Nueva Visita: Malte

 

Señes: Rúa Galera, 47 - A Coruña

Teléfonu: 981 205 751

Aconseyamos: Maltea. Ye lo meyor del mundiu.

Calidá: 4/5

Preciu: 30€

Anterior Visita: https://lesfarturesast.blogspot.com/2019/10/nueva-visita-malte.html

Web: http://www.cervezotecamalte.com/portal/

Facebook: https://es-la.facebook.com/cervezotecamalte
Twitter: [@malteando]: https://twitter.com/malteando
Instagram: [@malteando]: http://instagram.com/malteando

Comentarios: Siempres que vamos a Coruña dicimos qu¡hemos de probar sitios nuevos, porque tien una ufierta gastronómica bien interesante, pero los continuos cambeos de carta del Malte cola opción de siempre probar coses nueves, acaba convenciéndonos pa volver como primer opción.

Y asina foi. Visita rellámpagu a Coruña con cena'l vienres. El Malte entemez perbién los ambientes, de dir tomar una cerveza sele, cena y copes. Depende de la hora a la que vaigas, atopes un ambiente distinto, o la transición d'ún a otru. Amás, siempres con esposiciones de cuadros o semeyes interesantes pa ver.

Cenamos 4 persones. Y pidimos tou al centru pa compartir. Como siempres, decidió Juan. Dueñu, ideólogu y ún de los mayores cerveceros que tenemos. Pedíi conseyu, que paga la pena.

Empezamos con Causa Limeña de Xarda Afumada. Toque picante y cítricu. Base de pataca. Pa tomar d'un bocáu.

Croquetes de Pastrami. Güeyu, el pastrami ta fechu nel mesmu restorán, nun ye compráu. Una croqueta de tola vida, con bonos cachos de carne y un toque cítricu pa compensar sobre la croqueta.

Porra de Bacaláu, Ayu Negru y Olives. La peor presentación de tolos platos, pero'l que más nos prestó. Una porra de tola vida rellena de bacaláu, con un importante toque saláu. Compensa cola mayonesa de llimón y mandarina, y l'aceituna negra. Pa compartir ye perfectu.

Bao con Albóndiga Napolitana. Foi la parte menos sorprendente de la nueche. Combinación duce y salada, pero con guisu de fondu. Ricu.

Y acabamos con un Boletus, Güevu, Pataca y Zusmiu de Carne. Un revueltu de boletus del día, con güevu pa romper, entemecer y esfrutar. Buenísimo.

De postre, Tarta Sacher y Sorbete d'Artimora. Chocolate, albaricoque y más chocolate col toque de l'artimora. Bien bona. Compartimos 1 postre pa toos.

Y Tarta de Quesu y Sorbete de Cerveza. Creéime si vos digo que ye una de les meyores tartes de quesu que vais probar. Espectacular. Compartimos 1 postre pa toos. 

Salimos a 16€ per cabeza. La cerveza foi invitación de la casa. Les pintes varien de preciu según lo esclusiva que sía la cerveza, pero ronden los 5-7€. Polo que con un par de pintes, la cena sale más qu'amañada de preciu.

Pa beber, un poco de too. Empezamos con un par de pintes de la maraviyosa 2 Year Unblended Oude Lambiek Foeder #95. Una llámbica casi moza, de 2 años d'antigüedá y ensin entemecer con otres llámbiques d'otros años (como suel facese).

Street Dogs. Collaboración de La Calavera con Laugar. Una Sour Ale avieyada en barriles de vinu blanco, que taba bonísima. L'amiestu del ácidu col toque de madera va xenial y 6,3% d'alcohol.

Meyor inda foi la Fruits of the Doom, de La Calavera. Una American Pale Wheat con artimores avieyada en barriques de vinu, de 6,3%. Brutal. Toque duce d'uva con final ácidu y secu.

La xoya de la corona foi la Rodenbach Caractere Rougue. Una cerveza creada en collaboración col chef Viki Geunes. 6 meses de maceración lleldando cereces, artimores y arándanos pa darréu avieyala 2 años en barriques de carbayu. Una cerveza con 7%, complexa, toque a madera, carambelu, amargosa, pero elegante. Tien cuerpu pero ye amable. Casi recuerda a una Borgoña frescu. Raspia la perfección. Cerveza pa dase un homenaxe.

Colos postres, dos imperial stout. Tall Dark and Mandarin. Imperial Stout con Cacáu y Mandarina. Combinación interesada pa probar. Ta rica. 9,5%.

The Doom Series: Funeralopolis. Russian Imperial Stout con café de 'iopia, faba tonka y lactosa. 10% de café na boca con un toque llactosu. Bien rica. Cerveza fecho pol mesmu Malte en collaboración con Laugar.

Otres de los apuestes fuertes del local son los Café Selección. Merecen enforma la pena.

¡¡¡Cómo nun vamos Maltear siempres que podemos con estes xoyes!!! En Febreru ye'l so décimu aniversariu. Yo que tu ... nun me lo perdía!