Farturruta de Celoriu a Po comiendo en Rocamar

Señes: Playa de Po - Llanes

Teléfonu: 985 401 213

Calidá: 3/5
Preciu: 20€

Web: https://www.llaneshotelrocamar.com/

Facebook: https://www.facebook.com/hotelrestaurante.rocamar

Comentarios: La Sienda Costera de Llanes ye preciosa, tien rincones daveres espectaculares, con sableres paradisiaques, cantiles de vértigu y si das la vuelta, la Sierra'l Cuera a un pasu. Un paisaxe incomparable que bien merez una Farturruta. Yá vos enseñamos parte la sienda cuando vos llevamos al Cobiḥeru. Y güei enseñámosvos otra parte la mesma sienda. Encamentamos faévosla fora de temporada de branu pa evitar masificaciones. 

Vamos dir dende la Sablera de Celoriu a la Sablera de Po. Vamos Comer na Sablera de Po y vamos volver caminando hasta'l puntu d'entamu. En total son unos 6kms (día y vuelta), ensin desnivel, yá que tamos a nivel del mar. Tiempu caminando son unes 2h. Lo único qu'hai que tener procuru ye colos cantiles y zones averaes al mar. Pero ye una ruta pa faer con tola familia.

Empezamos en Celoriu, onde ta'l Castru Gaiteru, ún de los nuesos restoranes favoritos (ye otra opción más pa comer na Farturruta). Nel mesmu pueblu ta la Sablera de Palombina, puntu d'entamu de la ruta. Na mesma sablera tenéis zona p'aparcar.

Na zona de la derecha la sablera, tenemos el cartelu d'entamu la ruta.

La Sablera, en marea baxa, coneuta cola sablera de Las Cámaras y la de los Flaires (llamada asina porque yera onde baxaben a bañase los flaires), anque tamién se comenta que toa l'arenal ye la Palombina.

Na Sablera los Flaires atopamos el Monesteriu de San Salvador de Celoriu. Fundáu nel SXI y acoyendo a monxos benedictinos. Na so base podéis ver la Torre Románica de Revellín, parte de les defenses del propiu conventu frente a les invasiones normandes. Tenéis un mirador preciosu ente les playes pa ver tola panorámica, incluyíu'l Castru Gaiteru.

Monesterios y torres medievales a pie de sablera ... ¿Cuántos sitios tienen estes ayalgues?

Salimos de Celoriu y vamos direición Po.

La ruta faise por una sienda marcada, ensin perda posible y con tramos pegaos al cantil y otros ente praos pa usu ganaderu. Una preciosidá de principiu a fin.

Travesando los praos, vense la sablera de Nixón  y La Penal. Que namás son accesibles cola marea baxo. Famoses pela so acumulación d'ocle. La semeya correspuende a la siguiente sablera, la de Samartín.

Al poco llegamos a la Sablera de Samartín.

Xusto al lao, tán les ruines de la Ermita de Samartín. Tamién d'orixe medieval. Y con unes vistes espectaculares.

Dende la Ermita, l'impresionante Castru Samartín.

Continua la Sablera de Samartín. Preciosa. Como interés, en baxamar, puede vese cómo brota agua del sable la sablera. ye agua duce soterraña.

Decidimos nun volver a la sienda costera, y travesar lo que pudiéramos hasta la siguiente sablera. Pero'l camín ta tomáu. Meyor volver pola sienda costera.

Llegamos a la Sablera de Portiellu o Portiellu de Samartín. Daveres espectacular. El camín costeru bordia la sablera y va xubiendo hasta tener les vistes que véis.

A la derecha, veis L'Almenada, tamién conocia como La Isla. Tien una sablera preciosa.

Namás queda siguir baxando de mano a atopar Po.

Y si asomamos un poco, amás de ver la sablera y el pueblu, vemos l'Hotel-Restorán Rocamar. El sitiu onde vamos comer. Prúi, ¿eh?

Llegamos a Po, un pueblín bien guapu, onde podéis parar a tomar daqué.

Nós averamos a la Sablera de Po, que ye onde ta'l restorán onde vamos comer.

La sablera ye espectacular. Y si pilláismarea baxo tien un arenal en forma d'embudu, ya inclusive si nun la bordeais, nun vais ver la mar.

Pero paga la pena averase.

Sicasí, si esperáis a la pleamar, la sablera forma una especie de piscina natural perfecta pa los guaḥes

Pa comer, pidimos la mesa del fondu de la terraza, debaxo d'unos árboles. Y ye daveres espectacular. Tranquilidá, viendo la sablera ... impresionante. Tien una terraza enorme.

Pedimos Arroz con Mariscu. Rico. 

Natiellas. Riques. 

Flan de Tarta de Quesu. Gustonos. 

Pa beber, botelles de Sidra Cortina. Yéramos 7 pa comer, y salimos a 20€ per cabeza. Eso sí, comer con estes vistes, nun tien preciu.

Sableres, montaña, cantiles, monesterios, torres y ermites medievales y acabando a comer nun sitiu paradisiacu al pie d'una sablera. Una farturruta bien fácilina pa tola familia.