Farturruta Tabayón Xurbeo - Ca'l Xabú

Señes: Cuergo - Aller/Ayer
Teléfonu:  985 487 331


Aconseyamos: Menú Asturianu


Web: http://calxabu.es/
Facebook: https://www.facebook.com/CalXabu/


Calidá: 4/5
Preciu: 20€


Comentarios: Xabú en llingua castellana ye Saúco. Un parrotal bien frecuente n'Asturies y tamién pela zona d'Ayer. Como menta'l maestru Jose antonio Fidalgo,

"Aquí se recomienda tomar la infusión de flores de saúco para estimular la sudoración en procesos catarrales y gripales; utilizarla en gargarismos para casos de amigdalitis; como enjuague para lavado de heridas , de ojos y de úlceras o aftas en la boca…Vean esta otra fórmula de aplicación en situaciones de dolores de vientre, “retorcijones de barriga”, diarreas “acuosas” tan típicas del verano… Síganla al pie de la letra, que su eficacia está comprobada.En la noche de San Juan recojan una flor grande de saúco, tres nueces “en leche con muergu y tou” y dos o tres ramitas, con sus flores, de hierba luisa. Dejen todo al sereno para que lo bendiga el santo y por la mañana del día 24 lo depositan en una jarra con un litro de aguardiente, una rama de canela y un poco de azúcar. Déjenlo macerar durante nueve lunas, sacándolo cada noche al sereno y por el día evitando que le de el sol; filtren y consérvenlo en botella bien cerrada.
La dosis recomendada en casos de consumo necesario es de dos copitas, una por la mañana y otra por la noche. Y si la afección es muy aguda…. ¡repítase la dosis!"

Salimos del pueblu de Murias, un pueblu preciosu pa perdese (y onde tienes una interesada ufierta gastronómica en forma d'arroces mediterráneos que va haber que probar), llenu de cases iguaes, horros, fontes, llavaderos, ilesia y capiya. Inclusive tienen un hotel rural.


Na Ilesia de Santa María de Murias atópase'l tixu (texu) milenariu, árbol máxicu de los antiguos ástures al qu'anguaño siguimos venerando. Ta un pocu chuchurríu, pero tán intentando recuperar la so rellumanza. Zona de pelegrinos y antiguos templarios, atoparon inclusive cruces templaries na zona.


Dende Murias puedes faer un montón de rutes, pero la más conocida y la más fácil ye la Cascada del Xurbeo. 1 km d'ida y 1 km de vuelta nuna sienda perfectamente señalizada y algamadiza pa tola familia.


Siguiendo'l cursu del Ríu Nigru (nome por cuenta les piedres d'esi color que lu formen, non pol pasáu mineru de la zona), y ente montes de fayes, ablaneros, castañales, arándanos y miruendanos llegamos al saltu d'agua.


Impresionante tabayón que baxa con más o menos agua en función de la dómina l'añu. Como veis, cuando fuimos, taba formosu. Tien una ponte de madera dende'l que puede contemplase perfeutamente.


Si siguís la sienda, un pocu más allá, llegáis a una zona onde inclusive podéis bañavos, y podíes contemplar perfectamente les piedres negres a les que debe'l so nome'l ríu.


A la vuelta, fuimos hasta Ca'l Xabú. Hai opciones más cerca, pero Ca'l Xabú encántanos, asina que paguen la pena los 20 minutos nel coche. Ye una antigua casona iguada, con edificiu amiesto que cunta con un Albergue rural. Mui cerca de Felechosa y de les estaciones de sky, pel hibiernu siempres ta llenu y pel branu, casi siempres.


Tien dos salones perfeutamente estremaos. Zona de Llar, que ye la más guapa, y la primera qu'enllenen (asina que pídila cuando acutes) yá'l salón del edificiu nuevu. La zona del llar ye espectacular, namás pol sitiu yá paga la pena comer ellí. Hestoria viva d'Asturies, enllena d'instrumentos antiguos y que Margot Castañón esplica perfeutamente pa qué valen.


Margot ye l'alma del local, y Jaime el dueñu la cocina. El mio encamientu ye que pidáis el Menú Asturianu y que caún na mesa pida daqué distintu pa que probéis lo máximo posible, porque ta tou buenísimo.


El menú asturianu son 4 primeros, 4 segundos, postre y bébora. Tou por 20€. Extremendamente baratu y d'una calidá esceicional.


Comimos 5 persones y pidimos, Pote de Castañes, maraviyosu. Típicu de les zones interiores d'Asturies, sobremanera de la zona central, onde utilizaben l'abondosa castaña mayuca pa sustituyir la faba en dómines d'entreseca, ya inclusive, antes d'introducise la faba n'Asturies. Tien un importante toque duce, pero ésti estrémase d'otros que probé nel contraste col toque picante qu'ufierta la morciella del compangu.


N'Ayer el compangu siempres tien un toque picante que me presta a esgaya, bien característicu y más potenciáu que n'otros sitios.


Arroz con Pitu. Equí nótase la escuela en casa Marcial de Jaime. Esceicional. Arroz perfeuto, melgueru, pitu caleya con sabor intenso. De los meyores que probé nunca.


Menestra de Verduras con Chamucu. Chamucu ye la zona de la zanca la vaca. Bonísima.


Cocíu del día. Nesti casu fueron unos Garbanzos con Boletus y Calabaza. Otra auténtica maravía.


De segundos, Cabritu Guisáu. Perfeutu. Acompangáu de patatines.


Repollu Relleno de Bacaláu y Cogordes. Otra combinación maraviyosa.


Y Cebolla Rellena de Carne Guisao. Bien bona, anque prefiero la versión de la otra cuenca minera rellena de bonitu. Pero ta bien bona, eh?


Los postres, toos caseros. Empezamos col típicu de la zona, Panchón. Pan d'escanda (cebera típica asturianu) cocíu mientres tola nueche envolubráu en fueyes de verdura. Preséntense les migues con mantega y azucre, faciendo un postre contundente y de sabor duce. Si nun lo probasti nunca ...


Frixuelu, pidímoslu solo (ensin nata) pa probalo. Bien bonu.


Arroz con Lleche. Bien bonu.


Yogur con Compota Casera. Bien bonu.


Acabamos con Café de Pota. Y un pocu d'aguardiente.


Tou por 20€. Repito, 20€. Esceicional. Pa beber, Sidra Trabanco.


El pan ye caseru d'escanda.


Al salir, paséu pa baxalo hasta Santibanez de la Fonte, otru kilómetru de paséu per una sienda, hasta un texu preciosu al lláu de la Ilesia de San Xuán. Un sitiu máxicu.


Dende ende, otros 500m de xubida hasta'l Mirador de la Pandieḷḷa, vistes impresionantes.

0 comentarios :

Publicar un comentario