La Ruta

Señes: Camino Estación, 15 - Villalegre - Avilés

Teléfonu: 984 207 333

Web: http://www.sidrerialaruta.es/
Facebook:  https://www.facebook.com/SidreríaLaRuta

Calidá: 3/5
Preciu: 25€

Comentarios:  Villalegre quiza sía l'últimu sitiu sidreru n'Avilés. Nel centru la ciudá queden esvalixaes delles sidreríes equí y allá, pero na zona la estación de Renfe en Villalegre hai 4 o 5 sidreríes onde puede faese una ruta bien guapa, y amás, un gran aparcamientu.

A la cabeza d'elles siempres tuvo'l Yumay, pero al so alredor fueron abriendo sidreríes nueves con bones propuestes. Una de les más recién foi la Ruta, remocicada y con delles zones estremaes. Entrada preciosa, de chigre antiguu, con una zona de barra en piedra y ambiente escuro xenial. Preciosa pa tomase unos culetes o picar daqué rápido en cualesquier de les sos meses altes.

Tras, comedor pequenu y un pocu apetiguñáu, bien guapu decoráu en madera. Y yá saliendo de la casa, al mio entender, el so principal atractivu, una zona grande cerrada de terraza con meses, cubiertes y non, y una zona de barra. Meses grandes de tipu merenderu, y otres onde puedes comer. Si'l día ta bonu, ye una gociada tar ellí fuera tomando sidra.

Y asina nos coincidionos. Tomamos unes botellines fuera y darréu comimos n'una de les meses cubiertes, pero na mesma terraza. Acutái, porque fuimos un sábadu a la de comer y taba llenu.

Comimos 6 persones y compartimos platos al centru la mesa finando con una seleición de cachopos. Tienen bona carta de cachopos, y parrilla, anque nun la probemos.

Empezamos con Llonganiza Cocida con Pataques. Indispensable si tas per Avilés.

Calamares Frescos. Habíalos tamién conxelaos. Los frescos taben bien ricos.

Fritos de Pixín. Pequeños, pero bien de sabor.

Croquetes. Riques.

Y llegó la seleición de cachopos. Pidimos 3 pa compartir. El que más me prestó foi'l más raru, el de pasta filo. Los otros dos ricos, anque'l de picadiellu y cabrales pa mi taba demasiáu fuerte, pero na mesa gustó.

Cachopu de Xamón y Quesu

Cachopu de Secretu Ibéricu con Pasta Filo

Cachopu de Picadiellu y  Cabrales.

Nun llegamos al postre.

Pa beber, dalguna cerveza y Sidra Val de Boides, la DOP del Llagar Castañón, que ta realmente bona.

Pagamos 26€ per cabeza. Va haber que probra-yos la parrilla.