Bokaos con Sentimientu: Quesos Los Payuelos con Sidra Zapatero

LLAGAR ZAPATERO

Señes: La Riega, 7 - Nava

Teléfonu: 626512533

Web: http://sidrazapatero.es/
Facebook: https://www.facebook.com/sidra.mzapatero/

QUESOS LOS PAYUELOS

Señes: Prases - Corvera - Cantabria

Teléfonu: 942 410 156

Web: http://queserialospayuelos.es/
Facebook: https://www.facebook.com/queseria.lospayuelos/
Twitter: [@lospayuelos] https://twitter.com/lospayuelos

Volvió Bokaos con Sentimientu, y volvió a Nava. Averamos al Llagar Zapatero en plenu centru de Nava. Un llagar pequeñu, preciosu y tradicional. Perfeutu p'aprender el procesu d'ellaboración de la sidra. Y amás, nesta dómina, en plena actividá sidrera.

Elena recibiónos coles puertes abiertes, fía del famosu Manolo Zapatero, y agora propietaria del llagar. Y arrodiáos de barriques llenes de sidra, presentamos al so otru compañeru de la nueche, Fran Vázquez, de Quesería Los Payuelos.

Los Payuelos ye una quesería pequena y artesana asitiada na contorna que recibe'l mesmu nome, en Llión. Tien ganadería propia, y non cualesquier, yá que tien una de les ganaderíes d'oveyes más grandes de Llión. Namás utilicen lleche de la so ganadería, y producen quesos tantu de lleche pasteurizao como de lleche crudo. Tienen múltiples premios nos meyores concursos en dellos de los sos quesos.

Pero antes de ponenos en materia, y como tamos na dómina, empezamos con un pequeñu amagüestu, con sidra del duernu y unes castañes. La sidra duce ye ún de los manxares que pueden tomase, polo poco que dura y lo rica que ta, y más nun llagar en bona compañía.

Empezamos probando'l Quesu Tienro de Los Payuelos. 20 díes de maduración de lleche pasteurizao. Suave y cremosu y perfeutu p'acompañar con ensalaes.

Siguimos con un quesu Semicuriáu de 2 meses de maduración en cámara, de lleche crudo d'oveya. Xenial ver cómo'l quesu va evolucionando, y los contrastes que se producen ente'l centru del quesu y la zona la corteza (que tamién se come).

Probemos el mesmu quesu, pero con 6 meses de maduración. Un quesu más rico, cola mesma testura maraviyosa y con munchos más matices. Tamién de lleche crudo d'oveya.

Y llegamos a la xoya la corona. Los sos quesos Curaos. Amás, fiximos un esperimentu curiosu que vais ver en poques ocasiones. Fran tráxonos el mesmu quesu, con 3 díes de diferencia, con 1 añu y 1 mes de maduración, pero ún ellaboráu a partir de lleche pasteurizao y otru con lleche crudo.

La diferencia nótase. El quesu pasteurizao aseméyase más al sabor clásico de quesos curaos manchegos, y nel de lleche crudo vense les particularidaes qu'apurre la carga bacteriana d'esta lleche, y fai d'él un quesu más singular, inclusive con un toque picante. El de lleche pasteurizao ye más "algamadizo" yál de lleche crudo apurre más matices. Caúnu tien el so momentu.

Y acabamos con una prueba que tán faciendo. Un Quesu Azul de lleche pasteurizao. Por eso los eventos de Bokaos siempres son especiales, porque se xenera l'ambiente necesariu pa qu'un ellaborador, a pesar de tener un productu inda en fase esperimental, traigalo a probar pa qu'opinemos sobre él.

Siempres deprendiendo.

Tou ello cola continua compañía de los culetes de Sidra Zapatero. Un llagar que nunca defrauda. Producción pequena-media, unos 300000l, pero con un sabor siempres a nivel alto. Cuesta atopala, pero paga la pena dir a una sidrería que la tenga. Colos quesos, amás, portóse xenial. Col quesu azul, volvimos a la sidra del duerno y claramente foi la combinación ganadora.

Una velada prestosa, aprendiendo de sidra y quesos, nun ambiente xenial. Munches gracies a tolos qu'averastis al llagar, anque'l día nun acompañaba, a los mios compañeros de Bokaos Roberto, d'Aramburu y Aitor d'Esclusivas Vega; y, sobremanera, a Elena del Llagar Zapatero y a Fran de Quesos Los Payuelos.