Contact Me

Nombre

Correo electrónico

Mensaje

Hover Setting

slideup

Farturruta A Llastra da Filadoira comiendo en Casa Nito

Señes: Plaza Ayuntamiento - Villayón
Teléfonu: 985 625 012


Calidá: 3/5
Preciu: 20€



 
Comentarios: Güei voi llevavos a conocer un llugar máxicu, con lleenda incluyida, nuna redolada preciosa y bien desconocíu. Vamos A Llastra da Filadora nuna ruta d'unos 7km, que vais tardar en faer unes 2h y media. A la ida prácticamente'l camín ye de xubida, con unos 300m de desnivel, con un tramu un pocu más duru, pero polo xeneral, ye una ruta llevadera.


Salimos del pueblu de Barandón. Dalguna ruta indica dexar el coche nel pueblu anterior, en Castaedo, pero los 2kms que dixebren los dos pueblos, tán xuníos per una pista ganadera en bon estáu pola que podéis meter el coche ensin problema. Eso sí, la pista ye solo pa 1 coche.


Barandón ye un pueblu preciosu, con namás 4 habitantes, pol que paga la pena dar una vuelta.


Aparcamos el coche na Ermita de San Juan, del SXVII, bien guapa.


El primer tramu ye una xubida llixera ente un monte preciosu llenu de Gorbizos, Fayes y Carbayos.


Adulces, vamos ganando altor y la zona de monte va quedando tras, pa poder almirar les vistes sobro tola sierra de Carondiu.


La zona abierta, entre cotolles, ye la que tien el recuestu más duru la ruta. Pero ye llevaderu. Amás, con estes vistas, paga la pena.


Cruciamos, amás, el Ríu del Campillín.


La ruta ta marcada en tou momentu.


Nel últimu tramu de xubida, espectacular, a éstes volvemos entrar nun tramu de monte. La zona taba abondo enllamorgada cuando fuimos nós.


Nel intre abre maxestosa la Campa d'Entrerríos.


Y A Llastra da Filadoira, o Dolmen de Entrerríos. Ún de los megalitos que meyor tan calteníos n'Asturies, con más de 5000 años d'antigüedá. Dixebra los conceyos d'Ayande, Villayón, Eilao y Bual.


Cunta Bertu Ordiales, nel so llibru Llugares Máxicos d'Asturies.

Lligáu al so simbolismu funerariu, la cámara sepulcral del dolmen lleva adosada al accesu una pequeña antoxana. La intensión yera la d'establecer un umbral de tránsitu ente la lluz de la vida nel esterior y la escuridá de la muerte nel interior. 

L'espaciu del dolmen correspondiente a la tumba atópase techáu por un llabancu del que sobre'l so tresporte narra una lleenda llocal foi frutu d'un ser sobrenatural. Dizse qu'una muyer escomanada, una moura a la que los árboles más altos namái-y albondaben les rodiyes, puxó cola tiesta pela cobertoria superior hasta depositala nesta xerra. Mientres, col duviellu na mano, nun dexaba de filar tranquilamente. 


Un sitiu daveres máxicu. Dende ellí, podéis xubir al Picu Carondiu, de 1222m, el picu más altu de Villayón. Ida y vuelta dende A Llastra, pue ser una hora y media, pa que calculéis los tiempos.


La vuelta ye pol mesmu camín de la ida, pero tou baxada. Una baxada preciosa, por cierto.


Hasta llegar de vuelta al pueblu de Barandón. Una ruta onde nun atopamos a naide, por cierto. Bien señalizada, y algamadiza pa tola familia.


A la vuelta, indispensable parar a tomar daqué nel Chigre-tienda Casa Fonso. Nel pueblu de Valdedo. Un sitiu máxicu onde atopes dende materiales de construcción hasta madreñes mientres tomes una pinta de vinu o d'aguardiente la zona. Lleva abiertu dende 1945. Maraviyosu.


Siguimos de vuelta hasta la Plaza del Conceyu de Villayón, onde vamos comer, pero antes vamos parar a conocer la Ponte Polea, que, según la web del propiu Villayón, data de la dómina romana, anque nun atopé más referencies al respeutu. Otru llugar máxicu, que cuesta un pocu atopar. Ta a 200m del encruz de Polea, tien un pequenu cartelu qu'indica una baxada hasta la ponte que se fai caminando (en 10min llegáis). Paga la pena.


Dende ellí, esviándovos un pocu, a 8kms, tenéis otru llugar máxicu: la Cueva'l Pímpano, una cortina continua d'agua mientres tol añu percima d'una pequena cueva faciendo un paisaxe espectacular, arcu iris incluyíu. Falévos d'ella nesta otra Farturruta.


En Villayón tienes dos opciones pa comer: el Torneiro y Casa Nito. Al Torneiro yá fuimos delles vegaes y encántanos, asina que fuimos a comer a Casa Nito que nos prestó tamién.


Asitiáu na mesma plaza'l pueblu, con amplia zona d'aparcamientu y parque pa que xueguen los guaḥes (inclusive piscina nel mesmu pueblu). Según entres, amplia zona de barra con meses pa tomar daqué. Y nel pisu de riba un comedor bien grande, con otra zona de reserváu.


Atención perfecta. Comimos el menú qu'había, a 15€.


Pidimos de primeru Garbanzos con Amasueles y Gambes. Bien ricu, con un caldu espectacular y amás bien surtíu. Nun recamarien.


De segundu. Carrilleres. Bien xugoses y suaves. Con pataques frites de verdá y pimientos.


Y Rabu de Toru. Bien bonu tamién.


De postre, Requesón con Miel. Maraviyosu.


Flan de Queso Casero. Bien rico. 


Pa beber, afitámonos que na parte de baxo, nos cañeros, tienen Sidra Pomar de Viuda de Angelón. Y claro, colos pocos que queden n'Asturies, yera una oportunidá que nun podíamos dexar pasar. Asina que pidimos unes cuantes xarres que cola comida fueron xenial.


Pagamos por tou 40€. A 20€ per cabeza. Xenial de preciu.


A la vuelta, una parada nel Banzáu d'Arbón.


Y en otru sitiu máxicu, el Pozu Mouro. Un antiguu molín derruido (otra vergüenza de caltenimientu del nuesu patrimoniu) con una cascada preciosa.


Dólmenes megalíticos con lleendes, montes d'ensuañu, chigres-tienda con un encantu especial, cascaes máxiques, molinos abandonáos y un menú baratísimo con muncha calidá. Preciosa Farturruta.

No hay comentarios

Publicar un comentario