Nueva Visita: Ronda 14

Direición: C/Alfonso VII, 20 (Calleja los Cuernos) - Avilés

Teléfonu: 985 56 94 09

Facebook: https://www.facebook.com/Restaurante-Ronda14-219613538073700/timeline/

Visites anteriores:

http://www.lesfartures.com/2014/05/nueva-visita-ronda-14.html

http://lesfartures.blogspot.com.es/2013/05/ronda-14.html

Calidá: 3/5

Preciu: 25€

Tercer entrada nel blog del yá tan afamáu Ronda 14 d'Avilés, tamién abrieron apocayá'n Madrid, anque esta yera la mio primer visita.

 

Coles mires bien altes, nun defraudó na comida, pero nun salimos del tou contentos cola atención nel llocal. Tenemos la máxima de que si la comida ta bona, ta bona…y ye lo que cunta…amás dalguna cosa más, como comer a gustu.

Llegamos ceo, a les 2 d'un domingu, y con reserva previa con dellos díes d'antelación. Con solo una mesa de 6 persones ocupada, indíquennos que la nuesa mesa pa 2 ye la del centru del comedor. Nun me gusta comentar nada al respective pa solicitar otra. Si ye la que nos acutaron pos yá ta, pue ser que les otres tuvieren acutaes con más antelación o que la xente acute dalguna en concretu porque yá los conoz. Pero vemos llegar más tarde a más pareyes y comprobemos qu'a una tampoco-y gusta l'asignada y a otra que ye la postrera en llegar dan-y la que queda.

Yá nos pasó delles vegaes últimamente y nun acabamos d'entender por qué si hai delles meses llibres del mesmu tamañu, nun dan la posibilidá d'escoyer. A la fin, van xenerando descontentu…si soi'l postreru en llegar y namás queda una, pos nun hai más, pero n'otru casu…

Dannos darréu la carta y a los 3 minutos yá sabemos lo que pidir. Mírennos pero nun vienen, intento avisar pero yá nun nos miren…consigo indicar que yá lo tenemos claro, pero dícenme con señes qu'espere un momentu. Taben charrando…Doime cuenta de que ye l'encargáu quien tien de venir a tomar nota y encamentar, pero tarda 10 minutos n'apaecer… asina qu'acutáramos ceo porque teníamos priesa, y…

Por fin tómanos nota comentando, y al ser pequenu toos oyen tou, que nos va a colar per delantre de la otra mesa, que tenemos suerte, porque paez qu'entá taben aldericando…

Con tou esto, yá empieces a comer con otru humor…

Tráennos una cestina cola ración de pan que pidimos. Paninos calientes de 3 variedaes que, a los paneros, siempres empresten.

Empezamos a probar platos con un Gunkan con Tartar de Vieira. Mui ricu. Gran presentación y sabores perfectos:

Pero de nuevu un detalle que nun nos gusta. Te ponen cubiertos y paliyos. Bien. Hai xente que-y gusta comer con paliyos o xente que quier aprender y-yos echen un gabitu. Pero yo comí con paliyos, y nun toi cómodu con ellos. Suponme tar más pendiente de cómo coyer la comida o que nun se caya, que de si ta bona. Asina que prefiero comer con cubiertos. Ye la mio elección. Pero escuchar, que podíen comentalo apartaos, al encargáu dicir a una camarera “Esos señores tán comiendo con tenedor, vete a ayudar”, pos nun nos gustó…

Vien una moza y ufiértanos ayuda, pero dicímos-y que nun s'esmoleza, que preferimos comer con cubiertos. Nel siguiente platu, vien otra de les moces colo mesmo, que nos ayuden colos paliyos…y claro, yo yá…

Entiendo que lo faen con bona intención, y que se pasa una ratada xugando cola comida cuando nun se controlen los paliyos. Pero'l comentariu, l'escuchalo, y que te lo repita

Falando yá de la comida, lo primero fueron unos Llangostinos al Panko. Bien ricos. El Panko que tan de moda ta apurre esi cruxiente especial qu'empresta. Si enriba los llangostinos son bones pieces nel puntu perfeutu…

Roll de Mar y Monte. Fantásticu platu. Platu pol que vimos que diben la mayoría de les meses, bien d'oyíes, bien por comelu n'otres ocasiones, y que bien merecida tien la fama. De lo probao, el más destacáu:

Gyozes de Pitu. Mui riques. La pasta perfecto, el rellenu sabrosu:

Pa terminar, Sorbete de Llimón. Yá tábamos abondo bien, y resultónos un pocu escesivu. Eso sí, per bonu:

Total 40€ con agua, ensin café. Preciu más qu'afechu.

Una pena salir cola sensación de nun esfrutar tou lo que merez la calidá de tolos platos.