Maridaxe de Turrón de sidra y Sidra de Gala

Direición: Calle Llaviada, 10, 33011 Oviedo / Uviéu

Teléfonu: 984 08 38 34

Dexámosvos l'artículu publicáu na Revista La Sidra publicáu'l Mes d'Avientu. Toles semeyes del artículu son de  Lujo Semeyes.

Cola llegada de la dómina navidiega, la Sidra Asturiano afáyase como un perfeutu complementu pa los nuesos postres polo xeneral y turrones en particular. Ye tradición en tolos llares asturianos acompañar la Navidá de Sidra Espumoso, sobremanera, coles conocíes marques El Gaiteru o Norniella, disponibles en cualquier superficie comercial. Por eso, l'exerciciu que realizamos na Sidrería La Ferrería foi más qu'interesante ya que tuvimos la ocasión de probar distintos tipos de Sidra con unos turrones asturianos de peralta calidá.

Cuntar cola presencia de Jose Antonio Darriba, maestru chicolateru d'Obrador Monte Naranco, supunxo un lluxu non namás por poder probar de primera mano les sos maraviyoses creaciones, sinón por esplicanos y ayudar a valorar inda más si cabe'l so esceicional trabayu.

Pudimos probar el so Turrón de Trufa con Aguardiente de Sidra, Turrón de Mazapán de Sidra con Dulce de Mazana y los sos famosos Bombones de Sidra. Puru espectáculu visual y de sabor qu'espertó los emponderamientos de tolos asistentes. Espectacular trabayu d'Obrador Monte Naranco.

La idea del maridaxe yera combinar estes esquisiteces con dalgún de los productos premiaos nel SISGA 15 (Salón Internacional de les Sidres de Gala) entamáu pola Revista La Sidra con un xuráu de prestíu internacional.

Empezamos cola Sidra de Mesa, quiciabes a priori, la que menos combina colos postres. Tuvimos ocasión de probar Sidra Zythos Nueva Espresión (Llagar Herminio) y Zapica (Llagar Buznego). Una sidra más empobinada a aperitivos y pexes, ensin la potencia abonda pa compensar l'aporte de dulce que nos dan los turrones. D'ente los dos, na mesa destacó Zapica, sidra de mesa bien llograda, con presencia, golor y sabor que nos recuerda la gran evolución d'esti productu.

Siguimos con una Sidra Brut Nature Seca Vasca Byhur 24 (Llagar Astarbe), sidra espumoso ensin azucre residual con 24 meses de fermentadura na botella. Ye una sidra seco con un amargor a la fin pocu equilibráu. Más afayadiza pa platos principales que pa postres, anque sería interesante probalo con una brut nature más llograda.

Según vamos incrementando l'azucre na sidra, vamos averando a la combinación perfecta col sabor duce de los turrones. Una de les novedaes nel mercáu asturianu de los últimos años ye la Sidra Rosada. Sidra Espumoso con un color carauterísticu qu'apurren 3 meses de maceración cola mesma magaya de la mazana. Sabor muncho más afrutáu y dulce pa una bébora per curiosa pa los postres. Probemos Mayador Rosée (Llagar Mayador) y Pomar Rosée (Llagar Viuda de Angelón Pomar) . Na mesa, por presencia y sabor, gustónos más Pomar Rosée; sicasí, el golor resultónos más prestosu'l de Mayador. Una sidra que ta pegando bien fuerte en Suramérica y qu'esperemos trunfe tamién n'Asturies.

Siguimos con Sidra Espumoso Norciella (Llagar Macrile S.L.), una sidra conocida por toos, de venta en grandes superficies a un preciu realmente algamadizu. Sidra con demasiao azucre pal nuesu gustu, sabor bien duce pero que combina perbién colos turrones, sobremanera con esi mazapán qu'apurre un toque amargosu a la fin qu'oldea perfeutamente col azucre de la sidra.

Y acabamos con Sidra de Xelu Diamantes de Xelu (Llagar Viuda de Angelón Pomar), una pequena maravía fecha n'Asturies al estilu de la sidra de xelu quebequense, con una mayor graduación alcohólica (11,5º) que les anteriores, que compensa perfeutamente la concentración d'azucre. La mesa foi unánime y resultó clara ganadora pa combinala colos turrones. La so densidá, dulzor y elegancia, qu'en nengún momentu llega a empalagar, xuntu con un alcohol conteníu, faenla perfeuta pa cualquier tipu de postres.

Agradecer a los asistentes l'atención emprestada, al Jose Antonio de Obrador Monte Naranco la so clase maxistral, a la Sidrería La Ferrería la so acoyida y a la Revista La Sidra'l so enfotu.

Nome del Productu: Turrón de Viña, Turrón de Mazapán de Sidra con Dulce de Mazana y Bombones de Sidra. Empresa: Obrador Monte Naranco Nome del Productu: Sidra Zythos Nueva Espresión Empresa: Llagar Herminio Nome del Productu: Zapica Empresa: Llagar Buznego Nome del Productu: Byhur 24 Empresa: Llagar Astarbe Nome del Productu: Mayador Rosée Empresa: Llagar Mayador Nome del Productu: Pomar Rosée Empresa: Llagar Viuda de Angelón Pomar Nome del Productu: Norciella Empresa: Llagar Macrile S.L. Nome del Productu: Diamantes de Hielo Empresa: Llagar Viuda de Angelón Pomar Llugar: Sidrería La Ferrería (Uviéu) Fecha: 13-Payares-2015