Salón del Vinu DOP Rías Baixas

Dicíanos Ramón Huidobro, director xeneral de la DOP Rías Baixas, que l'oxetivu principal d'una DOP ye la recuperación yá'l desenvolvimientu de les zones rurales ufiertando un productu de calidá diferenciador de cada zona xeográfica.
LA DOP Rías Baixas ufiertónos una comida de trabayu a medios de comunicación asturianos, xusto antes de celebrar el so Salón del Vinu DOP Rías Baixas pa profesionales y hosteleros. A la comida, amás de Ramón Huidobro, allegó'l Presidente de la DOP Juán Gil, la directora de marketing Eva Mínguez, l'enólogu Fernando Vilariño y la directora de comunicación Loreto Vázquez.

Mientres un par d'hores, pudimos preguntar, intercambiar paeceres y falar sobre la situación xeneral del vinu, de la sidra y, sobremanera, de l'albariño. Una DOP que costó arrincar, con muncho productor caseru y amiestu d'uves "más granibles", pero que col llabor de los primeros bodegueros y, tamién científicos asturianos como María del Carmen Rodríguez Martínez, que depuraron y llantaron les viñes de meyor calidá tres años d'investigación, consiguieron ún de los meyores vinos blancos del mundu.

Anguaño la DOP Rías Baixas tien una presencia enorme n'Asturies, pudiendo atopar un albariñu en casi cualesquier restorán asturianu. Y supon un estímulu, una referencia y un camín a siguir, la defensa, el ciñu y la llucha que fai'l consumidor gallegu pol productu de la so tierra. Un gallegu consume agua gallego y vinu gallego, daqué que nun faemos los asturianos. Ello ye que ye muncho más fácil consumir vinu albariñu n'Asturies que vinu asturianu.

Tres la comida, celebróse'l Salón del Vinu DOP Rías Baixas. cola presencia de 24 bodegues y 91 vinos nun céntricu hotel de Xixón. Un salón destináu a profesionales y prensa onde pudimos probar albariños conocíos, desconocíos, bodegues grandes, pequenes; y pequenes xoyes desconocíes en forma d'albariñu brut nature o albariñu tintu.

Como veis, los "grandes" vienen, visítennos, arremangense y esplíquennos qué faen y por qué la so botella de vinu cuesta'l preciu que cuesta. Espero que nos sirva d'exemplu y camín a siguir.