Nueva visita: El Buchito

Direición: Dibujante Falo, Esquina Horacio Fernández - La Felguera - Langreo / Llangréu

Teléfonu: 984 182 669

Recomendaciones: Cachopu

https://www.facebook.com/vinacotecaelbuchito.langreo
Anterior Visita: http://www.lesfartures.com/2015/07/el-buchito.html

Calidá: 3/5

Preciu: 28€

Comentarios: Prometimos tornar al Buchito y volvimos, anque volvimos a dexanos seducir pol cachopu que tanto nos prestó. Y nun deceicionó.

El Buchito ye una vinatería que ta asitiada nuna zona sele de La Felguera, con una bona terraza y un parque en frente, perfeutu pa comer o tomase daqué mientres los crios xueguen. Dientro, el local ye pequenu, con una decoración bien cuidada, en madera avieyada. Meses y sielles distintes pa da-y un toque de decoración. Ambiente sele, anque la tele suel tar puesta y dacuando ye complicao caltener una conversación.

Cenamos 2 persones. Siempres tienen el detalle de traete un aperitivu mientres decides qué cenar. Nesta ocasión foi una Vichyssoise con Galleta d'Avena y Romeru. Bona (anque nun tenemos semeya d'ella).

La carta ye pequena, anque bien variada. Y la carta de vinos ye mui, mui completa. Eso sí, volvemos pecar de lo mesmo, munches DOs de distintes partes del mundu pero nenguna referencia asturiana. Una pena.

Pidimos una Ensalada de Bocarte con Tartar d'Aguacate, Mangu y Vinagreta de Cereces. Mui bona combinación acedu-dulce. Gustónos enforma.

El platu principal foi'l Cachopu, que tanto nos gustó l'anterior vegada. Cachopu de Xata Asturiana, con Xamón Ibéricu, Provolone y Espárragu. Vien acompañáu de mueyos y xelatines nuna pizarra que-y dan una presentación de 10 al platu. Per bon cachopu, rebozáu con Panko, pero ensin perder xugosidá en nengún momentu. Amás nun ye descomanáu, anque perfeutu pa dos con un entrante.

Rematamos con dos postres, Tocinillo de Cielu con Bola Xeláu, y la mayor esperta mundial en tocinillos quedó bien satisfecha. Nun ye'l meyor que probó, pero ta bonu. Asina pa los llambiones, yá sabéis. Y Crema de Turrón. Suave. Rica.

Pa beber dexamos encamentar pola casa y tomamos un Tempranillo Crianza Rivendel, Ribera de Duero. Ácidu qu'ameyora cuando alienda un pocu. Vinu de 18€.

Con cafés, pagamos 57,60€. 

Per bona opción si tas por La Felguera, un sitiu distintu y bien guapu.