Señes: Sellañu- Ponga
Teléfonu: 985 843 253
Calidá: 3/5
Preciu: 14€
Pela baxada a Sellañu, dibes dexando la vida. Pendirriba, pendibaxo, goxes, macones y paxos de Cazu pa les Arriondes. Pela baxada a Sellañu, nun requexu, Ponga entero. Pendirriba, pendibaxo, el to saber na to fala y un fardaxáu de llamentos.
Cuando ún de los tos cantares favoritos, llévate a empecipiar una Farturruta. En 2003, Felpeyu sacó'l discu Yá!, maraviyosu qu'incluyía'l cantar La Pongueta, un homenaxe a la llingua asturiana al traviés de la vida de la madre y de la güela de Ruma Barberu, autor y componente del grupu.
Tres tantos años averamos a la zona a percorrer esti antiguu trazáu ferroviariu del primer terciu del SXX, que tresportaba la madera dende los montes de Ponga hasta'l pueblu de Sellañu. Ye una Farturruta d'unos 9kms, siempres siguiendo'l Ríu Samedón o Vallemoru. Son unes 4h de tiempu, con dalguna xubida en recuestu, y cola dificultá añedida d'una zona argayada que fixo que guetáramos un camín alternativu. Meyor faela en meses de branu porque la crecida del rio puede anubrir parte'l camín y faela imposible.
La ruta ye circular. Sales de Sellañu, vas al Colláu de Semeldón, y a la vuelta esvies al pueblu d'Ambingue, dempués Cazu y vuelta a Sellañu. Nós aforramos la parte d'Ambingue y Cazu (que los visitamos dempués en coche), porque, amás d'aforranos una bona xubida hasta Ambingue, son tramos de carretera que, amás de ver el pueblu, nun aporten muncho.
Empezamos en Sellañu, al principiu del pueblu. Hai una esviación na mesma carretera xeneral col entamu marcáu de la ruta. Ta bien señalizada en tou momentu.
Col so cartelu correspondiente.
La primer parte ye un paséu bien fácil hasta atopar la primer ponte de formigón que crucia un pequenu regueru, conocíu como ponte de Pumazaneu.
Una vegada trevesáu, podéis siguir de frente o, saltando la valla, crucia'l prau onde inda se nota'l trazáu del ferrocarril. Nós a la ida siguimos de frente y va dar el mesmu sitiu. Meyor saltái la valla y asina evitáis el recuestu de xubida.
Castañales, ablanares, fayes y carbayos acompáñennos casi tol camín.
Dempués de xubir un recuestu, apaez de sópitu la ponte Sota de Candamu. Hai que tar un pocu sollerte pa velo.
Pa baxar hai una barandiella d'ayuda y la ponte ta apocayá reformada.
Xubimos un repechín y siguimos pela vía'l ferrocarrill escavada na roca. Ye espectacular.
Al poco, atopemos la bifurcación de la que vos falamos de primeres.
Siguimos rectu .
Inda queden antiguos corros al llau d'ablanares enormes pa recoyer les preciaes ablanes.
Alcordances d'otres dómines.
La sienda trescurre paralela al ríu, y sigue ganando n'espectacularidá. Hai que tener cuidao porque ye una zona húmeda, anque yá veis que cuando fuimos nós (branu) apenes baxaba agua, pero dalguna semeya que vi, el ríu baxa con abondo más caudal.
Y atopes maravíes asina .
Atopamos la última ponte .
Descolgamos peles escaleres.
Y empieza la parte na qu'hai que tener más curiáu .
Un argayu tuvo qu'esbarrumbar parte del camín y cuesta atopar un pocu la sienda. Tranquilos, al altor del regueru Dornín ye onde habéis d'esviavos. La idea ye ganar altor pa dir al Colláu de Semeldón. Atópase pasu fácil.
Namás queda 1km pa llegar al Colláu.
El primer tramu tien un recuestu curiosu, anque ye una de les partes más espectaculares de la ruta. Una viesca máxica enllena de carbayos, fresnos, ablanares, castañales...
Y adulces van abriendose les vistes impresionantes qu'ufierta Ponga.
La pendiente va suavizando, y siguimos travesando viesques d'ensuañu.
Por fin llegamos al Colláu de Semeldón. Ellí espera los restos de la última cabaña que queda en pie.
Y unes vistas increíbles a tol valle del Semeldón. Ponga ye increíble.
Tres la parada pa recargar piles con eses vistas, queda la vuelta. Pol mesmu camín. Como vos comenté, si vais con tiempu, na esviadura, podéis xubir a Ambingue. D'ehí a Cazu per carretera, y de Cazu baxar a Sellañu. Nós volvimos pel camín d'ida, y fuimos visitar Ambingue y Cazu en coche acabantes de comer.
Pa comer fuimos a Casa Ricardo, nel mesmu Sellañu. Podéis dir caminando o dexar el coche nel aparcamientu que tienen xusto al lláu del Hotel/Restorán.
Les habitaciones nun les conozo, pero como sían igual de guapes que bien cocinen, pinta perbién. Les vistes dende la terraza, tampoco queden atrás.
Dientro, barra qu'estrema la zona'l comedor de la zona del hotel.
El comedor ye ampliu, con amplies cristaleres y techu con vigues de madera.
Pa comer, pidimos el menú . Aconseyáronmos dafechu la fabada y el cabritu.
Tráennos d'entrante quesu y chorizu caseru.
De primeru… Fabada.
Maraviyosa. Faba de bona calidá, que desfái na boca. Y el compangu ye de los bonos, con un toque picantín. Maraviosa.
De segundu, Xabalín. Con pataques frites y pimientos. Bien bonu. Parte solu.
Y Cabritu. Maraviyosu. De los meyores que recuerdo. Con sabor, tienru, ración enorme. Xenial.
Pan bien bono.
Pa los postres, tou caseru. Pidimos Tarta de la Güela. Mui rica.
Y Tarta de Quesu. Rica.
Pa beber, agua y una copa de tintu. Tienen sidra, pero nun la echen dientro'l comedor. Pagamos por tou 27€, les dos persones, con café. A 14€ per cabeza. Impagable.
Nel mesmu Sellañu, tenéis el Llagar-Chigre Cañón. Visita indispensable.
Llagar pequenu, y que Paulino va enseñate atentamente.
Acabante comer, averamos a Ambingue y Cazu. Son dos preciosidaes de pueblos. Bien calteníos amás. En Cazu, tienen una torre medieval del SXII, anque los sos oríxenes son del SV o VI, onde la lleenda diz que vivió la fía de Pelayo. Foi inclusive cárcel y güei ta nun estáu bastante llaceriosu. Xusto al lláu, un enorme horru con 9 pegollos.
A la vuelta, paramos en Cirieñu, un pueblín preciosu, llenu de casones y horros.
Y con vistes asina.
Onde amás s'atopa la Quesería La Collada, de les poques que queden ellaborando Quesu Los Beyos. Asina qu'hubo parada técnica pa reponer esistencies. Entamen visites guiaes, amás, onde t'espliquen cómo ellaboren los sos quesos. El de 3 lleches ye esceicional.
Pontes, viesques máxiques, vistas al paraísu, torres con lleendes, microllagares, queseríes, y fabada y cabritu memorables. Espero que vos preste la Farturruta de güei.
No hay comentarios
Publicar un comentario