Llagar Casa Fran

Direición:  Avenida Conde Santa Barbara, nº 37. Llugones. Asturies
Teléfono: 985 26 00 74

Facebook: https://www.facebook.com/pages/Llagar-Casa-Fran/166433386726227?fref=ts
WEB: http://www.sidrafran.es/

Calidá: 3/5

Preciu: 20 €

Comentarios: Llagar allugáu en Llugones dende 1918. Ellaboren dos tipos de sidra, Sidra Fran y la so denominación d'orixe Ramos del Valle, bien riques, la sidra Ramos del Valle foi concedida col Premiu a Meyor Sidra d'Asturies 2013 nel Festival de Nava.

Ye un llugar que personalmente conozo dende va munchos años pero nun m'averaba a picotiar daqué dende cuantayá,  asina qu'aprovechamos que yeren fiestes en Llugones y averamos unos cuantos amigos a tomar sidra y cenar un pocu p'aforrar bien.

Pidimos unes cuantes tapes pa compartir y acompañar a la so Sidra Fran. Ente elles destaquen les croquetes bien cremoses y con una testura perfeuta y la tortiella que taba per sabrosa.

Tamién acompañamos con unos calamares frescos, unos chipirones, pitu al ayu y chorizos a la sidra. Tou correutu y bonu, anque personalmente prestáronme más les croquetes y la tortiella.

De siguío pasamos a los postres caseros que son los otros trunfadores de la nueche, yo decidíme por un Arroz con Lleche casero que taba coyonudu, mientres el restu los comensales decatáronse pola Tarta de Quesu de la que comentaron que taba rica, dalgún comento que de les meyores que probara.

Pa rematar los cafés y los clines pa faer meyor la dixestión.  Tou esto salio a unos 18 euros per persona, teniendo en cuenta qu'antes de cenar yá tomáramos dalguna sidra y la cantidá de comida ye un preciu bien algamadizu.

En definitiva ye un sitiu bien recomendable si queréis tomavos una bona sidra y tapear daqué p'acompañar.