Nueva Visita: Abrelatas

Direición: Ería del Hospital, 5 - La Pola Sieru

Teléfonu: 984 182 245

Recomendaciones: Menú Degustación

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelaTTas] https://twitter.com/abrelattas

Anterior Visita: http://www.lesfartures.com/2015/06/abrelatas.html

Calidá: 4/5

Comentarios:  El día qu'afayamos l'Abrelatas y a la so alma mater, Borja Alcázar, decidimos siguilos bien de cerca porque tábamos seguros que nos diben a dar munches allegríes. Equivocámonos abondo (bonu, tampoco tantu :)), pero esta vegada nun mos equivocamos un res.

Borja encabeza esta nueva xeneración de cocineros asturianos que vien emburriando con fuerza (agora mesmu tenemoslu como finalista nel Concursu Español de Pinchos de Valladolid al lláu de Pepe Ron (Restaurante Blanco), Daniel López (Blancu Restorán) y Álex Sampedro (Taberna Café Gijón)), qu'apuesta pol productu asturianu como base la so cocina y que tresmite una pasión ya ilusión en cada ún de los sos platos que nos maravía. Amás, agora llánzase a faer vinu.

Ta dándo-y una vuelta de tuerca a un futuru menú degustación y ufiertémonos ser les sos cobayes pa probalo. Una esperiencia maraviyosa en manes de Borja, con un feedback continuu sobre cada platu, aprendiendo, anovando, y sobremanera, esfrutando.

Entamamos.

Como aperitivu tráxonos unes Sardines del Cantábricu Marinaes con Cristales d'Oru Duce y Tartar de Tomate Selección. Xenial el toque duce de los "cristales d'oru" cola acidez de la sardina. Presentación de 10 pa 4 persones. Los cristales cruxientes, xeniales. El tartar tampoco se queda atrás, tomate natural asturianu del bonu.

Borja ye un gran almirador de Jose Antonio Campoviejo, notase en dalgún de los sos platos, y nun podíen faltar los sos Bombones de Chocolate Blancu, Cabrales y Compota de Mazana asada qu'apocayá comercializó'l cocineru xunto la empresa El Hórreo. Tán bien llograos, pero dempués de probar los orixinales nel El Corral del Indianu, nun los camudamos por nada del mundu.

Otru homenaxe a Campoviejo fueron los Macarrones de Compota de Chorizu Saludable y Almendra. Una presentación de 10 pa un aperitivu esceicional. Los Chorizos saludables son del Hórreo, y yá vos falamos d'ellos.Saben y güelen a chorizu pero na boca son muncho más suaves. Xeniales cola galleta.

Empezamos coles Entraes, Ensalada Caramelizada de Crema de Quesu de Cabra Artesanu, Ventresca de Bonitu del Norte, Kikos y Patates Paya. El puntazu de los kikos, que se punxeron tan de moda nes ensalaes nuna dómina, encántanos. El curru nel platu ye muncho mayor del que paez, col quesu de cabra endurecíu sobre la ventresca produciendo en boca un contraste xenial. Les boles d'aceite d'oliva nun son namás pa la semeya, ye un preste notar cómo esploten na boca.

Ún de los favoritos de la nueche fueron les Crestes de Gallu guisaes como Callos a l'Asturiana. Fascinante platu, contundente pero pa zucase los deos. Presentáu nuna mini cazuela, con un mueyu que va ser complicáu d'escaecer y unos cachos cruxientes de xamón y tenral que coles crestes fixeron que casi acabáramos el pan de lo que rellambimos. Platazu.

El Trémbole de Cañamina, Foie, Dulce de Figu y Mazana Fresca, vien presentáu nun tarru de yogur de cristal, con una base de cañamina y un amiestu percima que nos encantó. Quiciabes la base de cañamina ye demasiáu trupa y fai que lluza menos l'amiestu del foie, figu y mazana. Con un pelín menos, sería un entrante perfeutu. Gran contraste de sabores con una cañamina en forma de mousse bien suave. Foi'l platu que menos gustó na mesa.

Copa de Quesu del Duernu de Sariegu, Anchoa de Llanes, Mermelada de Piquillos y Vinagreta de Verdura Fresca. Otra de les estrelles de la nueche. La mermelada de piquillos va pasar a la hestoria, bonísima, con un toque picante que col quesu y l'anchoa ... xenial. Un platu frío pero enlleno matices.

La Tortiella cruxente de Maíz-Trifo con Virigüetos al Vapor y Refrescu de Llingua de Regaliz entra pol güeyu namás con ver la presentación. Un platu per orixinal, con una mini tortiella sobre una copa con un llíquidu de regaliz. La mini tortiella rica, cruxente, con un sabor a virigüetu qu'anubre tou. Y si mientres lu tas mazcando, das un tragu a la copa de regaliz .... t'aseguro que'l tiempu va recular y vas tornar a la infancia. Esplosión de regaliz na boca, trupu pero allegre. Maraviyosa combinación. Podría morrer nesa copa.

Inda nun empezamos colos platos y yá empezaben les fuerces a flaquiar.

De pescao, Borja tráinos Llombu de Salmonete d'Anzuelu del Cantábricu con amenorgamientu de Caldu de Cocíu y Arbeyos. Sabéis lo fans que somos de los salmonetes. Y estos taben fechos de lluxu, con un caldín impresionante. Un platu simple pero maraviyoso.

Un platu de transición escontra la carne, mar y monte (y asegúrovos que yá sudando), Monizuela de Patu Guisada y llixeramente glaseada al vinagre balsámicu de Jeréz, Reboluezos al ajillo y Caviar d'Oricios. Les monizueles delicioses, desfáense, con un mueyu fascinante, l'amiestu colos oricios ye bien resultón, anque quiciabes sabe abondo a oricios. Gran platu.

La carne, un platu tradicional, pero sabrosu. Y equí sí que llegamos pocos escoyíos, porque amás, como podéis comprobar na semeya, la zanca del pitu yera formosa, y daba pena dexar nel platu daqué tan sabrosu. Pitu Caleya guisáu al Estilu tradicional. Fascinante ye pocu. Pitu caleya de verdá, ¿eh?

Y llegamos a los postres, ensin apenes reserves, sufriendo y esfrutando con un menú variáu, gayoleru, y con una calidá maraviyosa.

Crema de Chocolate con falsu Caviar. Una tarrina de chocolate que pide a berros esi caviar pa oldear el sabor. Xenial combinación.

Más inda ... MiniChupaChups de Chocolate. Con rellenos variaos (Plátanu, Pepinillo en Vinagre, Sandía, Naranxa y Melón). Una presentación de lluxu, enllena de colores y per apetecibles. Tampoco pudimos aguantar a acabalos.

Gominola de Chocolate con Caviar de Tomate y Gominola de Chocolate con Fruta la Pasión, colos cafés ... fascinantes combinaciones los dos. Pero de verdá, yá tábamos pidiendo la hora.

Pa beber, Agua Borines y Vinu Blancu La Descarga de Cangas, de Bodegues Obanca. Un vinu qu'ameyora añeda a añeda, que güel y sabe, y qu'amás sabe perbién. Gústanos enforma.

Xenial Menú Degustación nel Abrelatas. Platos orixinales, gayoleros, con una base de productu asturianu tradicional calidable inmeyorable. Borja sabe lo que fai y llévanos a mundos maraviyosos partiendo siempres del país verde. Un par de meyores y esto va ser per gordu.