Farturruta Los Reconcos del Nora comiendo nel Tendejón de Fernando

Señes: L'Escampleru - Les Regueres

Teléfonu: 985 799 005

Calidá: 4/5

Preciu: 24€

Web: http://www.eltendejondefernando.es/

Facebook: https://www.facebook.com/EL-TENDEJON-DE-FERNANDO/

Comentarios: Vamos faer una ruta facilina, d'unos 8kms, ensin malapenes desnivel, con unes vistes increíbles, preses, ilesies del SVIII y miradores p'almirar unos reconcos espectaculares a escasos kilómetros d'Uviéu. En 2h o 2h y media facéisla ensin problema.

Empezamos na Ilesia perteneciente al arte asturianu de San Pedro de Nora. Datada del SVIII (¿cuántos llugares del mundu pueden presumir de tener monumentos en pie dende'l SVIII y con un arte único nel mundu?). La mesma Ilesia tien una zona d'aparcamientu.

Ta na redolada espectacular del ríu Nora y tien al lláu una horrible torre talaya que data del periodu de posguerra civil española, y que de xuru construyeren con dalgún restu de la mesma Ilesia (que sufrió severos daños na Guerra Civil).

Punximonos en contautu col teléfonu de la Ilesia (vien en Google) y la so guía enseñónos l'interior atentamente. Mui recomendable la visita pa conocer de cerca ún de los monumentos más importantes d'Asturies. Tien una sensación de fondura increíble, un xuegu de lluces coles dolosíes orixinales del sVIII y dalgún restu de dalguna pintura.

Cruciamos la ponte, y almiramos la imaxe de la Ilesia yá'l Riu Nora.

Vamos ganando un pocu d'altor hasta llegar a les instalaciones de la Presa'l Furacón. Ellí atopamos un panel indicativu del empiezu la ruta.

Y si vos fixáis en detalle, vais ver los restos de l'antigua ponte de Gubín (o la ponte'l moru), que conectaba Uviéu con Gráu y la zona del suroccidente asturianu. Data del SXI.

Y si miráis escontra l'otru lláu, amás del tren, la sierra l'Aramo.

Xubimos por una pista, cola única pendiente que vais a atopar "curiosa" na ruta.

Y onde, según vais ganando altor, tenéis una vista preciosa de la Ilesia yá'l pueblu.

Una vegada enriba, empezamos el descensu escontra Priañes. Per caminos rurales bien guapos.

Priañes ye un pueblu bien guapín y bien cuidáu, con un parque homenaxe a -atención-, Arturo Fernández. Si queréis aforrar lo que vien de siguío, na parte alta del parque, podéis aportar a los Reconcos del Nora. Pero yo encamiéntovos siguir, vien la parte más guapa.

Esviamos escontra la esquierda, nuna baxada preciosa escontra'l ríu Nalón.

Pa entrar nuna preciosa zona de castañales.

Hasta que llegamos a una área recreativa.

Ún de los tramos más guapos de la ruta, a la vera'l ríu Nalón.

Hasta que llegamos a un túnel, que tenemos que travesar.

Una sienda llimpia, bien guapa y acompañando'l ríu Nalón.

Al poco yá llegáis "a la fin de la ruta". Equí podéis faer dos coses, dar la vuelta hasta'l parque o siguir pela carretera hasta aportar a Priañes. Nun tien apenes tráficu de coche. Nós siguimos pela carretera. Pasamos pola central hidroeléctrica de Priañes.

Un cachín de xubida.

Hasta llegar de vuelta a Priañes, esta vegada pela parte de riba.

Nel intre, atopamos un indicador a los Reconcos.

A los qu'aportamos por un caminín bien guapu.

Y al poco yá atopamos colos Reconcos. Una vista espectacular.

Tenéis la opción de volver al aparcamientu de la Ilesia per carretera, o faer la mesma ruta pola que llegáis a Priañes. Nós volvimos pela ruta que nos paez abondo más guapa.

Pa comer, tenemos dos opciones na zona, Casa Florinda (que taba de vacaciones) y El Tendejón de Fernando, llocal míticu de L'Escampleru.

Maraviyosa terraza con unes precioses vistes.

Siempres finalista o ente los primeros puestos nos concursu de la meyor fabada o del meyor pote. Ye un indispensable si vas, probar una de los dos coses. Comimos 3 persones, una pidió menú, los otros a la carta.

Pal menú pidimos Llenteyes de primeru. Bien riques.

Y Trucha con xamón de segundu.

A la carta, pidimos la Fabada. Bien bona, con caldu gordu, bona faba y toque picantín de la morciella. El compangu bien ricu.

Y Cabritu Guisáu con Patatines.  Bien ricu.

Pa los postres pidimos, Escuderu. Postre típicu de Les Regueres. Compota de Mazana, Requesón y Ablanes con Sorbete de Freses.

Picatostes, que nos dicen que tán recién feches. Tienen sabor a lleche de verdá,y la mandarina da-yos un toque acedu. L'únicu problema ye que tán feches con pan de molde.

Y Arroz con Lleche. Con toque anisáu. Requemáu. Bien ricu.

Pagamos por tou, 72,5€. Xenial relación calidá-preciu. Gustónos enforma.

Monumentos del sVIII, pontes medievales, vistes espectaculares, a 10min del centru d'Uviéu y un clásicu de la gastronomía asturiana. Preciosa Farturruta.