Nueva Visita: Abrelatas - Congresu Nacional de Repunantes

Señes: Ería del Hospital, 5 - La Pola Sieru

Teléfonu: 984 182 245

Web: http://www.abrelatas.info/
Facebook: https://es-es.facebook.com/abrelatas.restaurante
Twitter: [@abrelattas] https://twitter.com/abrelattas

Anterior Visita: https://lesfarturesast.blogspot.com/2021/01/nueva-visita-abrelatas.html
Calidá: 4/5
Preciu: 26€

Comentarios: Non tolos díes nomen a ún Repunante d'Honor nel Congresu Nacional de Repunantes, y anque, la tentación de repunar d'un premiu al Repunante del añu sería repunalo, aceptelo como'l gran honor que ye.

La costume diz que'l galardonáu ha d'escoyer un restorán onde se va a cellebrar la cena posterior a la entrega los premios y discursos varios, y yo, poques gracies, escoyí l'Abrelatas. Hasta agora toles xuntes ficiéronse en sidreríes, onde comimos perbién, pero quería da-y un puntu distintu y que tolos repunantes probaren cocina asturiana, con un toque más creativu. Y encantó-yos. Inclusive hubo dalgún que me repunó porque nun había sidra natural, hasta que probó la Brut Nature de Viuda de Angelón, y callaron pa pidir botella tres botella.

Empezamos con un pocu de Mantequilla Artesana de Sariegu batida con Almíbar. Brutal, como siempres.

El famosu Bombón de Chocolate con Lleche y Gochu Asturcelta. Más picante qu'otres vegaes. Y a la xente encantó-y. Empezamos comiendo pol culu, y acabamos pela cabeza del gochín. Espectacular combinación.

Ensalada de Cogote de Bonitu del Norte con Quesu de Cabra a la plancha, kikos y "Patata Paja". Un peazo d'ensalada buenísima, con toques cruxentes y sabrosa. Xenial.

Nuggets de Pitu Caleya con Mueyu de Mostaza llixera. Ún de los platos más conocíos del llocal. Un bocáu con sabor intenso que combina a la perfección cola mostaza. Tenéis que probalo.

Setes de Temporada con Güevu a la Crema y Tocín Ibéricu. Maraviyosa combinación. Intensidá de la seta, compensada cola grasa del tocín y la suavidá del güevu y la pataca. Xenial.

Otra de les estrelles de la nueche foi'l Pulpín del Pedreru de Tazones guisáu con Tocín Ibéricu Joselito, Ensaladilla de Pataca y Pimentón de la Vera y Crema Llixera de Pataca. Testures, sabor ... tou increíble. Platazu.

Carrilleres de gochu blancu guisaes al Oporto, con Mazana, Pataca Melosa y Pimientu del Pistilu de Nafarroa. Amiestu de sabores y testures. La carrillera con munches hores detrás, entemecida cola mazana, y toque cruxente de la pataca. Yá'l pimientu, qu'apurre inda más potencia. Buenísimo.

Acabamos con Crema del Quesu del Duernu de Sariegu y Frutos Coloraos. Encántame.

Pa beber, Fanfarria. De Cangas. 

Y Brut Nature Reserva de Viuda de Angelón. Perfeuta. 

P'acabar, probemos un pocu del Güisqui asturianu, de Molín de Nora.

Tou esto por 26€. Menú impresionante que prepararó Borja. ¡¡Puxa la Repunancia!! Y ¡¡Puxa L'Abrelatas!!