La Cofradía


Direciión: El Muelle, S/N - Puerto de Vega / Veiga
Teléfonu: 985 648 489



Recomendaciones: Mariscos y Arroz con Bugre


https://www.facebook.com/RestauranteLaCofradiaPuertoDeVega


Calidá: 3/5
Preciu: 45€


Comentarios:  Veiga (o Puertu de Vega) ye un preciosu pueblu marineru asitiáu ente L.luarca y Navia. Imprescindible visitalu si tas de turismu peles nueses tierres y más cuando'l día acompaña. Ye pequenu, pero famosu pola so ufierta gastronómica, asina que cuando t'animes a dir, lo meyor que puedes faer ye acutar con antelación si nun quies llevate sorpreses.


Nesta ocasión fuimos danos un homenaxe a La Cofradía, llocal preciosu asitiáu n'Antigua Cofradía de Pescadores del Puertu, nel mesmu puertu. De fechu p'aportar a él lo más habitual ye que tengas que cruciar pol mesmu puertu mientres empapes del ambiente marinero. Yá taba claro que carne nun díbamos tomar, y repitimoslo dempués d'aportar al local. Preciosa decoración marinera, con toques vintage (pizarres, maderes, dalgún palé ...), bien cuidada. Zona de barra grande dixebrada de la zona de comedor por una paré de madera. Un par de meses privilexaes tienen unes vistes espectaculares al puertu. Cómese bien y con espaciu, a pesar del trasiegu de xente y camareros. Bon sitiu.



Diba a lo que diba, asina que según llegué y sentéme, pidí un Bugre a la Plancha. Amás, antes de cocinalo, traxéronme al amigu nuna bandexa pa que-y diera'l vistu bonu. Bon bichu, con un tamañu perfectu pa 1 persona. Perbién cocinao, nel so puntu perfeutu, salvo una tenaza que taba casi cruda. El cocineru salió a indicanos que yera Bugre de la zona, y que lo habitual n'otros sitios yera traelo de fora. Sía como fora, taba espectacular. Xugoso. Sublime. 


Pasélo como los indios hasta que nun quedó nada.

 

Tamién pidimos unos Calamares na so Tinta con Arroz Blancu, un platu normal y corriente que nun diz nada. L'arroz floxu y los calamares bastante insípidos.


De postres, pidimos Tocinillu de Cielu de Palper. Una auténtica maravía del cielu. Si nun conocéis Palper, en Grao yá táis tardando en dir. Maraviyosu.


Yo cisqué una Mousse de Turrón Caseru, suave y ricu, anque nun namora..


Bona carta de vinos, con referencies a vinu y sidra de mesa asturiana. Pa la ocasión escoyemos un Pazo de Señorans, a 15€, más baratu de lo que solemos ver perhí. Perricu como siempres.


El Bugre indicáronnos que costaba 36€/Quilu. Según la nota, el que comí pesaba 1,1K y cobráronnos igualmente 36€. Bon detalle.


Ye un 3 tirando a 4. O un 4 tirando a 3. Habría que probar pexe pa poder opinar con más criteriu. El bugre taba espectacular, pero los calamares, regulares. Repetiremos.

0 comentarios :

Publicar un comentario