El Risco

Direición: Calle Montaña Clara, 30 - Famara - Lanzarote

Teléfonu: 928 528 550

Recomendaciones: Pexe

http://www.restauranteelrisco.com/

Calidá: 4/5
Preciu: 44€

Comentarios:  Ún de los escayos clavaos na mio anterior visita a Lanzarote foi nun poder escribir una crónica sobre'l Risco, ún de los sitios que nos quedó grabáu a fueu (volcánicu) na isla, por tresmanamientu de les semeyes ...

Asina que esta vegada escribo una crónica "nueva"pero como si fora una nueva visita. Lo primero, l'allugamientu, el restorán ta en Famara, ún de los llugares más espectaculares de la isla, con una sablera kilométrica paradisiaca enllena surferos y demás deportes del vientu, con unes vistes impresionantes al risco. Y si amás, tienes tou esi espectáculu de vista delantre ti mientres comes, imaxináivos ...

El pueblu  Famara namás tien carretera na cai principal, o quiciabes el restu soterréles el vientu, pero preparate pa caminar pol sable hasta llegar al restorán. Dafechu integráu na sablera, ello ye que lliteralmente ta enriba la mar, con una terraza trasera con unes vistes impresionantes. Amás, tien l'atractivu de tener un mural diseñáu por César Manrique y dellos cuadros d'él. Meses grandes, anque abondo apetiguñao. Suel tar llenu, asina que vos encamento encarecidamente acutar.

Comimos en plena hora punta dos persones na terraza un día de vientu. La xente acabó na terraza con cobertores (apurríes pol mesmu restorán), asina que si sois frioleros o fai enforma vientu, meyor qu'acutéis dientro. Los asturianos ... tábamos encantaos ellí fuera.

Un miércoles al mediudía n'Agostu. Xente a esgaya, demasiao. Y entá con tou, la calidá la cocina sigue siendo espectacular. Tien muncho méritu que nun baxaren nada la calidá, que sigan presentando igual de bien los platos, nun llocal plagao de turistes en chancles que vienen de la sablera. El moblame ye calidable y la decoración cuidada, nun ye'l típicu "sitiu playeru".

Como yera d'esperar, con esi llenu, el serviciu foi bastante llentu. Asina que, una vegada sirvíu'l vinu, relaxámonos y esfrutamos de les vistes.



Como aperitivu traxéronnos Mueyo Picón y Mueyo Verde con Pan Recién enfornáu. Mui ricu. Voló.

Ye un local que prautica la filosofía del Km0, y qu'amás apaez anguaño na guía Michelín como "Bib Gourmand", esto ye, locales qu'ufierten comida de la zona a bon preciu.



D'entrante animámonos con un platu local, y pidimos Calderín de Ropa Vieyo de Calamar, un cocíu canariu de garbanzos con calamar llimpiu, pataca y filantru. Mui ricu, con un llixeru toque picante que-y da la pimienta negra (como podéis comprobar, na isla son aficionáivos a la pimienta negra).

L'anterior vegada, pidimos Pulpu a la Plancha con Aceite de Pimentón, que ye ún de los platos estrella del llocal.

Como platos principales, pidimos Tartar d'Atún, fora de carta. Espectacular.

Y Tacos d'Atún con Mueyu de Soya, Piñones y Pases. Tamién perricu. El contraste cola piña ye xenial.

Los dos atunes bonísimos.

De postre, teníamos l'alcordanza de l'anterior vegada d'una de les meyores tartes de quesu que probáramos, y mira que probemos ... asina que nun duldamos en pidila. Quedaba una ración pequena, qu'esfrutamos igual que la primer vegada. Sobra la mermelada, quíta-y tol sabor. Faéime casu, pidíila.

Tamién pidimos Huevo Mole con Espluma de Gofio, que lleva prauticamente los mesmos ingredientes qu'el Tocinillu de Cielu, pero más cremosu. Mui ricu, una testura espectacular, duce y con sabor a gofio.

Pa beber, pidimos agua Vilas del Turbón y otra vegada Los Perdomos sobre Llixes. El nuesu vinu favorito la isla. Güel. Sabe. Per ricu.

Con cafés, pagamos 88,06€. Prácticamente'l mesmu preciu que fai 3 años.

Como podéis ver, una rellación calidá-preciu bien bona. Encamentaría visitávoslo si ye posible fora de temporada punta, vais esfrutalu muncho más. Y nel postrer terciu l'añu, el vientu ameyora.