Señes: C/ Fierro, 9
Teléfonu: 984 285 781
Facebook: https://www.facebook.com/AramburuAsturias/
Twitter: [@AramburuAstur] http://www.twitter.com/AramburuAstur/
Instagram: [@aramburuastur] https://www.instagram.com/aramburuastur/
Comentarios: A estes altures de Les Fartures nun vamos afayavos los vinos de Cangas, una de les poques zones que cumplen los requisitos pa faer viticultura heroica na península, con bonos vinos con premios internacionales que los acrediten, que nun paren de reclamar que precisen llantar más viñes porque vienden el 100% de lo que producen y que ye ún de los revulsivos económicos de la zona una vegada cerraes les mines.
Ente toles bodegues de Cangas, Monasteriode Corias ye ensin dulda la más importante, por hestoria y producción. Lleven casi 20 años faciendo vinu, y acaldía siguen creciendo y faciendo les coses meyor. De cara a les Navidaes, Aramburu entamó una pequena preba de los vinos especiales que tien la bodega, munchos dellos desconocíos pa los asturianos. Y asina pudimos comprobalo ente los presentes.
Cuntamos cola presencia de Victor Alvarez, xerente de la bodega que, amás de presentanos la bodega, comentónos les últimes novedaes tocantes a la mala vendimia d'anguaño debíu al tiempu y a los intentos por ampliar viñeos col Ministeriu d'Agricultura.
Empezamos col so Albarín Blanco Guilfa 2017. Únicu blancu de la preba, dexando claro que la bodega apuesta polos tintos. 2500 botelles, lleldaes en barriques de 500l. Igual nun lo sabíais, pero Guilfa n'asturianu significa aire frío, como'l que soporten les viñes de Cangas. Les barriques dan-y un pelín más de complexidá. Gustónos, anque lo recuerdo meyor. Con más guarda, gana.
Corias Guilfa Tintu 2014. 60% Uva Carrasquín y 40% Verdejo Negru. Vinu potente, con 13,5%, qu'entemez el terruñu del carrasquín cola elegancia del verdejo negru. Solamente 3500 botelles pa un vinu perfecto pa carnes fuertes. Abondo alcohólicu pal mio gustu.
Valdemonje Albarín Negru 2014. Empezamos colos monovarietales. Un vinu que peca d'alcolóhico (14%), golor a fruta negro, regaliza ... y na boca tien bona acidez pero l'alcohol puede con tolos matices.
Valdemonje Verdejo Negru 2015. Ún de los favoritos de la nueche. 13º d'alcohol. Muncho más equilibráu. 12 meses na barrica de carbayu francés. Capa media. En ñariz muncha cereza y na boca, finu y elegante, pero con cuerpu. Gustóme enforma.
El mio favoritu de la nueche foi'l Valdemonje Carrasquín 2013. Últimes botelles de l'añada, en curtio empiecen a vender la 2014. Namás 1000 botelles, para una de les uves más particulares de Cangas. Creo que define a la perfección el terrén, ye más acedu, más mineral y con más terruñu. El vinu vien marcáu pola acidez, tien muncha personalidá y al empar caltien l'equilibriu alcohólicu con 13,5%. Bien bonu.
Acabamos con Pago del Narcea 2015. Amiestu d'Albarín Negru, Carrasquín y Verdejo Negru. Edición llimitada con etiqueta dorada d'un vinu del que solo faen 700 botelles y avieyenlu en carbayu australianu. Ta bonu, más equilibráu que l'anterior.
Como veis, vinos pa tolos gustos y toles ocasiones. Vinos más alcohólicos, pa comíes más fuertes, otros pa esfrutar namás na copa, vinos pa guardar y probalos nunos años y vinos con personalidá propia que faen de Cangas un sitiu únicu.
No hay comentarios
Publicar un comentario