Los Llaureles - Menú Alcohólicu

Direición: Camino de Miyangues, 2 - Torazu - Cabranes

Teléfonu: 629 769 059

Recomendaciones: Acuta Menú Degustación + Habitación, reláxate y date un homenaxe.

Web: http://www.losllaureles.com/
Facebook: https://es-la.facebook.com/LosLlaureles
Twitter [@losllaureles]: https://twitter.com/losllaureles
Instagram [@losllaureles]: https://www.instagram.com/losllaureles/

Calidá: 5/5
Preciu: 49€

Anterior Visita: http://www.lesfartures.com/2016/04/los-llaureles.html

Comentarios:  Yá conocéis la nuesa pasión por Los Llaureles, amás de tener la redolada perfeuta pa relaxase y perdese, amás de tener una preciosidá d'hotel rural, tienen una magnífica cocina a un preciu más que baratu. Asina qu'en cuanto podemos, siempres averamos a conocer les sos nueves propuestes.

Esta vegada la escusa, foi la presentación del so nuevu Menú Alcohólicu que realiza Carlos Gallego (copropietariu y cocineru de Los Llaureles) xuntu con Kike Rojo, propietariu del Soda 917. Dos talentos, amigos, que xunen les sos pasiones pa la creación d'un menú únicu que vas poder tastiar namás en Los Llaureles hasta'l 14 de Mayu.

Un día espectacular, con maraviyosa compañía. Y Carlos y Kike a los mandos.

Empezamos con un clásicu, un Aperol Spritz. Llicor aperitivu perfeutu pa tomar na terraza. Con vinu blanco secu y agua con gas. Nidiu, amargosu, mui ricu.

Yá sentaos na mesa, los 3 aperitivos correspondientes colos que combinamos el cóctel. Soda 917 en 3 Bocaos. Bola de Nieve, con tequila y llicor de cacáu y chocolate. Bjørndalen, fresa rellena de llicor de fresa y Campari, el meyor de los trés. Espectacular. Soda 917, amiestu en xelatina de Xinebra, Vodca y Campari. Pa tomar d'esquierda a derecha, de menos a más amargosu.

Camudamos a un French 75, cóctel frescu de xampán y xinebra.

Salín-Dulce-Acedu, Crema d'Aguacate, Toque acedu de Yogur, Cacáu, Virigüetos, Mangu, Menta, Moxones ... brutal combinación que foi una de les favorites del menú. Equilibrio perfeutu llenu de contrastes.

Un platu brutal.

Compartimos llicor tamién col Tueta-non??, una cañamina como platu pa una combinación de Tataki d'Atún Coloráu como base, Tiez d'Azucre, Güeves, Sandía y Romescu. Otru maraviyosu amiestu, comiendola del güesu. Per ricu. Per orixinal el tataki combináu col azucre.

El siguiente llicor foi'l más potente de toos, Mezcal Montelobos, 43% pa tomar suerbu a suerbu col siguiente platu. Ensin dulda una combinación venturera, pero que funcionó como perbien.

El platu foi un Harmonizando Afumaos, una Crema de Gamonéu, rebaxada con Chocolate Blanco con Tierra d'Almendra y Ablana Turrada, acompañáu de Sardina Afumada. Xuntu cola crema d'aguacate, el favoritu la mesa. Espectacular. Y col Mezcal ... esplosiva combinación.

Gin Couler, Xinebra, Xenxibre y Llimón. Perricu.

Ceviche Templáu con Concentráu de Pitu, un conceutu de ceviche (nun ye un ceviche al usu) de Salmón y Merluza. Lleva un zusmiu templáu de pitu, bien ricu. Y amestáu con Galanga, Xenxibre, Tomillu y Almendra Turrada. Platu con un toque picante, pero mui frescu. Xenial pa entemecer cola cuyar. Y con l'amargo del Gin, va xenial.

Amer Picón, un "aperitivu" amargu con un toque de naranxa, casi en desusu. Color escuro.

Y lo comimos con La Croqueta. Otra xenialidá, que produció alderiques na mesa. Una croqueta de Sobrasada, con Chocolate y Corteza Gochu. Pa tomar en 2 taragaños. Y piensu que sería meyor n'ún, porque la combinación de too na boca ...

... ye brutal.

Vodca Hibiskus, amestáu con naranxa pa da-y un toque neutru a tanto amargosu. Per bonu.

Tomámoslo con un Pork Ástur-Thai. Un bao con Tacos de Panceta Ibérica, cocináu 3h y desgrasáu. Lleva un toque d'Ayu y Crema con Curry. Buenísimo.

El segundu platu pa esti llicor ye un Corte de Mi-Cuit, galleta marinera (típica en Galicia o Portugal) con Foie de Coríu y Crema de Xixona. Foi la combinación que menos trunfó de la comida, anque taba bien rica, eh?

Empezamos colos postres, una combinación de platu y cóctel pa tomar cola cuyar. Mulata a Cuyaraes. Base de Crema de Calabaza, Escarcha de Ron Capitán Morgan de 15 años, Cacáu, Pipes de Calabaza.

Va faciéndose llíquidu y ye una maravía fundir la cuyar fasta'l fondu y notar el cruxente. Buenísimo.

Ron Punta Cana. Ron Capitán Morgan de 15 años, con Cacáu y Chocolate. Xenial.

Yá'l caberu postre, Chocolate a Fondu. Tierra de Pan de Centenu con Cacáu, Coliflor, Tacos de Pera y Xeláu de Mantecáu. Otra combinación per bona.

A mentar tamién los panes, que volaron y tuvimos que tripitir. De dos tipos:  Pan artesano fechu con vermú; y Pan artesanu con Güisqui, maíz y pipes. Impresionantes.

Como veis, menú per completu (y alcohólicu). Lo meyor ye salir dempués a tomar el café a la terraza y relaxase. El menú ye ventureru, pero funciona como perbien. Hai platos que destaquen más, pero'l nivel ye mui alto, y claro, la redolada y la tranquilidá favorecen a que tou sía prácticamente perfeutu ... Siguimos adorando Los Llaureles.  Yo que tu non me lo perdía, tienes hasta'l 14 de Mayu.