Nueva Visita: Abrelatas con Juan Luis García

Direición: Ería del Hospital, 5 - La Pola Sieru

Teléfonu: 984 182 245

Recomendaciones: Menú Degustación

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelaTTas] https://twitter.com/abrelattas

Anterior Visita: http://www.lesfartures.com/2015/11/nueva-visita-abrelatas.html

Comentarios: Cuando'l talentu axunta col talentu, nun puede salir nada malu. Tuvimos l'honor d'asistir a otra de les prebes del Menú Degustación que ta escurriendo Borja pal so Abrelatas con maridaxe improvisáu de Juan Luis García ... una maravía.

Xuntámonos a cenar los blogueros Historias de un Foddie, A Buen Bocado, Empachate, Fartucate y Fartones. Amigos y maestros qu'esfrutamos del bon yantar.

Empezamos con una Caleya Goma 2, maraviyosa cerveza. 96/100 en RateBeer (la biblia la cerveza) y meyor cerveza IPA peninsular en RateBeer. Namás qu'añadir. Solo queda esfrutala y felicitar a Caleya pol so trabayu.

Sentaos na mesa, el primera aperitivu del Menú fueron les Sardines del Cantábricu en Vinagreta de tomate con Cristales d'Oru Duce. Xenial contraste d'acidez del maridáu colos cristales duce d'oru. Per bones.

Juan quixo empezar a lo grande, y abriónos una botella de Pésico Blanco 2013, vinu blancu que sigue ameyorando colos años. Pese al sentir popular, si un vinu blancu ye bonu (y ésti lo ye), meyora colos años. La xoya de la corona de los blancos asturianos. Vinazu.

Siguimos cola Ensalada de Fabada Caramelizada, caviar de tomate de la güerta asturiana, cebolla fresca, oricios naturales (Tazones) y merengue de mazana reineta. Hebo división d'opiniones sobre esa faba caramelizada. A mi encantóme esi contraste de testures y sabores ente la faba y el merengue. Gran platu.

Camudamos de vinu, Bancales Olvidados 2009, vinazu de la Ribeira Sacra, mencía, tintu, pero suave. Entra solo. per frescu y con una acidez bien equilibrada. Mui bonu.

Copa de quesu del duernu de Sariegu, anchoa de Llanes, mermelada de pimientos del piquillo y vinagreta de verdures fresques. Ún de los mios favoritos de tolos menús que probé ellí. Esa mermelada de piquillos ye maraviyosa, y oldea xenial col quesu y l'anchoa. La presentación, de 10, col tenedor cuesta un pocu comela pero onde nun llegó'l tenedor, rañó'l pan.

Otra de les xoyes de los vinos asturianos, Dominio del Urogallo Retortorio 2012, una estaxa de menos d'una hectárea de Carrasquín. Vinu mui esclusivu y difícil de consiguir, bien sabrosu y potente. Una delicia na boca.

Combinó col Salpicón de santiaguinos y mazana aceda. Foi unu de los platos que menos namoró del menú, quiciabes pol escesu de la base de salpicón. Pero'l contraste de sabores ta ehí y con unos axustes, va ameyorar.

Y con Potito de crema de pataca melosa, mousse de foie y güevu escalfao. Bonísimo platu con una testura impresionante.

El mousse de foie presente en tou momentu col güevu y la pataca. Una de les maravíes de la nueche.

Pal siguiente vinu colamos a Austria, Ungerberg Blaufränkisch 2012, vinu práuticamente inesistente na península. Con una marcada acidez foi una de les grandes sorpreses de la nueche. Un primera clase.

Nun podía faltar l'homenaxe a Campoviejo y Borja tráxonos el Macarón de compota de Chorizu saludable y Almendra cruda-cruxiente. Xenial sabor del chorizu saludable d'El Horru (yá vos falamos d'ellos) que combina perfeutamente cola galleta. Gran aperitivu.

Siguimos cola Tortiella cruxente de Virigüetos al vapor y refrescu de llingua de Regaliz coloráu. Xenial esi contraste de los virigüetos cola llingua de regaliz. Yá vos lo cuntamos la otra vegada, bebelo ye como volver a los 10 años. Fascinante combinación.

Pal pexe, el vinu escoyíu por Juan Luis foi Artadi Valdegines 2012, vinu de 95 na guía Peñín, perdón, vinazu. Viticultura ecolóxica de La Rioxa, un tintu frescu qu'entra bien fácil y que-y va perbien al salmonete.

Llombu de Salmonete de Tazones al vapor con amenorgamientu de caldu de cocíu y arbeyos guisaos. Gustóme más l'anterior vegada. Taba más fluexu de sabor, anque ensin dulda ye una tema de pescadería. El contraste del salmonete col caldu de cocíu ye fascinante.

Otru de los platos estrella de la nueche fueron les Crestes de Pitu Caleya guisaes como callos a l'asturiana. Platazu impresionante. El caldu buenísimo, les crestes suavísimes ... toos rellambimos la pota.

La combinación de mar y monte foi la Monizuela de patu guisada y llixeramente caramelizada al vinagre balsámicu de Xeréz con caviar d'oricios y boletus a las plancha. Bonísima esa combinación de la monizuela col balsámicu y los oricios. Y puntazu del boletus. Bonísima.

Pa la carne, volvimos camudar de vinu, Finca Sanguijuela 2007. Otra de les sorpreses de la nueche, vinu de Malaga, bien equilibrao y elegante. Anque claro, dempués de tomar l'Artadi ... complicáu escaecelo.

El platu de carne escoyíu foi Timbal de carrillera de gochu asturcelta guisada al vinu tinto con bomba láctea de quesu Rey Silo y almendres garrapiñaes. Platazu asturianu, con unes carrilleres de 10. Hubo división na mesa, a unos gustónos la combinación col Rey Silo fríu sobre la carrillera, otros prefiérenlo caliente o como acompañamientu.

Pal postre, el vinu foi un Jorge Ordoñez Co Nº 1, un moscatel d'Alejandría qu'encantó na mesa. Un vinu de Malaga, que combina perfeutamente nos aperitivos o, nesti casu, nos postres.

El postre foi'l Pastel caseru de "Ferrero Rocher". Esplosión de chocolate na boca pa rematar la cena. Costó, pero nun quedó nada nel platu. Per ricu.

Empezamos con vinu asturiano, y acabamos con sidra asturiano. La maravía del Llagar de Angelón Diamantes de Hielo, sidra de xelu que produz emponderamientu per igual a los que nun podemos parar de bebela y a los que la desconocíen. Xamás vamos cansar d'encamentala.

Gran cena, gran compañía, con Borja al mandu los fogones y Juan Luis al maridaxe con cerveza, vinu y sidra. ¿Puede pidise más?