Creelers

Señes: Lower Harrapool, Broadfort IV49 9AE - Escocia

Teléfonu: +44 1471 822281

Web: http://www.skye-seafood-restaurant.co.uk/
Facebook: https://www.facebook.com/Creelers-Of-Skye

Calidá: 3/5
Preciu: 30€

Comentarios: La Isla de Skye ye ún de los sitios más maraviyosos d'Escocia, una isla xunida al restu'l país por una ponte (esperiencia total que te toque pasalo con restos d'un furacán), con paisaxes espectaculares, llenos de cantiles, castiellos, tabayones, pequenos montes (anque grandes pa ellos) y pueblos pequenos pesqueros.

Foi la parte d'Escocia que más recordó al occidente asturianu. Puedes aportar a ella pola ponte que vos comentamos, o pol Ferry. Y ye recomendable entrar d'una manera y salir d'otra (el ferry tien precios baratos), anque como vos comenté, la envernada torgónos volver nel ferry.

Ta enllena de turistes, pero al empar, caltien esi componente selvaxe inda (como l'occidente asturianu), y ye bien fácil llegar a sitios onde nun atopes absolutamente a naide. Paisaxes inmensos, llagos enormes, paz y tranquilidá.

La so ufierta gastronómica ta más enfocada a la mar, y son "famosos" los sos platos con llagostes, el so salmón y los sos moxones. Nun fuimos a cenar (a les 19h) a ún de los sos sitios más conocíos, Creelers, nel pequenu pueblu de Broadfort. El pueblu en sí nun tien gran cosa, amás de ser ún de los pocos núcleos urbanos de la isla.

El restorán ye bien pequenu, tien perpoques meses y suel enllenase. Asina qu'acuta.

Pidimos dos platos de pexe, probando pexes más que de sobra conocíos por nós (y qu'adoramos) pa comparar la nuesa cocina cola d'ellos. Y ... siento dicilo, pero nun hai color.

Pixín a la Brasa con una Crema llixera de Soya y Amenorgamientu de Pernod (una especie d'anís francés). El pixín nun ta mal, tira a duru, pero l'anís y la soya maten dafechu'l sabor.

Filetes de Saramolletes con mueyu de Carragina. La carragina ye un estractu d'alga. Da igual, filetes cocíos, ensin sabor ... y mira que ye complicáu qu'un saramollete nun tenga sabor.

De lo más decente que comimos n'Escocia, y solo ye un 3 raspao.

Pa beber, xunas pintes de Red Skye, la cerveza local. Tampoco perdéis nada.

Pagamos unos 60€.