Nueva visita: Restaurante (Hotel) Cabo Vidio

Direición: Oviñana, Cudillero / Cuideiru

Teléfonu: 985 59 61 12

Web:  http://cabovidio.com/restaurante-cabo-vidio/

Facebook:  https://www.facebook.com/hotelrestaurantecabovidio

Twitter: [ @Cabo_Vidio ] https://twitter.com/Cabo_Vidio

Visita anterior: http://www.lesfartures.com/2015/07/cabo-vidio.html

Calidá: 4/5

Preciu: 45€

Nesta entrada vamos cuntar amás de nuesa esperiencia gastronómica, lo que foi una escapada de fin de selmana na que pasamos 2 nueches nesti pequenu Hotel y Restorán d'Ouviñana.

Na visita anterior  fuéramos namás a comer, pero gustónos tantu, qu'esta vegada fuimos más allá.

Siendo yá ochobre terminó la temporada alta, y más n'Asturies, y atopamos con que teníamos l'hotel práuticamente pa nós solos. Habitaciones rústiques con una decoración detallista, toques modernos, y vistes al monte. Un llugar ideal pa desconectar.

Na planta baxa, el restorán con una barra, una estancia que nun ye mui grande y grandes cristaleres con accesu a un pequenu xardín preciosu, con meses y sielles de madera en dellos colores.

Perbién decoráu, con una gran mesa central con productos de temporada.

Equí cenamos ya xintamos dos mañanes. Un almuerzu simple pero esquisitu. Café o té y zusmiu de naranxa recién estrumíu, con unes tostaes de pan rústicu y unes freses cola so almibre'l primer día y una mermelada casera con frutes recién recoyíes por ellos mesmos el segundu. Amás, un bizcuechu caseru deliciosu. Amás de la tranquilidá, les vistes al xardín y l'atención y compañía de Jairo y Loreto, ún ta como na casa.

Enfótense de que to estancia, y la cena nel nuesu casu, sía toa una esperiencia nel so conxuntu pa quién los visita. Cuntáronnos con pasión cómo lo qu'intenten ye que quién los visita nun vaya namás a comer o dormir, sinón a esfrutar de tolo que pueden ufiertar como la tranquilidá, les vistes, la llocalización, el productu la zona, los vinos, la preparación…

Yá na cena, empezamos con una Mantequilla d'Anchoa, como cortesía que taba per suave, col toque bien sutil de l'anchoa:

Tamién punxeron un Clin de Gazpachu que va perbién pa dir abriendo boca:

Como siempres nos presta probar dellos platos, pidimos Media ración de Pastel de Centollu. Taba espectacular. Enxamás probáramos un pastel d'esti tipu con tanta suavidá y cremosidá. De diez:

Siguimos col Foie a la Plancha caramelizáu, con sal de Hawai, de color negru, que-y daba un toque a carbonizáu que llama l'atención. La capa caramelizada del foie yera un espectáculu, y la so combinación col sal, ya'l conxuntu ye d'escándalu:

Como platu principal, Xargu a la Plancha. Ye un pexe que tienen en carta con mínimu de 2 raciones. Presentáronnos esta maravía. Dos pieces espectaculares. Si hai daqué de la zona, y frescu, ye esto. El pexe ya'l puntu perfeutu, nun fai falta más. Puru Cantábricu…

Y pa terminar, Xeláu de Requesón. Qué gran platu duce p'acabar con daqué refrescante. Les boles de xeláu d'una sotileza terrible diben desfaciéndose y entemeciendo cola crema de frutos coloraos, el finu sabor a requesón…una maravía…pa probar sí o sí…

Amás, traxéronnos un cachu de Tarta de Quesu con Mermelada de Mazana qu'encamentaren y que taba recién fecha. Nun la pidiéramos porque yá nun podíamos más, pero sorprendiónos que nun yera nada empalagosa, y amás suave. Asina qu'a la fin terminamos los 2 postres. La mermelada de mazana taba increíble, con un sabor que da la impresión de tar comiendo esactamente una mazana recién asada. La tarta merez una visita por sigo mesma. Probemos munches tartes de quesu en munchos restoranes, pero esta…pa probar tamién o tamién…

Tomamos una botella de blancu, un Fransola de Bodega Torres. Un blancu persuave qu'encamentaron al pidir el blancu de Cangas que taba escosu. Y ye que dafechu topamos con un restorán que n'anterior visita nun teníen nenguna referencia de Cangas y qu'agora yá les incorporaron. Amás con muncho ésitu, y asitiándoles nun sitio destacáu na carta. Asina los turistes anímense a probar el productu la zona y comprueben que n'Asturies hai tamién bon vinu. Sobremanera'l blancu, y darréu escósase…Xenial!!!!

El total de la cena foi d'unos 90€, que con un vinu de 23€, el pexe que se ve nes semeyes y demás platos, ta perbién pa la calidá, el tratu y l'esperiencia nel so conxuntu.


Asina qu'esfrutamos d'una estancia con habitación, almuerzos y cena espectaculares, y tenemos qu'agradecer a Jairo y Loreto el so tratu cercanu y el que te faigan sentir tan a gustu na so casa. Tornaremos!!!