Nueva Visita: Casa Laure

Señes: Plaza de Trascorrales, 33009 - Oviedo / Uviéu
Teléfonu: 985 219 044

Aconseyamos: Pexe

Calidá: 4/5

Preciu: 48€

Facebook: https://www.facebook.com/CasaLaure/
Anterior Visita: https://www.lesfartures.com/2014/05/casa-laure.html

Comentarios: Un clásicu d'Uviéu qu'hai que visitar de xemes en cuando. Asitiáu na Plaza Trascorrales, que se quedó un poco esnuda tres el zarru del Married y Traslaburra.

Casa preciosa, con terraza na mesma plaza, soleyera y perfecta pa guah.es. Según entres, zona de barra con meses alredor, decoración en madera y piedra, antigua, bien cuidada y bien guapa. Y nel pisu de riba, comedor. Pequeñu, asina que s'encamienta acutar, sobremanera en fin de selmana.

Tienen dellos platos bien conocíos, y muncha fama colos pexes, pero lo meyor ye que dexes qu'Iván y/o Paula t'encamienten, que saben muncho de lo que falen y nun fallen.

Punximos nes sos manes y comimos dos persones, nuna mesa nun rincón del salón de baxo, ayenos al mundu y esfrutando de cocina, ambiente y conversación.

Ún de los sos puntos fuertes ye la carta de vinos, sidra y cerveza. Amás de bona presencia asturiana, siempres tienen coses que merecen enforma la pena y que raramente atopes n'otros sitios. Asina que empezamos con una Smashbomb Atomic IPA de Flying Monkeys. Cerveza canadiense 95/100.

Colos panes, traxéronnos un aceite d'oliva virxe extra Cortijo Spiritu Santu Picual. Aceite d'uva ecolóxico, con un toque yerbal intensu bien bonu.

De primeru, unes Amasueles de Carril. Bien bones, a pesar de ser xapóniques. Feches perfectes, con una mueyu pa morrer.

Y acabamos con ún de los platos estrella de la casa, Callos con Pataques. Tenéis que probalo. Impresionante. Allegre, anque nos traen inda más picante por si queremos, pero nun-y fai falta.

Emplatáu pa caún y acompañáu de Pataques frites de verdá.

Pa beber, Enagua Numen (premium de los Montes de Toledo 😕).

Y Peña el Gato, vieno Rioja avieyáu en tinaxes de folla. 14,5% pa un vinu qu'entra solo, con un sabor importante a vanilla y del que namás faen 600 botelles. Bien, pero nun namoró.

Pagamos por tou, convidaos a cafés y copa, 94€. Un sitiu céntricu, preciosu y que nun falla. Bien recomendable Casa Laure. Acepta TicketsRestaurant.