Farturruta a Braña El Gumial comiendo en Ca'l Xabú

 

Señes: Cuergo - Ayer

Teléfonu: 985 487 331

Calidá: 4/5
Preciu: 30€

Web: http://calxabu.es/
Facebook: https://www.facebook.com/CalXabu/
Instagram: [@cal_xabu] https://www.instagram.com/cal_xabu/

Comentarios: Una ruta pa esfrutar en cualesquier dómina del añu, pero n'especial, na Seronda. Vamos travesar un Fayéu espectacular, acabando nuna Braña preciosa mientres caleyamos acompañaos d'un ríu máxicu con precioses saltos d'agua. La ruta en total nun llega a 10km, y tien unos 300m de desnivel de xubida. En xubir hasta la Braña, vas tardar unes 2h y en baxar, daqué menos d'hora y media. Algamadiza pa tola familia.

Pasando'l pueblu de Cueves, famosu pola empresa d'embotellamientu d'agües, atopamos una curva con un pequeñu aparcamientu, que tien, amás, un cartelu qu'indica Curva Las Calzas. Dexamos el coche ende. (tranquilos, si nun hai sitiu, un pocu más arriba vais atopar otru apartaderu)

Nel mesmu aparcamientu atopamos el camín onde empieza la ruta. Una pequeña baxada y un paséu de daqué menos de 1km, paralelu a la carretera y dende'l que travesamos unes praderíes precioses.

Al poco cruciamos la ponte sobro'l ríu Braña o San Isidro.

Y empezamos xuna xubida hasta la primera de les Brañes qu'atopamos na ruta: la Braña del Carrozal. Perbién caltenida.

Y al poco, otra más guapa inda, la Braña de la Yana.

Dende ella, tenemos una vista espectacular a la carretera de la que venimos y el pueblu de Cuevas.

Nesti puntu, empieza un espectáculu de colores, naturaleza y paz difícilmente descriptible. Una guapura qu'espresen meyor les semeyes, pero que nin s'averen a lo que supon tar ellí.

Empieza una xubida constante, pero llevadera, que va enfusandonos más y más na viesca, de lo que primero ye la Yana y adulces, va siendo'l Gumial.

Los carbayos, ablanos y castañales van dexando pasu a les fayes, con unos contrastes de colores increíbles.

Tres un repechín curiosu, atopamos una zona onde mofu, fayes y roca entemecen nun contraste de colores dafechu espectacular.

Al poco, empezamos a oyer el Ríu Alba o Gumial, qu'añede lo poco que -y faltaba al Gumial pa ser máxicu. Impresionante.

Dalgún Corru pa recoyer les castañes.

Y siguimos ganando altor adulces hasta atopar esti saltu d'agua espectacular.

Vamos abandonando los colores espectaculares de la viesca y viendo a lo fonderu la Peña l'Alba. Eso sí, el ríu yá nun va abandonamos.

La última parte de la ruta ye un paséu llanu, onde dexamos tras la viesca y abre un paisaxe dafechu distinto. Empezamos a ver, tamién, les primeres cabañes.

Llegamos a la Braña'l Gumial, a 1328m. Les cabañes tán en bien bon estáu y la mayada ye daveres preciosa.

Les vistes dende la Braña son espectaculares. El Picu Fuentes, los Castrillones en mediu, y la Peña l'Alba a la derecha.

Tres una parada, volvemos pelos nuesos pasos. A la guapura'l llugar, hemos d'añedir que nel sentíu de vuelta, acompáñanos de fondu'l Retriñón.

En llegando al coche y camudanos, vamos a Ca'l Xabú, que nun falla. Pero ye que, amás, coincidiendo cola seronda, faen siempres unes Xornaes de Setes, que morríamos de ganes de probar. Suelen durar 15 díes, y van acompañaes d'esposiciones y salíes a les que puedes apuntar pa conocer un pocu más sobro esti maraviyosu mundu.

Empezamos colos entrantes. Una Crema de Pataca, Boletus (Viriatu) y Trucha Afumada. Bonísimu.

Croqueta d'Hydnum Repandum (Llingua de Gatu). Espectacular. La croqueta prácticamente líquida, al estilu Pumar. Maraviyosa.

Ravioli d'Asturcelta y Lepista Luscina (Cogorda de berizu). Intensidá pura na boca, la panceta d'asturcelta ye brutal y cola cogorda, queda espectacular.

Pasamos a la Terrina de Pitu Caleya y Boletus Erythropus (Viriatu bermeyu). Platu fríu, pa untar col pan. El toque de la cogorda ye afumao y queda perbién col pitu caleya.

Tomamos un descansu cola Ensalada de cogordes n'escabeche y quesu Varé. Rica y más col quesu Varé.

Volvimos a la carga coles Fabes con Colmenilla (Pantánganu) y Gochu Asturcelta Asáu.

Perbones, tienen un toque picantín y son caldoses. El gochu asturcelta ta asao nun fornu de lleña. La colmenilla ye un luxu bien difícil d'atopar, namas l'atopes cerca de los ríos y hai qu'ensugales bien porque tienen una pizquina de toxina que pue dexate l'estómagu un pocu tocáu ... De xacíu, nós comímoslu tou en perfectu estáu.

Albóndigues de Xabalín con Lactarius Deliciosus (Ñícaru). Brutales. Bien xugoses y cola intensidá del xabalín.

Acabamos con Macrolepiota Procera (Pántagu) rellena de mariscu y bacaláu. Otra maravía. Un platu qu'entemez la intensidá del mariscu cola testura de la cogorda. Encantónos. El mueyu, p'acabar coles esistencies del pan.

De postre, Boletus (Viriatu), Ablanes y Cacáu. Bonísimu.

Un pocu de café de pota.

El pan d'escanda, increíble .

Y pa beber, un pocu Sidra Peñón, anque dientro'l comedor, nun la echen.

El menú cuesta 30€, como veis, relación calidá-preciu, inmeyorable. Aconséyovos qu'acutéis nel Llar, ye increíble comer ellí.

Viesques máxiques, ríos de suañu, contrastes de colores, mayaes en mediu'l paraísu, brañes onde t'enllenes de sabiduría y un menú basáu en cogordes n'ún de los templos de la gastronomía asturiana. Pocu más podemos añadir.