Monte San Feliz

 

Señes: San Feliz, S/N - Ḷḷena
Teléfonu: 985 593 089

Facebook: https://www.facebook.com/monte.sanfeliz

Twitter: [@xuneaa] https://twitter.com/xuneaa

Instagram: [@xune_andrade] https://www.instagram.com/xune_andrade/

Comentarios: Volver al Monte como conceutu, y meyor si ye nun pueblu col nome San Feliz. Asina nos cuntaba Xune Andrade la so vuelta a Asturies, a la so casa, a Ḷḷena. Un pueblín a namás 5 minutos en coche de la capital, La Pola, de tan solo 20 cases, y onde San  Feliz recibe a la so entrada col restorán de Xune y unos apartamentos rurales bien guapos.

Va unos años cuntábamosvos la hestoria de Javi Farpón, ún de los nuesos favoritos, na so Casa Farpón, otru talentu nuevo que volvió y iguó l'antigua corte del so güelu en Mamorana, tamién en Ḷḷena. Agora súmase Xune a ayudar modernizar y dar un puntu distintu a un conceyu que se caracteriza por ser la puerta d'Asturies y que, hasta agora, namás ufiertaba cocina tradicional.

El Monte nun dexa de ser un chigre de pueblu, con una estética bien cuadada. Según llegues, al lláu  de la panera, una terraza pequena pa tomar daqué antes d'entrar a comer.

Según entres, la zona de restorán, con barra al fondu, mini tienda, cocina vista, y 4 o 5 meses nun comedor pequenu, con una chimenea calteniendo l'ambiente.

Nel pisu de riba, un comedor más grande, preciosu, con unes vistes increíbles, que namás abre pa grupos más grandes, fines de selmana o so reserva.

Xune convidónos a conocer la so propuesta, lleva namás 5 meses abiertu, pero ellaborónos un menú degustación colos sos platos más emblemáticos. Cocina asturiana, con dalgún toque creativu, pero volviendo muncho al productu y a la tradición. Ye'l camín. Y tienlo claro. Con solu 31 años.

Pa beber, Colet a priori Brut. Cava refrescante. Entra solo.

Empezamos con Mantequilla - Fumu. Importante toque afumáu na mantequilla.

Amiéstenla con panes artesanos d'escanda.

Siguimos con Caldu - Azafrán - Manzanilla. En copa vinu. El caldu de tola vida de la to güela, pero con un toque de manzanilla. Bien bonu.

Güeves - Croissant. Cruxente y cola testura de les güeves de trucha. Bien ricu.

Acabamos los aperitivos, y pasamos a los entrantes. Oriciu - Coliflor - Trufa. Ún de los favoritos de la comida. La panna cotta de coliflor ta espectacular. L'oriciu apurre intensidá y contraste salín y la trufa predomina en tol platu.

Navaya - Meuniere - Ortigues. Formoses navayes, con un aire de mazana y toque a ortigues. Con cuchiellu y tenedor. Y la espluma en cada bocáu. Bien bonu.

Ostra - Salmis. Un "salmorejo" con ostra del Eo. Amás, acaben d'estrenar la certificación ecolóxica pa les ostres. Una esplosión salina na boca, el "salmorejo" amás potencia. Bien bonu.

Camudamos al tintu. Aseginolaza & Leunda Kauten 2018. Garnacha de la zona d'Olite. 6 meses en barrica, ensin penerar. Producción bien pequena. Vinu qu'aguanta perfectamente los platos. Gustónos.

Empezamos colos platos. Vaca - Yema - Trufa - Castañes. Otru de los favoritos de la comida. Vaca casina alimentada con farina ecolóxico d'escanda, de la zona, madurecida 60 díes, quesu Vidiago, castaña frita y yema de güevu confitáu con un toque de trufa. Pa entemecer y esfrutar tou. Una pasada.

Pechuga - Cebolla - Yerbes. Pechuga d'arcea, con una emulsión de yerbes y portobello en llámines. Otru platazu.

Venáu - Mazana - Ablana. Albóndiga de venáu, con un caldu de pitu. Lleva mazana y ablana. L'albóndiga ta xugosa, pero ameyora enórmemente cuando la empapes bien nel mueyu. Bien ricu.

Xabalín - Apionabu - Nabu. Paecía que diba ser muncho más intensu de lo que de verdá foi. El xabalín conteníu, hasta nidiu. El guisu de fondu taba buenísimo. Bien ricu.

Y acabamos los platos colos Callos. Suavinos. Entraben solos.

Aparte, un poco de picante per si queríamos da-y más allegría.

Pa camudar a los postres, un poco de Vinu de Misa. Lliteral.

Chocolates. Preside un macaron pa tomar cola mano, el restu, pa fundir la cuyar y dir probando les distintes capes. Cremosu de chocolate amargosu con pimienta, toque de té matcha. Un xuegu de chocolates cremosu. Bien ricu.

Y acabamos cola Tarta de Quesu. Tarta de quesu la Peral, asina que sí, sabe a quesu. Y enforma. Y ta bien bona. Ensuguen el quesu ellí pa faer una miga con él p'añedir a la tarta.

Nun pagamos. El ticket mediu ronda los 40€ dependiendo de lo que bebas. Como véis, cocina de productu, dende platos tradicionales ensin apenes tocar, hasta reinterpretaciones siempres basándose nel productu asturianu. A Xune (Elipe, cantante de Dixebra) acaba-y de salir un duru competidor como repartidor de felicidá n'Asturies.