Casa Pipo

Señes: Plaza del General Riego, Tuña - Tinéu

Teléfonu: 985 803 756

Web: http://www.hotelrestaurantecasapipo.es/

Facebook: https://www.facebook.com/CasaPipo

Twitter: [@CasaPipo] https://twitter.com/CasaPipo

Calidá: 3/5
Preciu: 17€

Comentarios: Farturruta dende'l pueblu de Tuña hasta'l Dolmen de Meriás. La ruta sal dende'l preciosu pueblu de Tuña, col Palaciu de Cabo Río presidiendo la entrada al pueblu. Ye'l pueblu onde nació'l famosu militar asturianu Rafael de Riego y que cunta con un conxuntu preciosu de palacios casi toos d'orixe medieval.

Cruciando la maraviyosa ponte romana que da pasu a l'antigua calzada romana per onde circulaba tol oru estrayíu de la nuesa tierra. Pela mesma calzada, xubimos hasta'l pueblu de Meriás (anque pue faese per carretera asfaltada) y dende hasta la sierra del mesmu nome onde s'atopa allugáu'l Dolmen.

Ún de los dólmenes más guapos y meyor calteníos n'Asturies, con unes vistes precioses y un área recreativa onde poder tomar una botellina de sidra. Datáu ente 4000-3000 a.c.

Una ruta bien fácil, d'unos 12 kms día y vuelta, perfecta para faer pela mañana y a la vuelta parar a comer en casa Pipo.

Asitiáu na mesma plaza de Tuña, Casa Pipo ye, amás, un restorán de 3 estrelles. Zona de chigre, col míticu cartelu d'Águila Negra. Y comedor na parte de tras. Clásicu y abondo ampliu.

D'entrante traxéronnos una Mantequilla Arumada. Rica.

Comimos el menú de la fin de selmana. Nun empezó como debiera porque díbamos probar la fabada, de la que nos falaron perbién, y cuando nos sentamos a la mesa avisáronnos que xusto nesi momentu acabóse. Una pena.

Asina que lo camudamos polos Arbeyos con Xamón que nos ufiertaron. Ricos.

Tamién probemos la Ensalada de Puerros y Bacaláu. Correuta.

De segundos, un pocu de too, Guisu de Xata a la Mostaza. Con una xata que taba bien tienra. Mui  rica.

Llombu d'Atún con Verdura. Tamién bien ricu. Amás, bon llombu.

Y el platu estrella que más nos gustó, Choscu de Tinéu con Cachelos. Que taba bien, bien bonu.
Amás, bien bona ración, amás.

Atención de primera, y en tou momentu ufiertándonos más comida.

De postre, Requesón con Arándanos. Bien ricu.

Y una Copa Secreta de la Casa. Asina que tuvimos l'alderique para intentar pescudar qué lleva. Realmente bona. Natielles, daqué de nata, base de galleta bañada en Sansón ... Hai que probalo.

Para beber, agua y vinu con casera del menú. Teníen cerveza Caleya pero escosaron les esistencies tres la fiesta del día anterior. Una pena.

Pagamos 17€ per cabeza. Bona opción si táis pela zona.