Farturruta De Barayu a Frexulfe comiendo en Mesón el Centro

Señes: Plaza Cupido - Puerto de Vega / Veiga

Teléfonu: 985 648 567

Facebook: https://www.facebook.com/Meson-El-Centro
Twitter: [@meson_centro] https://twitter.com/meson_centro
Instagram: [@centrovega] https://www.instagram.com/centrovega/

Calidá: 4/5

Preciu: 46€

Anterior Visita: https://lesfarturesast.blogspot.com/2020/11/nueva-visita-meson-el-centro.html

Comentarios: Güei voi llevavos de ruta costera al occidente asturianu. Entepasa n'unos kms de les Farturrutes de davezu (que nun solemos pasar de los 12kms) pero como malapenes hai desnivel y, amás, comemos de la que volvemos, nun vos vais enterar de los casi 16kms que vais faer.

Ye una sienda costera, bien señalizada y ensin perda, que xune dos sableres. Y ye una sienda costera de verdá, vamos en tou momentu bien pegaos a la mariña. Asi qu'hai que dir con cuidu porque vamos per zones con roques y cantiles. El calzáu protector que nun falte.

Salimos de Barayu, pa mí, una de les sableres más guapes d'Asturies, qu'amás, ye Reserva Natural Parcial. Paga la pega visitar por sigo mesma. Desagua'l Ríu Barayu nel so llau occidental, faciendo unos recovecos preciosos y creando un contraste de "selva" y dunes de sablera úniques. Barayu tien dos aparcamientos, y nós vamos salir dende l'occidental, lo que nos aforrará un par de kilómetros. Tamién lleva'l so tiempu baxar a la sablera,  asina qu'encamientovos faelo a la vuelta y davos un chapuzón como colofón final.

Dexamos el coche nel aparcamientu y diriximonos per carretera de pueblu hasta Vigu. Pue faese bordiando'l cantil, pero preferimos faer la primer parte de forma más segura hasta llegar a Veiga, al empar que vamos conociendo pueblinos asturianos.

Travesamos Vigo, un pueblín ganaderu bien guapu, con vistes al mar.

Bien cuidáu, con dalguna casona d'indianos.

Empezamos a ver los maizales, una máxima del occidente asturianu, que nos acompañarán casi tol camín.

Tampoco falten les guíes pa les fabes, de muncha calidá les de la zona.

Siguimos caminando escontra el Puertu de Veiga, per carreteres bien poco transitaes, anque arimaos a la vera.

Cuando de sópitu apaez énte nós la Ilesia de Santa Marina, "la catedral del barrocu rural del occidente d'Asturies".  Templu del SXVIII nel que tuvo, amás, soterráu unos años Gaspar Melchor de Xovellanos.

Si la atopáis abierta, nun dexéis de visitala, paga la pena, y la señora que la curia ye encantadora.



Salimos de la Ilesia y empezamos a atopar les primeres cais de Veiga 

Veiga ye ún de los pueblos más guapos d'Asturies, con cais pa perdese, un puertu pa sentase y esfrutar. Inclusive pa visitar, podéis pasar pola casa de Trelles Osorio onde morrió'l 27 de Payares de 1811 Gaspar Melchor de Xovellanos. Sía comoquier, nun paréis muncho, qu'a la vuelta vamos comer ellí.

Xubimos perdiéndonos peles sos cais.

Con parada a mirar el so pasáu balleneru.

Hemos de xubir hasta La Telaya, cola so capiya, dende onde vamos ver unes vistes impresionantes de la sienda que vamos coyer.

Darréu vemos el senderu a tomar.

Y d'ehí hasta la Sablera de Frexulfe, nun tenemos perda posible. El primer tramu ye una baxada preciosa, onde cada poco vamos tener que parar p'almirar la preciosidá de les vistes.

Bordiando'l cantil d'una forma maraviyosa.

Hasta llegar a la Sablera La Ḷḷosera (Llosa, pizarra. Sitiu onde s'estrayi la pizarra, tan típica nel occidente asturianu). Una preciosidá de rincón, que forma una piscina natural perfeuta pa bañase.

Ye xuna ruta pa toles edaes, ensin apenes dificultá.

Un pocu más palantre, El Picón y Punta Barroco.

Empieza a apaecer Islla de Veiga o Soirana.

Isla bien famosa pa recoyer percebes y llámpares, a la que puede aportase a pie en marea baxa.

Vamos dexala tras, y atopamos con otru pequenu castru. De Corbeirón.

Tamién atopamos Pinar del Castiel, onde taba allugáu ñun de los 29 castros que llegaron a esistir na mariña asturiana (16 d'ellos ente les desaguaes del ríu Barayo y el Eo)

Dende ehí, una pequena baxada, y empezamos a ver la sablera de Frexulfe. Monumentu natural dende 2002

Y agora sí, yá vos ganásteis un chapuzón. Como siempres vos doi opciones: la primer vegada que fixi esta ruta, llevamos un bocadiellu. Tamién podéis comer nel chiringu que s'atopa nel otru estremu la Sablera Frexulfe, onde se come bien. Nós dimos un chapuzón rápido, ensugamos, y desandamos el camín de vuelta a Veiga.

El camín pa tornar faise muncho más rápido porque yá empieza a apretar la fame.

Asina que cuando empieces a ver La Telaya al fondu, les piernes reponen enerxíes.

El sitiu onde paramos a comer en Veiga ye ún de los nuesos restoranes favoritos. Mesón Centro. Un chigre con menciones en Michelín y Repsol, con Mary al mandu los fogones, y Mon, na barra. Formando una de les pareyes más maraviyoses de la cocina asturiana, polo bien que faen les coses y polo bones persones que son.

Eso sí, acutái, que siempres ta llenu. Pidimos mesa na terraza y a la fin optamos pol so Menú Degustación. Cuesta a mesa completa, 35€ por persona ensin bébora. Paga la pena enforma.

Empezamos coles sos Croquetes Cremoses de Cigala y Albariñu. Dos per cabeza. Llíquides per dientro y con sabor a cigala con un toque d'albariñu. Espectaculares. De les meyores.

Ún de los sos platos estrella ye'l Carpaccio de Pulpu. Forma bien orixinal de tomalo. Toque nidiu, elegante, pero cola intensidá del sabor del pulpu. Bonísimo.

Navayes n'Escabeche Tibiu. Otru espectáculu. Testura perfecta col amiestu de sabores del escabeche. Encantónos.

Torta a Mar de Bonu. Ún de los favoritos del menú. Sardina, guacamole, tomate confitáu, el mueyu brutal. Pa envolubrar cola tosta y meter na boca nun par de bocaos. Maraviyosu.

Bomba de Calamar con Ali Oli. Un buñuelu con tola intensidá del sabor de la tinta del calamar. Amiestu de testures cruxentes cola esponxa. L'alioli y la mayonesa dan-y un puntu pa permediar tanta intensidá. Bonísimu.

Merluza sobro Crema de Puerros. Nada qu'añedir a ún de los sitios onde meyor faen la merluza (pa mi la meyor xunto la de Pedro Martino). Perfeuta.

Y acabamos con un Frixuelo rellenu de Mousse de Chocolate. Maraviyosu.

Pa beber, punximonos en manes de Mon, nunca falla. Ye una de les persones que más s'interesa pel mundu los vinos. Bourgogne Cotes d'or Philippe Bouzereau 2018. 30€ de botella que valen cada céntimu de lo que cuesta. Maraviyosu. Tenéis delles opciones más barates.

En total, pagamos 139€. Encántanos Mesón el Centru.



Dende ellí, namás queda volver nun prestosu paséu hasta la sablera de Barayu, onde, si vos pruye, podéis davos un chapuzón como colofón a la ruta.

Son unos 14kms. La ida y vuelta faénse ensin problema nunes 4h. Más el tiempu qu'echéis na comida. Farturruta pa tola familia, toles edaes y con unes vistes precioses. Pel branu suel masificase más, y al Mesón El Centro siempres ye recomendable acutar porque siempres ta llenu, da igual la dómina na que vaigáis.