Farturruta del Riu Profundu comiendo en Casa Eladia

Señes: Piñera, Rozaes - Villaviciosa

Teléfonu: 985 558 085

Calidá: 4/5
Preciu: 23€

Facebook: https://www.facebook.com/Casaeladia
Instagram: [@casa.eladia] https://www.instagram.com/casa.eladia/

Comentarios: Siempres acomuñamos Villaviciosa a la so ría y les sos precioses sableres, pero güei voi proponevos un plan distintu siguiendo ún de los sos ríos afayando una ruta por antiguos molinos nuna redolada preciosa. Y a pocos kilómetros d'esa ría y eses sableres. 

La Farturruta pol Ríu Profundu ye una ruta llineal, de 15kms en total (día y vuelta) y con un desnivel acumuláu d'unos 300m, concentraos casi toos nel tramu final de llegada al pueblu de Buslaz. Podéis dir caminando colos guaḥes. Nós tardamos 2h y media na ida y 2h na vuelta. Ensin priesa y parando a faer semeyes. 

Muncha xente aforra la xubida a Buslaz y da la vuelta en viendo'l Molín de la Peña, el molín más icónico de la ruta pola cascada que tien al lláu y casi el que s'atopa en meyor estáu de caltenimientu. Nós encamentámosvos l'esfuerzu hasta xubir a Buslaz porque ye un pueblu bien guapu, ye media hora de xubida nun duru recuestu. 

Ye una pena que los molinos de la ruta tean asina de desdexaos, porque la ruta ye preciosa. Nunos sitios indiquen qu'hai 22 molinos na ruta, n'otros 18. Nós nun vimos tantos. 

Encamentámosvos que llevéis calzáu de recambiu y polaines, porque suel haber barru abondo na ruta  por cuenta del mugor y la poca lluz qu'entra nel camín. Ye parte del encantu de la ruta.

Empezamos en Valbúcar (Amandi). Hai una pequena zona d'aparcamientu a un lláu de la carretera, y otra a les mesmes puertes de la Quinta la Vega. Una entrada preciosa.

Bordiamos mientres unos metros la finca.

Y nel intre apaez el cartelu qu'indica'l primera molín, de Griselda, que se ve poco, pero daqué a lo fonderu.

Como veis, el ríu entemez col camín y enllenalu tou de barru. Y eso que yera branu.

Al poco, salimos a una carretera que forma parte de la ruta unos 500m. Apenes hai tráficu. 

Llévanos al pueblu de Villaverde. Con dalguna casa rural.

Vais atopar una esviadura escontra Llugás. Nós siguimos de frente en dirección Busláz.

Y esviamos a la derecha cuando llegamos al altor d'un viveru.

Retomamos la ruta, y como veis, pasamos per partes daveres precioses.

Pa evitar resbariar en dalguna baxada, tenemos ayuda.

Atopamos dalguna Cuerria. Corra, zarru [de piedres de forma circular, onde s’echen les castañes pa qu’abra l’oriciu]. 2 Cercáu [pa guardar animales]. 3 Montón [d’oricios puestos a curar]. 4 Parte [del intestín gordu de los rumiantes].

Y dalguna pequena cascada.

Mientres siguimos atopando con Molinos, en pésimos estáu de caltenimientu. Como ésti del Pitu.

El camín ta perbien marcáu y nun hai perda posible.

Llegamos al Molín de Perea, al qu'aportamos cruciando una ponte.

En travesando una zona de praos, onde por un momentu nun vemos el rio (anque sigue habiendo barru igual), atopamos el Molín de Pernilles.

Y de vuelta al ríu.

Atopamos el Molín d'Enriba.

Cruciamos la ponte

Y empezamos una pequena xubida bordiando la zona'l ríu pa ver estes vistas tan guapes.

De vuelta al ríu, el Molín de Pascual.

Volvemos cruciar de nuevu'l ríu. Tenéi un pocu de procuru con esti pasu que la barandiella tien poca estabilidá.

Y al poco, esta ponte tan guapa.

Pegáu al Molín de Lalón, del qu'alpenes queda yá nada.

Xubimos per unes piedres pegaes al Molín de Ullina, y al poco tenemos la "estrella" de los molinos de la ruta: el Molín de la Peña. Con una cascada espectacular.

Inclusive podéis visitalo per dientro. Muncha xente aprovecha esta zona pa comer o, inclusive bañase cuando'l tiempu acompaña, y dempués dan la vuelta pol mesmu camín d'ida. Hasta esti molín calculamos unes 2h de ruta.

Nós siguimos pel camín, y creemos que paga la pena. Pero vós decidís. Al poco atopamos el Molín d'Esprón.

Y ún de los meyores calteníos de tola ruta. Qu'inclusive podéis visitar per dientro.

A partir d'equí empieza una xubida hasta'l pueblu de Buslaz. Faise un pocu dura, pero ye curtia, de 1km aprosimao.

Ye un pueblu preciosu pol que paga la pena perdese. Llenu d'horros, paneres y casones precioses.

En dando una vuelta, volvimos pol mesmu camín. Parando a ver detalles que se nos pasaron a la ida.

De vuelta al coche, fuimos comer a Casa Eladia. Tenéis tamién cerca'l Llagar de Cortina y el so restorán pa rematar la ruta con una visita + comida al llagar.

Un chigre-tienda de tola vida. Preciosu. Tienen una zona de barra y un pequeñu comedor. Tamién hai dalguna mesa pa comer na terraza. Nós comimos na mesa la zona de barra, la más prestosa pa nós.

La pizarrina colos platos qu'hai. Pa beber, agua Fuensanta y Sidra Frutos.

Pidimos Pantrucu pa empezar. Nun hai munchos sitios que los faigan, y siempres que vamos a la zona d'oriente, nun los perdonamos. Buenísimo. Con unes pataques frites de verdá.

De segundu, Fabada. De 10. De los meyores que probemos nunca. Ello ye que suelen quedar siempres ente los finalistes a los meyores premios de la meyor fabada y en 2019 ganador el premiu a la Meyor Fabada de Villaviciosa. Ye escepcional.

Col compangu aparte. Ración bien abondosa pa dos persones, tuvimos de repitir 3 vegaes caún.

Tolos postres son caseros. Pidimos Tarta de Ablana. Trupa, y con cachos d'ablana pel interior. Buenísima.

Y Tarta de Quesu. De los meyores que probé nunca. Espectacular.

Por si'l sitiu y la comida fueren poco espectaculares, déxovos el preciu. Pagamos 47,30€. A 23€ por cabeza. Insuperable.

Acabantes comer, esplicáronnos ónde ver dalgún molín más cerquina del pueblu.

Y yá que tábamos, averamos hasta El Conventín de Valdediós, que ta bien cerca (anque meyor, consultái los horarios pa nun atopalo peslláu como nos pasó a nós). 

Molinos, cascaes, pueblos preciosos, chigre-tienda, una de les meyores fabaes del mundu y una de les ilesies más representatives del arte asturiano. Maraviyosa Farturruta.