Facebook: https://www.facebook.com/montenarancoobrador/
Conocí a José Antonio Darriba Rico nuna cata d'aguardientes de sidra y volvimos coincidir faciendo xuntos un maridaxe de sus turrones y bombones de sidra con Sidra pa la revista La Sidra.
Ablucome la so cenciellez, la so pasión pola artesanía del procesu, el so romanticismu pel mundu de los postres y les sos conocencies técniques. Asina que nel intre punximos en contactu pa dir conocer un pocu más de cerca cómo trabaya día a día.
Asitiáu en Cayés (Llanera), en plenu centru d'Asturies, Obrador Monte Naranco lleva dende 2007 apurriendo felicidá a los asturianos al traviés del chocolate. Pudimos comprobar nes hores que tuvimos ellí, mientres el trasiegu de veceros entrando a realizar compres a la so pequena tienda ye continuu.
Ellí tou afalagase, dende l'entamu del procesu pa faer el chocolate hasta'l empaquetao de la tableta turrón, y eso nótase nel productu. Sabores llenos de matices cola meyor de les calidaes que solamente busquen el preste de quien los consume.
Antón fundó'l so propiu Obrador dempués de trabayar más de 15 años en Peñalba, asina que poles sos venes namás cuerre chocolate. Dempués d'esta esperiencia -y amás del par de quilos que traximos de regalu en probando turrones, polvorones y bombones-, nun podemos dexar d'encamentar los sos productos de cara a les fiestes navidiegues (y el restu del añu). va maraviavos.
Quiciabes ún de los sos productos más famosos sían los Bombones de Sidra, que tuvo que patentar debíu al ésitu que tienen. Esplicónos el procesu de fabricación, y solo pol trabayu que lleva cada bombón, la caxa val cada euru que cuesta (y amás tienen un preciu bien algamadizu).
Un bombón que sabe a sidra de verdá, qu'hasta tien un restallón na boca qu'entemez perfectamente cola suavidá del rellenu del bombón. Un lluxazu que desfai na boca.
Perfeutos pa rematar una comida, pa regalar o como detalle nun restorán. Ello ye que comentamos qu'una gran idea sería introducilos nos restoranes pa rematar les comíes, yá qu'agora cada vez se tomen menos clines po rmor del coche (y tamién hai que dicilo, a la mala calidá d'aguardientes qu'ufierten nos restoranes en Asturies).
Amás, pudimos probar los sos turrones, y perdimos ente tanta variedá, a cada cual meyor ... Turrón de Guirlache, Turrón de Rajalmendra, Turrón de Pistachu (una de les estrelles d'estes navidaes, según esplicónos Antón, fecha con pasta de pistachu), los yá conocíos por nós Turrón de Trufa con Aguardiente de Sidra (y non con cualquier aguardiente, con Aguardiente Viejo de Salvador del Obispo) y Turrón de Mazapán de Sidra con Dulce de Mazana ... son solo una pequena amuesa de tolos turrones que fai.
Amás, Polvorones d'Almendra y Polvorones d'Ablana; Glories, pero feches artesanalmente, con una oblea de base rellenos de mazapán con crema. Y cualquier cosa que se vos ocurra, Antón va facela.
Asina ye que nestes feches nun dan a bastu de trabayu porque munches confiteríes contraten los sos servicios pa reforzar la so ufierta.
Ún de los nuesos productos favoritos fueron les Tortes, un turrón fechu de Galleta d'Almendra relleno de Trufa y Bañáu en Chocolate. Impresionante.
Supongo que conocéis los famosos Bombones de Cabrales de Jose Antonio Campoviejo, colos qu'empieza los sos menús n'El Corral del Indianu. Bien, pos comercializaronse anguaño, y l'obrador encargáu de facelos ye Antón. Otra amuesa más de que los meyores namás confíen nos meyores. Y tamién comercializa los Bombones de Sabadiegu, Per orixinales.
Y yá cuando díbamos, con cargamentu p'allucinar a la familia y amigos estes fiestes navidiegues, Antón dionos a probar unos Bombones fechos con Crema d'Oruxu de Miel de Bual, menuda maravía. Esplosión brutal na boca. Nun pudimos aguantar y colamos con otra caxa.
Un auténticu lluxazu que tengamos esti nivel d'Obrador n'Asturies, con tanto mimu, honradez y con tantes idees lloques que s'amuesen en productos maraviyosos. Munches gracies a Antón y la so familia pola acoyida.
Dexámosvos unos videos de José Antonio n'acción. Puru placer.
¡¡Estes fiestes Turrones de Obrador Monte Naranco!!
No hay comentarios
Publicar un comentario