Teléfonu: 985 552 014 - 665 836 223
Calidá: 4/5
Preciu: 40€
Nun se trata namás d'un restorán pa dir a xintar…
Trata d'esfrutar visitando Taramundi, pasar pol Conxuntu Etnográficu d'Os Teixois, y dirixise a Almallos, onde namás mora una pareya dedicada al plantíu d'Arándanos y otros frutos, y onde ún paez perdese hasta atopar esta maravía tan escondida.
Unos cartelos pidiendo respetu pa la redolada, unos caminos arrodiaos de vexetación, una ponte colorada...un pequenu estanque apináu pexes y nenúfares…y una construcción mimetizada cola redolada, y una gran puerta: “Los Arándanos”.
Al trespasala, un recibidor, una maleta antigua, productos de frutos coloraos espuestos, un pasiellu qu'indica “Tienda”, una gran sala con meses, grandes cristaleres con espectaculares vistes al monte y nel centru un modernu llar caleciendo la estancia.
Tien el so encantu non yá el llegar, y tar, sinón tamién conocer la so hestoria. Una pareya de Madrid, que se treslladen a esti paraxe pa cultivar frutos coloraos y ellaborar con ellos productos pa la vienta y pa los platos del so restorán. Y faelo tan bien…qué méritu!!!
Sentámonos nuna de les meyores meses, al pie la gran cristalera y con vistes a parte la so parcela y a los montes d'alredor.
Yá que tábamos ellí queríamos probar delles coses de la so ufierta. Asina que decidimos por un platu fora de carta y otra entrada que nos llamó enforma l'atención, un par de platos principales de carne y un postre. Resultó ser más que de sobra. Nun pudimos terminar una de les carnes, sobremanera pa dexar un furaquín pal postre, pero encantónos tou.
Pa beber, un par de copes d'Albariño y agua, que dempués había que conducir de vuelta. Pero hai que destacar qu'al respeutive la visita anterior, inclúin na carta de vinos dalguna referencia de Cangas. Coméntennos que tienen enforma ésitu porque la xente quier probar el vinu la tierra y, sobremanera, porque ta bien bonu. Allegrámonos!!!!
Tráyennos de mano unes Tostes de Quesos Asturianos con Zusmiu d'Arándanos. Ye una especie de crema onde entemecen Cabrales, La Peral, quesu de cabra La Chivita y dalgún más que nun mos alcordamos, y nueces. Bien suave a pesar de l'entemez y'l zusmiu combina a la perfección:
Lo primero que pidimos ye un Gazpachu de Frutos Coloraos que nos llamó l'atención namás ver la carta. Frescu y con un puntu d'acidez perfeutu:
Ufiertáronnos fora de carta esti Wok Serondiegu de Cogordes, Calabaza y Castañes. Coles primeres castañes recoyíes, unes variedaes de cogordes y calabaza, que con esi puntu turráu qu'apurre'l wok resultó un sorpresón de platu:
Les Carrilleres de Gochu Ibéricu al Vinu Tinto con mueyu de Frutos Coloraos y Pataques Panaderes taben d'escándalu. Meloses, carne tiernísima y con un mueyu de vinu bien concentrao qu'en combinación colos frutos coloraos quedaba xenial. Les pataques perfeutes:
El Sollombu de Xata Asturiana (IGP) con Mueyu d'Arándanos, Pataques Panaderes y Cebolla Caramelizada yera pura mantequilla. Desfaíase casi ensin mazcar. Muncha calidá:
Y pa terminar, un Coulant de Chocolate con Coulis de Frutos Coloraos. Otru espectáculu. Perfeutu'l Coulant, bien líquidu per dientro. Perfeutu'l mueyu de frutos coloraos, y perfeutu'l xeláu bien cremosu qu'acompañaba:
Dempués, Fervinchu y Café con invitación d'unes Trufes. Un bon final esfrutando les vistes y comentando con Virginia cómo los conociéramos, cómo nos presta lo que faen y aprovechando pa mercar un zusmiu d'Arándanos al 85% con azucre y una mermelada d'Arándanos ensin azucre. Tienen na mesma carta los productos a la vienta p'aprovechar y llevase daqué de lo qu'acabes de probar.
Destacar tamién que ponen unos Panes espectaculares y calentines, cuantimás l'integral.
Amás d'otros platos na carta que quedamos con ganes de probar, tamién tienen Fabada o Cachopu, que suponemos que son platos per demandaos por turistes qu'aprovechen la so visita a Taramundi p'averase a comer nesta maravía sitiu.
Un restorán más que recomendable onde esfrutar de la redolada, la comida y l'atención y'l tratu cercanu.
El total foi d'unos 90€ que nun nos paecen desaxeraos pa la so llocalización, los productos qu'ufierten, la calidá y lo contentos que colamos…
No hay comentarios
Publicar un comentario