Suculent

Direición: Rambla del Raval, 43 - Barcelona

Teléfonu: 934 436 579

Recomendaciones: Tapea y esfruta

Web: http://suculent.com/
Facebook: https://es-es.facebook.com/SuculentBCN
Twitter: [@SuculentBCN] https://twitter.com/suculentbcn

Calidá: 4/5
Preciu: 46€

Comentarios:  A la gueta de sitios distintos y nuevos pa una mini escapada a Barcelona, Suculent siempres taba presente en tolos encamientos, y sobremanera, en dalguna de les que más nos fiamos. Asina que averamos a comer un domingu.

Llocal asitiáu en plena Rambla del Raval, en frente xustu de la famosa estatua del Gatu de Botero. Estrema'n dos locales, Suculent y la Tabierna del Suculent, mesma propuesta, los dos informales, anque la Tabierna más informal y enfocada al tapeo ainda.

Ye entrar nel Suculent ya abrir un minimundiu de bulliciu y caos ordenáu. Impresiona lo bon aprovecháu que ta'l local, y la so decoración en madera con toques modernos y muebles reciclaos (los llavavos-olla son una gociada). Según entres, zona estrecha de barra onde pueden picar daqué les persones que se quedaron ensin mesa (acutái, suelse enllenar). Una minizona con delles meses, ltes y baxes, pa comer. Un pasiellu, y tras ábrese otru mini comedor pa una comida de grupos pequeños.

Tocónos una mesa alta, de madera, ensin manteles.

Mientres decidíamos lleyendo la carta, traxéronnos unes aceitunes.

Dempués de pidir, como aperitivu, convídennos a una Ensalada Waldorf. Lleva tueru d'apiu, nuez, quesu azul y mueyu. Per rica. El toque de quesu, col dulce del mueyu y l'apiu queda xenial.

Pidimos d'entrante pa compartir, Ostra a la Brasa con Panceta Ibérica y Crema de Pistachu. Bonísima. La ostra sabe a ostra, y el toque de pistachu y panceta dan-y un contraste xenial. Platu refrescante (tien un toque cítricu sutil, pero presente), y p'amantes de les ostres. Encantónos.
Al ser dos persones, tuvimos que pidir dos.

Como platos pidimos Llombu d'Atún Coloráu a la Brasa con Emulsión de Piñones. Impresionante platu, nel so puntu. Xenial el contraste cola emulsión de piñones. Eso sí, les raciones nun son les mesmes que n'Asturies, y ésa sería la tónica xeneral de la comida. Gran platu, pequeñu, pero gran platu.

Rabu de Vaca Vieya Gallega con Minizanahories y'l so Zusmiu de Chocolate. Otru gran pequenu platu. La carne bonísima, suave, desfaese, anque'l chocolate malpenes se nota.

De postres pidimos, Pastel de Quesu Brie a la Vainilla de Tahití i "Gellé"de Moscatell. Espectacular toque de vainilla col toque de moscatel. El quesu suave, con una testura mousse. Gran postre.

Figos con Mousse de Formantge de Cabra y Crema de Pistachos. Sabe enforma (quiciabes demasiáu) al quesu y a los pistachos, más qu'a figos. Y claro, somos tan fans de los figos, que mata un poco'l postre. El romeru tampoco ayuda. Ricu, pero pelín deceicionante.

Pa beber, pidimos vinu catalán, y encamentáronnos por rcp un Massis Blanco 2013. Un vinu que sabe meyor que güel, qu'ameyora dempués d'alendar un pocu, pero qu'en nengún momentu pasónos del aprobáu raspón. Foi lo peor de la comida con diferencia. Amás, pidimos agua que nos traen nuna xarra propia del restorán bien guapa.

Bona carta de vinos, tirando de productu catalán, pero con dalguna referencia clásica. Distribuyía por precios, lo que siempres ye d'agradecer.

Con cafés, pagamos 92€.

Bon sitiu, a un preciu "algamadizu" pa ser Barcelona, con serviciu rápidu y sollerte, decoración preciosa y comida mediterranea con un toque creativu de muncha calidá.