Teléfonu: 984 840 684
Instagram: [@laleyendadelgallo] https://www.instagram.com/laleyendadelgallo
¿Cenar con güisqui xaponés? A priori la idea paecía una llocura. N'Asturies bebemos güisqui antes o dempués, pero non mientres la cena, y menos solu, y menos inda si ye un gran desconocíu como'l güisqui xaponés.
Pero La Leyenda del Gallo, una vegada más, nun falla, y treslladónos en mente y espíritu al llonxanu Xapón nuna cena memorable. Arriesgándose, ufiertando coses distintes y trunfando. Tou un aciertu.
Yá sabéis qu'ún de los puntos fuertes del llocal ye la coctelería, y punximonos en manes d'Ana Suárez (recién ganadora de les semifinales del Beefeater Mildn 2016 de la zona norte) pa tomar una adautación del Boulevardier, pero camudando'l bourbon por güisqui xaponés, mientres esperábamos a cenar. La cosa entamaba bien.
Yá na mesa, cuntamos cola presencia de Nacho Cuevas d'I+Drink, como maestru ceremonies, que nos esplicó la hestoria del güisqui xaponés y presentónos los güisquis yá'l so maridaxe colos platos que diseñó Ruben Morán na cocina.
El boom del güisqui xaponés empezó va unos años cuando'l so buque insinia Yamakazi, de la casa Suntory, ganó'l Premiu al Meyor Güisqui del Mundu, hasta entós namás acutáu a güisquis escoceses. Pero Xapón yá llevaba dende los años 20 produciendo güisqui y buscando la perfección nellos. Ello ye que les condiciones de Xapón pa ellaborar güisqui, por clima, calidá de l'agua y avieyamientu en carbayu xaponés, son esceicionales pa llograr un güisqui con unos matices dafechu distintos al restu del mundu. Ye un güisqui más nidio, más elegante y más bebible pa los non avezaos.
De aperitivu traxéronnos una Crema de Quesu con Cenahoria, Sal y Parmesano.
Empezamos la cena cola presentación de Yamakazi, quiciabes el güisqui xaponés más famosu polos premios que vos comentamos antes. Un Single Malt, que recuerda llixeramente a Escocia, con un toque floral importante. Na boca ye un güisqui elegante, qu'entra solu pero que dexa un sabor intenso.
P'acompañalo, Fondu del Mar Marín. Platu pa tomar en fríu con Algues, Navayes, Noodles, Llagostinos y Virigüetos. A priori podría paecer que'l güisqui mataría'l platu, pero la combinación ye perfeuta. Güeyos abiertos en mesa, sorpresa mayúscula y empezamos a creenos qu'esto del güisqui y la cocina pueden ser un gran descubrimientu.
Pasamos a la xoya la corona, el güisqui supremo que nos namoró a toos pola so elegancia y sabor, Hibiki Japanese Harmony ye un blend de güisqui de malta y granu. Notes de cítricos de primeres, que pasen a arándanos coloraos y cereces, p'acabar con dalguna nota de cacáu o chocolate. Mui sutil, elegante, sedosu ... una maravía. Sabor artesanal con una botella preciosa que simboliza les 24 estaciones del calendariu llunar xaponés y l'etiqueta pegada a mano. Ye más llargu na boca qu'el Yamakazi, pero tamién más bono de beber. Inclusive puede ser peligrosu.
Combinar con un Tataki d'Atún Coloráu, Lulo y Teriyaki. Los toques marín y salín van xenial col güisqui. Ensin dulda, el descubrimientu de la nueche. Harmonía.
Siguimos con Hakushu, otru Single Malt con un toque llixeramente afumáu. Tien un toque de turba que ye daqué bien raru pa Xapón. Entra con notes yerbales, fresques y hasta cítriques; y acaba llargu y un pocu astrinxente. El so final nun ye tan llargu como los dos anteriores, pero da más potencia na boca.
Y esa potencia precisamente ye la que precisen los Baos de Carrillera Ibérica con Mueyo Nippon. Tien un toque picante que pide a berros siguir bebiendo Hakushu.
Acabamos con un coctail fechu por Ana Suárez, un Hibiki Bajiru. Cóctel que lleva Hibiki, agua de cocu, llima, sirope de yuzu, albahaca, llicor de té y bergamota. Buenísimo.
Y de postre, Cheese Cake ente Tokio y New York. Una tarta de quesu con tofu, cereces y chocolate.
Como veis espectacular maridaxe. Mui sorprendente, distintu y que, anque nun lo creíamos de primeres, funcionó a la perfección. Xenial Ana colos sos cócteles, Nacho cola so presentación, Rubén colos sos fogones, Magoya y Juan de Maxxium España y la xente de La Leyenda apostando por maridaxes sorprendentes y distintos.
No hay comentarios
Publicar un comentario