica. Contrastes y testures. L'únicu pero ye que la llagosta nun yera del Cantábricu (invidable col preciu que tenía'l menú)

Llagostinos a la Crema de Mantequilla con Cruxentes de Xamón Reserva. Brutal el toque de mantequilla col llangostin. Va xenial esi toque llácticu al lagostín. Elegante.

Pataques Rellenes Braviolis. A priori, el platu más senciellu, pero buenísimo. Un platu que nun empalaga, frescu y del que podríes tar comiendo ensin parar.

Tataki de Bonitu del Norte con Vinagreta de Sidra. Bonitu perfectu, y con esa vinagreta ... buenísmo.

Llombu de Xata Asturiana IGP con boletus y Piñones. El llombu bien bonu, bona ración amás. Pero'l mueyu de boletus colos piñones foi espectacular. Tuvimos que pidir más pan. Pa recordar.

Refrescu de Llingua de Regaliza. Esta ye una de les creaciones de Borja que dexen a ún cola boca abierta. Refrescu fechu a base de regaliza, que te tresporta a la to infancia, y al empar apurre un toque acedu perfectu pa llimpiar la boca xustu antes del postre. Podría bebese ensin parar.

Mazana Xelada Merengada. Buenísimo, El toque duce, casi asáu de la mazana, col xeláu queda perfectu.

Pa beber, La Fanfarria de Dominiu del Urogallo. El xoven de la bodega qu'entra solo. Tien una rcp bárbara y ta bien bonu.

Tou esto, por 30€ nuna nueche de vienres y de sábadu. Esperiencies distintes, dende Bowie hasta los Maiden (grande Arantxa), conversaciones a ritmu de lluces de colores y un menú con muncho rock'n'roll.