Farturruta De Riodeporcos a Sena xintando en Casa Marta

Señes: Sena - Ibias
Teléfonu: 985 815 308

Calidá: 4/5
Preciu: 16€

Facebook: https://www.facebook.com/pages/Cantina-Sena/108687112617907

Comentarios: Imaxínate un pueblu al que namás pues llegar travesando una ponte colgante dende Galicia. Güei empezamos la Farturruta nun sitiu máxicu, RiodePorcos. Un pueblu preciosu casi abandonáu al que s'apuerta cruciando'l Ríu Navia, con unes vistes espectaculares.

La Farturruta ye d'unos 6kms, NUN TA INDICADA (anque siguiendo les mios indicaciones, nun tien perda), faese por una pista ancha, tien unes vistes espectaculares y va llevanos al pueblu de Sena, onde vais comer un menú increíble de matanza propia en Casa Marta por namás 16€.

Tien unos 400m de desnivel, llevaderos. Y tardarais unes 3h en total en faer el trayectu d'ida y vuelta. La idea ye dir hasta Sena, comer en casa Marta y volver acabantes comer. Empezamos.

Dexamos el coche al lláu de la ponte, nun pequenu apartaderu, na zona que pertenez a Galicia, y cruciamos la ponte. La vista ye impresionante, pero tamién fai pensar na durez de vivir nun pueblu al que namás s'apuerta caminando. RiodePorcos perdió'l so accesu per carretera al construyise'l banzáu de Grandas de Salime en 1956.

Riodeporcos ye un pueblu preciosu, al qu'apuertes per un camín ente parres y sufreres (sufreiras na zona). Que yá indica que ye un llugar onde va pegar el sol (encamiéntovos que llevéis agua, sobremanera pel branu, porque casca guapamente mientres la Farturruta).

Xubes protexíu peles parres centenaries hasta llegar a la preciosa capiya de San Roque.

Siguimos xubiendo hasta'l Chao de Castro, l'hotel rural qu'hai nel pueblu, con horru-tienda y bodega propia. Dende ende, sale la ruta más conocida de la zona, al Escobiu del Ríu Bustelín, recomendable, pero demasiao llarga pa faer nel formatu Farturruta.

Nós tomamos el camín de xubida de la derecha y dexamos la casa a los nuesos llombos.

A éstes nel primer tramu de xubida acompáñennos los borrachinos, los frutos del yérbadu, tamién conocíu na zona como borrachineiro o l'arbedeiro.

Empecipiamos xuna xubida en zig-zag ganando altor sobre Riodeporcos, dexándonos unes vistes impresionantes sobro'l mesmu pueblu yá'l Ríu Navia. Ye 1km y poco de xubida, la única dificultá de la ruta.

Una vegada llegamos a la parte alta, empieza a llanear.

Un paséu preciosu con unes vistas increíbles sobro'l Ríu Navia (nós fuimos pel branu y taba un pocu secu).

Bonu, y equí llega la única parte onde pueden entravos duldes na ruta. Sollertes:

Na primer esviadura que vais atopar, siguíi'l camín de la ESQUIERDA. Esto ye, la ruta principal.

A unos 200m, volvéis atopar otra esviadura. Ehí tenéis de coyer el camín de la DERECHA, que va llevavos darréu al pueblu de Sena.

A partir d'ehí un preciosu paséu hasta'l pueblu de Sena.

Empezamos a ver Sena al fondu.

Y primero recibionos la so Ilesia-Campusantu de San Agustín. Del sXIV.

Con un arcu con unes vistas precioses.

Una curiosidá de Sena ye qu'usa les sos viñes pa dixebrar les sos tierres. Dalgunes son daveres antigües.

Yá nel pueblu, pasamos por una "vivienda-ponte".

Y por un llavaderu de 1954 espertu na memoria histórica.

Al poco, llegamos a Casa Marta. Nun hai carta. Namás  un Menú Degustación con 7 platos de cocina casera a 16€, y que van variando según temporada.

Empezamos con un Platu d'Embutíu Caseru. El xamón ta buenísimu, el chorizu picantín y un pocu de quesu manchegu. Si fueren a usar un pocu de quesu de la zona, sería perfectu.

P'acompañar la comida, Vinu caseru. Nidiu y afrutáu. Entra solo.

Caldu (no pote) con berza y Fabines. 

Buenísimo. Les berces espectaculares.

L'únicu platu que nun entendimos del menú. Arroz trés delicies. Pa tomar fríu.

Fréxoles con Picadiellu de Casa. Maraviyosu. El picadiellu espectacular.

Escalopinos de Xata. Tiernísimos. Con pataques frites. Espectacular.

Pitu Caleya. Perfectu. Vien tamién con pataques frites.

Ensalada de Tomates Caseros con Cebolla Casera. Otru espectáculu. Esplosión de sabores.

Y agora vienen los 3 postres, a cada cual meyor.

Arroz con Lleche. Con lleche de casa. De los meyores que probemos nunca. Maraviyosu. Y directamente del tupper.

Tarta de Frutos Secos. Almendra, ablana ... tou bien esmagayáu. Buenísima.

Y Tarta de la Bisagüela. Bizcuechu, galleta y crema. Otru espectáculu.

Con unos aguardientes de casa y café, pagamos 33€, en total. Maraviyosu.

Farturruta bien desconocida, en plena temporada alta nun cruciamos con naide, con un pueblu al que namás apuertes per una ponte colgante, xubiendo al traviés de viñes centenaries, con vistes increíbles sobro'l Ríu Navia y comiendo un menú degustación de 7 platos principales y 3 postres por namás 16€.