I Xornaes de les Setes de Seronda - Taberna del Arco

Direición: Plaza de América, 6. Oviedo / Uviéu

Teléfonu: 985 255 522 / 985 255 544

Web: http://www.delarco.com/
Facebook: https://www.facebook.com/restaurantedelarco
Twitter: [@Rest_Del_Arco] https://twitter.com/rest_del_arco
Instagram:[@Rest_Del_Arco] http://www.instawebgram.com/i/rest_del_arco

Les setes tán poniéndose de moda n'Asturies, y nun lo dicimos nós, dizlo Antonio Celis, espertu micolóxico de l'Asociación La Pardina. Ayeri tuvimos ocasión de tener una llarga charra con él sobre l'apasionante mundiu les setes por por mor de les I Xornaes de les Setes la Seronda de la Taberna del Arco.

Siempres ye un placer que cuando nos conviden a unes xornaes, tengamos la ocasión d'afondar más sobre'l productu que vamos tastiar, y más d'una forma tan instructiva y amena como lo fixo Antonio. Esplicónos los prexuicios históricos que les naciones celtes tienen escontra les setes, yá que s'utilizaben pa los sos rituales máxicos y que por mor d'eso n'Asturies o Galicia apenes hai tradición culinaria con setes.

Afortunadamente l'enclín ta camudando y cada vegada hai más afición micolóxica n'Asturies, quiciabes porque ye ún de los territorios d'Europa con mayor variedá d'especies, más de 5000 gracies al clima y bayura de montes autóctonos (por favor, conservémoslos). Y gracies al trabayu de La Pardina y el restu d'asociaciones micolóxicas d'Asturies, yá s'entama en Somiedu un conceyu internacional sobre setes tolos años onde vienen espertos de too'l mundiu.

Tres la charra, pudimos tastiar el Menú pa dos persones que propón la Taberna del Arco, una auténtica maravía onde probar distintos sabores de setes maridaos con distintos sabores y testures. Un luxu.

Empezamos coles Croquetes de Setes, sedoses y con un puntazu de sabor a seta que nos prestó enforma. Ún de los favoritos de la nueche. Per riques.

Pastel de Níscalo "Lactariu Deliciosus" y Quesu de Cabra con Tostes de Pan, un gran pastel qu'amesta la potencia'l quesu cabra perfeutamente col sabor de la seta. Testura perfeuta que voló de la mesa.

Ensalada de Boletus "Edulis" con Vinagreta de Remolacha. Edulis a la plancha que cola remolacha na ensalada dan-y un toque bien allegre a la ensalada. Inclusive comentaba Antonio qu'encamenta cocinar la mayoría de les setes a la plancha y con aceite de xirasol pa nun matar el sabor de la seta.

Como platu principal traxéronnos una combinación de tres platos con distintes setes cocinaes de distinta manera pa poder apreciar sabores y testures, Níscalo ‘lactarius deliciosus’ con llangostinos y cruxientes de puerros, Pie azul ‘lepistanuda’ con zusmiu de gamba y pulpu y Capuchina ‘tricholoma portentosum’ confitada con tacu de bacaláu.

Deliciosa combinación, bien estudiada per parte La Tabierna del Arcu, yá que cada seta combina perfeutamente colos sos acompañantes en cada platu. Esplosiva lepistanuda en boca pa permediase perfeutamente cola gamba y el pulpu; suave combinación de la capuchina col bacaláu y perfeuta testura cruxente del Níscalo colos llagostinos y los puerros. Platazos.

Y p'acabar, la maravía de postre que nos presentaron: Trampantoxu de seta, con yogur, mangu, bizcuechu y una esponxa de pistachu xenial. Un postre que va pasar a la hestoria, impresionante, fechu na mesma Tabierna del Arcu (como'l restu de los postres, como tendría d'asoceder en toos). Buenísimu.

Aprovechái, que les Xornaes rematen el 30 de Payares y tán a un preciu más qu'algamadizu (26€ ensin bébora, menú pa 2 persones/preciu por persona).

Maridamos la cena con Marques de Arienzo Crianza y Agua Cabreiroá.