Twitter: [@sidra_seleccion] https://twitter.com/sidra_seleccion
Instagram: [@sidraseleccion] http://www.instagram.com/sidraseleccion
Comentarios: Yá vos falamos dalguna vegada de la marca Sidra de Selección, marca de calidá con sidra 100% asturiana formada polos Llagares Trabanco, Muñiz, Foncueva y Peñón. Esta marca privada fundose nel añu 2000, y de magar, amás de sidra natural, vienen ufiertando la so propia sidra 100% asturiana, pero amás con unos controles de calidá extra que garanticen que sía una sidra de primera.
Por cuenta la presentación del cambéu del so nome a Sidra d'Escoyeta (al nuesu entender muncho más acertáu), entamaron unes xornaes de formación pa medios de comunicación alredor de la so marca y del mundu de la sidra polo xeneral.
Axuntamos en Sariegu, nel Llagar Foncueva. onde Gloria Fernández, responsable de comunicación y marketing de la marca, presentónos el plan a siguir. Tres la intervención de Cele Foncueva, dándonos la bienvenida a les sos instalaciones, empezamos cola sesión teórica.
Empezamos cola intervención de Jorge García, direutor téunicu de Producción Vexetal de Campoastur, que nos faló de la parte correspondiente al cultivu y recueya de la mazana asturiana. Falónos que puede ellaborase Sidra d'Escoyeta a partir de 23 variedaes de mazana (les mesmes que la DOP más Peau de Chien), pero qu'en curtiu van ampliar a munches más. El SERIDA tien estudiaes más de 500 variedaes de mazana de sidra autóctono asturiano, pero envalórase (o yá se sabe casi con certidume) qu'hai más de 2000.
Les variedaes futures que se van almitir busquen sobremanera, los amargos, yá que ye daqué prácticamente escaecíu na sidra actual asturiana ya inténtase recuperar. Y siempres fomentando'l cultivu sostenible y respetuoso col mediu ambiente. Amás de la gran riqueza de la mazana asturiana, que fai que la nuesa sidra sía única'l mundu, otra traza diferenciador ye la recueya, que nun 99% faise de forma manual. Lo qu'a priori, paez un handicap, por cuenta la dificultá de la mecanización na orografía asturiana y la falta de llatifundios, supon una garantía extra del cuidu de la mazana y que ésta llegue en perfeutes condiciones al llagar.
Jose Manuel Riestra, Xerente de Sidra Muníz y Presidente de Sidra d'Escoyeta, falónos de la importancia la so marca, del cambéu de nome (que van presentar en sociedá más palantre) y aprofió la importancia de la formación na sidra pa valorar más el productu.
Roberto Menéndez, auditor xefe de Bureau Veritas Certificación, foi l'encargáu de cuntanos tol procesu de certificación que garantiza que la mazana que se recueye tea dientro les variedaes recoyíes y que la sidra que se vienda cola etiqueta Sidra d'Escoyeta sía 100% asturiana y pueda demostrar la trazabilidá dende la mazana inicial hasta'l productu final.
Un procesu ensin dulda complexu, que nos resumió, que contempla dende l'auditoría de CampoAstur (provisor de mazana pa la ellaboración de Sidra d'Escoyeta) fasta'l control de los llagares y los toneles (y los sos trasiegos) destinaos a esta sidra.
Lluis Nel Estrada, siempres lluchando por caltener la cultura asturiana, falónos del entamu de l'Asociación de Llagareros (non solo los d'Escoyeta) y l'Asociación d'Escanciadores d'Asturies pa intentar dignificar l'oficiu del Escanciador n'Asturies. El primer puntu ensin dulda, pasa pola reconocencia a una figura que tiende a ser despreciada y que forma parte del fechu diferenciador que nos fai únicos nel mundu.
A partir d'ehí, la creación d'un Certificáu qu'acredite laboralmente la figura del Escanciador, con distintes categoríes como Aprendiz, Escanciador y Maestru Escanciador; pa garantizar la reconocencia y profesionalización del sector. Esti procesu, rique la intervención del parllamentu asturianu y del parllamentu español, polo que va tener que ser al mediu plazu. Pero ye una primer piedra pa consiguilo.
Un oficiu demandáu, y que con esta certificación, ensin dulda, va ameyorar les sos condiciones llaborales y va faese más atractiva.
Sabino Pérez, maestru escanciador de Tierra Ástur, enseñónos cómo echar correchamente un culete sidra. La manera oficial, pero ensin que la estética pierda de vista l'oxetivu principal, y ye que la sidra ruempa nel cantu'l vasu. Enseñónos cómo cortar la sidra, cómo'l llombu xuega un papel fundamental cuando tas 10h diaries echando sidra, y falónos que, amás d'echar sidra, les sos funciones como maestru escanciador son les de garantizar que la sidra calténgase y llegue en perfectes condiciones al veceru.
Y de xacíu, pudimos practicalo nós mesmos, eso sí, con botelles de sidra ... llenes d'agua.
La última intervención correspondió a Maximino Villarrica, prebador y presidente de la Mesa de Cata de Sidra d'Escoyeta. Realicen delles cates al añu pa dar de pasu los llotes de los 4 llagares que van salir al mercao como Sidra d'Escoyeta. Pa ello, la nota media ha de superar un @. Más qu'afitase nel sabor de la sidra, o que tea nel so puntu óptimo de consumu (pueden pasar unos meses hasta qu'esa sidra sala al mercáu), la mesa de preba ha de puntuar en función les propiedaes de la sidra y l'ausencia de defectos na mesma.
Acabamos con una espicha nel llagar, probando la sidra nuevo d'anguaño. Sidra que, sicasí, inda ta tienra, y que sosprendió enforma a les persones que nun tán acostumaes a probar les distintes fases que tien la sidra.
Como veis, una xornada per completa. Deprendiendo un montón de les persones que día ente día tán lluchando pola meyora del sector de la sidra, tresmitiéndonos que ye un sector vivu, que sigue evolucionando y alloñando esa imaxe de sector anquilosáu que munchos paecen intentar espublizar. Tán faciéndose les coses bien, tán intentándose ameyorar los fallos y tan abriendo la mente pa faer de la sidra un gran motor económicu n'Asturies.
No hay comentarios
Publicar un comentario