La Ardilla Somió

Direición: Avenida Dionisio Cifuentes, 128 - Somió - Xixón / Gijón

Teléfonu: 636 849 144

Recomendaciones: Tapea y esfruta

Web: http://ardillasomio.com/
Facebook: https://www.facebook.com/ardillasomio
Twitter [@ArdillaSomio]:  https://twitter.com/ardillasomio
Instagram [@ArdillaSomio]: http://instagram.com/ardillasomio

Calidá: 4/5

Cuando visitamos la primer vegada'l Restorán Cabo Vidio quedamos namoraos, asina que cuando nos enteramos que Jairo volvió inaugurar La Ardilla Somió (y tres nun poder asistir a la inauguración) nun duldamos n'averanos a probar la so nueva propuesta.

La Ardilla Somió asitiase nel barriu de Somió, nuna casona preciosa, con una terraza llateral bien grande que va faer les delicies pel branu, con abondu sitiu p'aparcar y llendada (por si vais con crios).

Dientro, la casa estremáse'n dos estayes, embaxo, cocina y zona de barra pa tomase daqué. Enriba, un preciosu comedor, decoráu en madera, con meses amplies y espaciaes, cristaleres con vistes; y tou con mil detalles preciosos. Anque los que conozáis Cabu Vidio, seguro que nun esperáis otra cosa. Cada detalle ta perfeutamente curiáu.

Empezamos cola mítica Mantequilla d'Anchoes, suavina, con un toque sutil d'anchoa. Per rica pa dir abriendo boca.

Nel intre traxeron un Caldín de Cenahoria y Curry. Bonísimo. Calentín pa cenar, perfeutu. Y pel hibiernu, una gociada. El toque de curry y cenahoria, perfeutu.

Siguimos con Pastel Suave de Centollu con Mueyu de Tomate. Otru platu mui bonu. Pastel caseru, con toques nidios a centollu, sutiles, que sabe y güel, non como los industriales que nos suelen poner en restoranes o nes tiendes.

Acompáñenlo de pan turrao, toque que prestó enforma pa col pastel.




Croquetes de Xamón. Riques. Con bonos tropezones de xamón y bien cremoses.

Escalibada con Llombos de Sardina en Vinagre, El contraste de les sardines y los pimientos queda xenial. Da-y un toque bonísimo. Pergrande platu. Ún de los favoritos de la nueche.

Bacaláu de Trasacar con Pistu. Jairo indícanos qu'entemez el pistu col amenorgamientu de bacaláu pa que'l sabor del platu tea integráu. La verdá ye que si yes un fanáticu del Bacaláu ties que probar esti platu, y si nun lu yes, vas facete dempués de probalo. Bonísimo. Gran llombu, amás.

Secretu Ibérico con Calabacín y Puré de Cenahoria. Fascinante toque de naranxa na qu'ensin dulda foi la sorpresa de la nueche. Bonísimo.

Cuando esperabes un platu de carne "ensin más", apaez Jairo con esta combinación bonísima.

Y cuando yá tábamos llenos ... lleguen los postres. A ver quien se niega a esa Tarta de quesu con Mermelada de Mazana, que yá n'anteriores entraes recordamos como una de los meyores que probemos nunca. Increíble. De 10.

Probemos amás Cremosu de chocolate con Pan Turrao, Aceite y Sal, que ye como volver a los 10 años, al bocáu que nos faía la nuesa güela pa merendar. Xenial la tostada col chocolate, simplemente xenial.

Pa beber, un Ochoa Rosado de Lágima 2015. Un rosáu algamadizu, con dalgún toque dulzuxu que nos gustó, anque nun síamos nin entendíos nin aficionaos al rosáu. Pero taba bonu.

Na carta vinos tán pendientes d'añadir dalguna referencia asturiana, pero tendránla. Y tienen Sidra Brut Nature. Jairo aporfiónos que la so prioridá ye'l productu asturianu calidable, y ende nun pueden faltar les nueses bébores.

Gran sitiu La Ardilla, perfeutu sitiu pa cenar en pareya, amigos, en grupu ... y tastiar les maravíes del Cabo Vidio a 2 min del centru de Xixón en coche.