Nueva Visita: Del Blanco al Tinto

Direición: Calle San Agustín 8, Xixón

Teléfonu: 984 83 96 38

Web: http://www.delblancoaltinto.es/
Facebook: https://www.facebook.com/delblancoaltinto?rf=174371315962288
Twitter: [ @dbtgijon ] https://twitter.com/dbtgijon

Visita anterior: http://www.lesfartures.com/2015/06/del-blanco-al-tinto.html

Calidá: 4/5

Preciu: 35€

Volvemos dempués de dellos meses a esti DBT que tanto prestó la primer vegada, y qu'entá más nos prestó ésta.

Sospriéndenos, y pa bien, un cambéu de carta. Munchos platos pa compartir. Y munchos platos sorprendentes en nome que nos faen duldar a la hora pidir porque apetez tou.


Bien asesoraos, decidimos por 3 d'ellos. Tou pa compartir.

Son espertos en vinu y pueden asesorar perbien, pero tenemos claro que, allá onde hai bones variedaes asturianes, solemos faer país. Y más si tienen esti recién salíu Nibias Nº 4, DO de Cangas, cultiváu n'Ibias. De la bodega Chacón Bueltas. Un Albarín blancu presentáu'l día d'Asturies y que naide pudo abrir hasta entós por pidimientu espresu de la bodega.

Gustónos enforma, y acompañó a la perfección a tolos platos. Asina que, a la hora d'ellaborar cartes de vinu, deberíen nesta tierra apostar por estos productos que tenemos de tanta calidá y que tan apreciaos son fora como desconocíos equí. Y tendríen d'apaecer de primeres nes cartes, como asocede n'otres partes…


Bien por esti DBT que yá disponía d'esta maravía:

Dicir que tuvimos mui a gustu nun local que nos encanta tocantes a decoración y distribución. Amás, col plus de meses redondes pa más comensales, daqué que siempres s'agradez.

Como cortesía, unos Clines de Sopa de Melón con Grana d'Amapola. Ricu y perfeutu pa dir abriendo apetitu:

Empezamos con unes Piruletes de Calamar en Clin d'Ayuperexil. Un pelín complicao de comer, porque'l calamar queda un pocu pegáu al palu, pero'l puntu yera perfectu, y el rollu de moyar nel clin pa dir alliñando cada mordigañu da-y un puntu gayoleru. A la fin, y como bien nos dicíen al sirvinos, barquinos de pan nesi ayuperexil que se fai querer…

“Nuestra” Terrina de Pitu Caleya con pan de Chile y Xelé de tintu de Cangas. De nuevu apostando pol productu local. Bien. Y perbién esti platu distintu. Bonos acompañamientos pa una terrina de pitu que podría resultar daqué ensuga pero que, en xunto, termina per ser un platu sabrosu:

Sollombu de Güe al Foie, Llárima de Mazana Verde y Cruxente de Yuca. Platazu. Carne al puntu perfeuto. Mueyu del que nun quedó gota, y una yuca que nos llamó l'atención porque resulta bien cruxente y de sabor nidiu, siendo meyor acompañamientu que la clásiques pataques frites:

Terminamos con Chocopasión (Xeláu de Yogur sobre crema de Maracuyá y Chocolate Blancu).  El chocolate blancu apenes s'aprecia pero apurre dulzor. El conxuntu ye un postre espectacular. Perfeuta combinación de sabores y llixeru, lo que s'agradez dempués de lo qu'hubo…

Tou ello saliónos por 73€, con un vinu de 18€.

Ensin dulda, ta convirtiéndose nun imprescindible. Vamos volver porque echamos el güeyu a munches coses por probar entá…