Nueva Visita: Lagomar

Direición: C/Los Loros, 2 - Nazaret - Lanzarote 

Teléfonu: 928 845 665

http://www.lag-o-mar.com/

Anterior Entrada: http://www.lesfartures.com/2012/11/lagomar.html

Calidá: 2/5

Preciu: 40€

Comentarios: Cómo estrozar un restorán cuando lo ties tou pa ser el sitiu perfeutu. En 2012 visitamos Lagomar y quedamos maraviaos, tantu pola redolada, pola casa y, tamién, pola comida.

Esta vegada, volvemos dafechu deceicionaos. Nun sé si sería una mala nueche o que camudaron de dueños. La cuestión ye qu'esa redolada merezse un restorán al altor, y más cuando lu vienden d'alta cocina.

Nazaret ta asitiáu nun altu la isla, dende onde tienes unes vistes prestoses, anque escaecesles nel intre qu'entres en Lagomar. Escavada na roca, integrada nuna cueva ... una espectacular casa concebida por César Manrique y diseñada por Jesús Soto. Nos 70, el famosu actor Omar Sharif namorase de la casa y mercala pa darréu perdela nuna partida de Bridge. Enllena de rincones ocultos, la opción de visitar el muséu y tomase una copa nel atapecer ye dafechu recomendable. La cena, yá non.

El restorán ye preciosu, meses pequenes, y un pocu apetiguñaes dependiendo en qué zona teas. Les parés son roca de la cueva y ábrese una espectacular cristalera con vistes a la piscina que preside la casa. Redolada maraviyosa.

Como aperitivu traxéronnos Mantequilla de Curry y Naranxa, Aceite y Escames de Sal con distintos Panes (Tomate, Quesu, Cebolla, Normal y Aceituna) recién enfornaos. Ensin dulda, lo meyor de la cena. El pan bien bono y la mantequilla de naranxa xenial. Anque'l restu tamién nos prestó. L'aceite foi lo que nos paeció más "normal".

D'entrante pidimos Panaché de Verdures de Temporada a la Plancha, veníamos de comer n'El Risco y nun tábamos preparar para daqué contundente. Vien con aliñu de vinagreta de tomate. Dafechu insípidu, con un alliñu insuficiente. La verdura fresca.

De platos pidimos, Milfueyes de Bacaláu, Cogordes y Gambes Salteae con Mueyo Picón. Platu ensin nengún sentíu, el picante del mueyo mátalu dafechu, nun sabe a otra cosa. Amás, resulta un conglomerao de coses dixebraes ensin sentíu nengunu ente sigo.

Sollombu de Cremosa de Foie Gras y Cogordes, otra decepción. Carne malo. Pidila al puntu y traenla pasada dafechu ... un desastre de platu.

Llevábamos un entrante normal y dos principales malos.

Ponemonos a atacar los postres ya indíquennos que namás-yos queden el Brownie y la Copa de Freses con Nata.  Asina que pasamos direutamente a los cafés.

Pidimos un cortao y un café con lleche. El cortao ye un café con lleche y el café con lleche un café medianu.

Pa beber, probemos un vinu que desconocíamos, y qu'amás nos encamentaron los camareros, Vinu la Florida, de la isla. Un vinu normal que güel más que sabe, vien con un posu considerable que podíen decantianos.

Pagamos 82,39€. Comida deceicionante n'ún de los sitios más espectaculares de la isla. Una pena.