Mikkeller Beer Celebration Copenhagen 2017

Direición:  Øksnehallen, Halmtorvet 11, 1700 Copenhagen

Web: http://mikkeller.dk/

Facebook: https://www.facebook.com/mikkeller
Twitter: [@MikkellerBeer] https://twitter.com/MikkellerBeer
Instagram: [@mikkellerbeer] http://instagram.com/mikkellerbeer

Preciu: 260€ (4 Sesiones)

Comentarios: Mikkel Borg Bjergsø, esto ye, Mikkel Mikkeller ye'l gurú actual de la cerveza europeo. Un ex profesor d'institutu danés, que fundó Mikkeller en 2006. La so filosofía yera bien clara, afaer al norte d'Europa'l conceutu de cerveza artesano americana, con una filosofía innovadora y rompedora para un mercáu muncho más tradicional y clásicu. Y tou esto, ensin una fábrica de cerveza propio.

L'apueste salió perbién, Mikkel nun llega a los 40 años y tien una empresa con millones de beneficios faciendo cerveza artesano. Formáu n'ún de los institutos más creativos del mundu, Mikkel supervisa caúna de les cerveces que crea, unvia la receta a la Fábrica onde-y faen la cerveza en Bélxica ("de proef", una cervecería para cerveceros ensin fábrica), acompáñala d'un diseñu rompedor y véndela por tol mundu.

Popularizó'l conceutu "gipsybrewing" (ellaborar cerveza n'instalaciones ayenes), anque acaba d'abrir  la so propia fábrica en California (para espandise nel mercáu americanu). Diseña una nueva cerveza cada 3 o 4 díes, y casi toes a una peraltu nivel, de múltiples sabores, colores y golores. Collabora colos meyores restoranes del mundu ellaborando cerveza para los sos menúes (como'l Noma o Celler de Can Roca), y convirtió Copenhagen, xuntu cola cervecera TO ØL, na capital cervecera d'Europa, en menos de 10 años.

En Copenhagen tien una rede de cerveceríes, restoranes de too tipu, que lo faen onmipresente. Y eso tien enforma méritu cuando hasta esi momentu, la cerveza de la ciudá yera Calsberg.  Faciendo de la cerveza artesano, un negociu curiosu, rentable y rompedor que ta intentando ser semeyáu en tol mundu. Acaba de llanzar una marca nueva de llicores, y una llínea de ropa pa runners con un club onde unes 200 persones queden pa correr y dempués tomase una Mikkeller (el mesmu Mikkeller paez que foi un corredor bastante potente de maratones antes de dedicase a faer cerveza).

Dende fai 7 años entama'l Mikkeller Beer Celebration, agora mesmu ún de los Festivales referentes de cerveza nel mundu. Mientres dos díes, rexúntense les 100 meyores cerveceres del mundu, escoyíes por Mikkel mesmu. El Festival dura dos díes y celébrase nun céntricu centru d'esposiciones al qu'alleguen unes 3000 persones qu'esfruten de 4 sesiones distintes. Y nun ye nada fácil consiguir una entrada, porque vuelen como si d'un conciertu de rock tratárase.

Vienres y sábadu, de 10 de la mañana a 2 de la tarde; y de 4 la tarde a 8 de la nueche; los 100 cerveceros tienen el compromisu de pinchar les sos meyores creaciones y camudales en cada sesión. Lo habitual ye qu'una cerveceru lleve dos tiradores de cerveza, polo tanto, 8 cerveces distintes; lo que suma un total de 800 cerveces distintes en 16h de Festival. Una llocura.

Pal cerveceru supon una escaparate increíble, por cuenta qu'ellí rexúntense distribuidores, propietarios de les meyores cerveceríes del mundu, críticos cerveceros y amantes de la cerveza polo xeneral. Y ellos van escoyer qué cerveces vamos beber nel restu del mundu'l próximu añu en Festivales como ésti. Por tanto, ta más que garantizáu que los barriles que se pinchen tean nes meyores condiciones posibles, nel momentu óptimo de consumu y que lo que vas probar ellí va ser lo meyor de lo meyor.

Y asina foi, la entrada nun ye barata (unos 260€ pa les 4 sesiones), pero paga la pena. Esfrutar d'una ciudá como Copenhagen, tomada lliteralmente per miles de cerveceros, con actividaes culturales, brewpubs y cerveceríes a españar. Poder parolar con ellaboradores de too'l mundu, con distribuidores, con críticos ... que munchos d'ellos conozan Asturies gracies al trabayu que tán faciendo Andrés Torre (propietariu d'El Lúpulu Feroz y distribuidor de Mikkeller nel noroeste de la península) o Pablo Cabanón (introduciendo la cerveza artesano n'Asturies dende fai 14 años) y poder vivilo ellí mesmu, con ellos, viendo cómo los conocen y valoren (y animen a siguir lluchando) ye un arguyu. Y asegurámosvos que bebimos más de 260€ en cerveza, por pequena que fora la copa.

Anguaño la representación española foi NaparBeer y Nómada, ¿a qu'a munchos nun vos sonaba nenguna? Pos yá táis tardando en dir a la vuesa cervecería de referencia na vuesa ciudá (y si nun conocéis nenguna, encamentámosvos ensin problema) y probar una Mikkeller, una Naparbeer o una Nómada. Y por qué non, suañar con que Caleya llegue ellí n'unos años. Por falta de calidá nun va ser.

Maraviyosa esperiencia cervecera en Copenhagen, arrodiada d'amigos cerveceros y aprendiendo un montón. ¡Repetiremos!