Casa Néstor

PESLLÁU


Direición: Calle Conde del Real Agrado, 6 - Lluanco / Luanco
Teléfonu: 985 880 315



Recomendaciones: Pexe



Webhttp://www.restaurantecasanestor.com/
Facebook: https://es-es.facebook.com/restaurantecasanestor



Calidá: 4/5



Comentarios:  Casa Néstor ye un clásicu de siempre en Lluanco. Va unos meses camudó de dueños y fuimos comprobar que sigui ufiertando'l mesmu productu calidable de siempre.

Asitiáu nuna cai cerca'l mar (anque nun se vea), tien una zona amplia de barra, pa poder tomase daqué, antes y dempués de la comida. Al fondu, ábrese un ampliu comedor, ya inclusive tien otru comedor (más pequenu) nun apartáu reservao. Llocal grande, con parés en blancu y lluminosu. Meses amplies y separaes pa poder esfrutar de la comida.

La carta básase preferentemente en productos de la mar, nun ye baratu, pero los productos y ellaboración ye de primera.



Empezamos con unes Zamburiñes a la Plancha perfeutes. Bon tamañu de la zamburiña y bona ración. Feches a la manera clásica, con un pocu d'ayu y aceite.


Siguimos con una Brandada de Bacaláu, fecha al fornu, con una base de pataca ya'l bacaláu presidiendo'l platu. Bona ración, con un bacaláu suave y una testura perfeuta.


Los Calamares de Potera na so Tinta, fueron una de les estrelles de la nueche. Sublimes. Suaves, con un bon caldu pa moyar. Van pasar a la posteridá, si vais, nun dudéis en pidilos. Sobremanera, nótase que son frescos y de bona calidá. Amás, la ración ye bien arrogante.


Acompañalos una bandexa de pataques frites. Pero de les bones.


Como platu principal, traxéronnos un Cachopu de Merluza, buenísimo tamién. Platu clásicu pero d'ellaboración perfeuta. Conxuntu equilibráu, con un mueyu buenísimo,


Vien con unes pataques cocíes, un llagostín "de verdá", y unes amasueles d'eses que se merecen un platu pa elles soles.


Acabamos con unos postres variaos, toos caseros: Tarta de Quesu, Flan Caseru, Mazana Asada y Compota de Mazana. Ricos, anque yá casi nun teníamos sitiu pa namás. Quiciabes foi lo que menos nos namoró de la cena.

Cocina marinera clásica, con productu calidable que respuende por si solu. Sitiu elegante, con una decoración cuidada.


Pa beber, dos albariños: Davide 2012, con una escelente añeda.


Anque la trunfada de la nueche llevóla l'Albariño do Ferreiro. Magnifico. Potente pero elegante. Gran vinu.


Na so carta de vinos, namás clásicos. Nenguna referencia a Sidra Asturiano (perfeuta pa esti tipu de cocina nes sos variedaes de mesa o Brut Nature) o Vinos Asturianos. Daqué ensin dulda, a meyorar.

Comentáronnos qu'agora pel hibiernu namás abren les fines de selmana. Asina que meyor llamar ya informase bien antes d'aventurase a dir.

Siempres ye un luxu compartir mesa con compañeros blogueros a los qu'almires, como Ruben de Omacatladas, Marta y Noe de Empachate y Olalla de A Buen Bocado. Un placer como siempres.

0 comentarios :

Publicar un comentario