![](https://blogger.googleusercontent.com/img/b/R29vZ2xl/AVvXsEgH1Xu77sDe34wUkf15SwN-zZLs6Y_16TybepFpLZtYtAzVnmeNuim1Z5mI6wyV0XqnG2XUbfBbicQr3aGjkRm1C_P_IvwURNaAF3iE_8bz8oS3JK05AoopDyO1AHrM2QIPYxK4esZglWo/w640-h442/IMG_033+8+Verticales.jpg)
Teléfonu: 985 944 498
Calidá: 4/5
Facebook: https://www.facebook.com/Camín-de-los-Beyos
Instagram: [@camindelosbeyos] https://www.instagram.com/camindelosbeyos/
Instagram: [@camindelosbeyos] https://www.instagram.com/camindelosbeyos/
Comentarios: Amieva ye un paraísu por afayar, frontera con Lleón, cerca de Cuadonga, con paisaxes maraviyosos y al que munches vegaes namás usamos de camín para dir a Ponga y a los Beyos.
Voi proponevos una Farturruta d'unos 11kms, con unos 400m de desnivel, y una duración total d'unes 4h. La sienda ye de bon pisu y puede facela tola familia. Hai dellos puntos d'entamu, y va depender del que decidáis salir, la ruta va ser más llarga o más curtia. En llingua asturiana, utilízase la grafía de "Ḥ" pa los soníos que conocemos como "h aspirada", un pocu más nidios que la "jota". D'ende que munches vegaes escribamos incorrectamente "Guaje" en cuenta de "Guaḥe" o la "Jocica" en cuenta de la "Ḥocica".
Tenéis que llegar hasta'l pueblu d'Amieva (evidentemente nel conceyu d'Amieva), y según llegáis garráis una pista a la derecha que va xubivos unos 2 o 3 kms hasta un aparcamientu nel Colláu d'Angón onde coincide l'entamu de la nuesa ruta y la del Arcedianu. Otra opción ye que dexéis el coche n'Amieva y xubáis esa pista caminando, pero yá añedís 5kms a la ruta.
Dexamos el coche nel colláu y atopáis dellos cartelos indicativos de dambes rutes. Tamién ún qu'indica l'entamu de la ruta a la Ḥocica. Empezamos baxando pela mesma pista ganadera que xubimos. El desnivel de la baxada son unos 100m, hasta la Central de Restañu. Dende ende quédennos 300m de desnivel de xubida hasta la Ḥocica, como veis ye una ruta llevadera.
Vistes impresionantes con precioses cabanes de piedra y actividá ganadera. En tou momentu, el macizu occidental de los Picos d'Europa, col famosu Mirador d'Ordiales.
Según averamos al Ríu Dobra, atopamos la Central Hidráulica de Restañu. Equí ta la tercer opción d'entamu de la ruta. En cuenta de dexar el coche nel Colláu d'Angón, podéis dexalo nel aparcamientu la central y aforravos la última xubida que vais tener a la vuelta.
Cruciamos la ponte sobro'l Ríu Dobra, cruciamos la portiella y empieza la xubida hasta la Ḥocica, travesando l'escobiu del Dobra nun camín daveres preciosu. Eso sí, con dalgún recuestu duru.
Tres una primer xubida per pista, empieza la parte más guapa la ruta, con un camín preciosu entre fayes, castañales y carbayos. Y siempres, el Cantu Cabroneru a lo fonderu.
El Ríu Dobra tamién va acompañanos la mayor parte del camín, ya inclusive podemos llegar a tocalu, col Cabroneru ufiertando esta preciosidá de paisaxe.
Un poco más palantre, atopamos una esviadura hasta la Mayada de Ceremal, qu'enllaza cola Sienda l'Arcedianu (recomendable, pero más dura qu'una Farturruta). Nós siguimos dirección a la Ḥocica (nel cartelu pon Carombo).
Quédanos un últimu recuestu duru hasta la Mayada de Bellanzu. Un sitiu daveres preciosu.
Queda l'últimu kilómetru hasta la presa. Una impresionante obra d'inxeniería construyida nos años 50 del sieglu pasáu, con un impactu ecolóxicu brutal qu'anguaño sería impensable siquier plantegase construyir.
La presa tien 400 pasos de baxada, qu'amuesen lo complicáu de la so construcción y lo impresionante del paisaxe. Nós baxamos un poco ... depués dimonos cuenta de lo qu'habría que xubir, pensámoslo meyor, y dimos la vuelta.
La ruta sigue, hasta la Mayada de Carombu, pasando por una zona increíble de monte qu'agora na Seronda de xuru que ta increíble. Inclusive vais poder llegar a Sotu de Sayambre. Pero claru, eso yá se nos pasa de kilometraxe pa farturruta.
Nós dimos la vuelta, y con casi tou baxada hasta l'últimu recuestu que nos lleva de vuelta al coche, que lo tenemos nel Colláu d'Angón. En total la ruta son unos 11kms y tardamos 4h en dir y volver.
Pa comer, la meyor opción que tenéis nel conceyu d'Amieva ye'l Restorán Camín de los Beyos. Ta asitiáu en Campurriondi, na carretera de vuelta a Cangues d'Onís, pola que tenéis que pasar de vuelta sí o sí.
Asitiáu na mesma carretera xeneral, tien una zona d'aparcamientu xustu al lláu. Una terraza onde tas perbien al solín. Dientro, local nuevu, con muncho gustu, zona de barra y dos comedores, ún más grande y otru con namás dos meses, más íntimu.
Al frente, Mila y Cuadonga. Madre y fía. Madre en cocina y fía na sala. Cocina tradicional, casera, con productos de casa, y ganadería propia.
Preparáronnos un menú colos clásicos de la so casa, imposible de probar tou coles raciones que ponen de davezu, asina que sacáronnos raciones más pequenes pa poder probalo tou.
Empezamos con Chorizu, de casa. Buenísimo.
Buñuelos de Compangu Líquidu. El compangu caseru d'ellos, con una mueyu de pimientos nel mangu la cuyar. Cruxente per fora y sabor maraviyoso a compangu. Bien bonu.
Cebolla Rellena de Boronchu. El Boronchu ye una especie de morciella ellaborada con sangre de gochu, calabaza, cebolla y farina de maíz, y ye la primer vegada que lo atopamos dientro d'una cebolla, que de normal son de bonitu o de pitu caleya. Lleva percima un cruxente de cenahoria. Espectacular. Encantónos. El boronchu da un toque picante como la morciella, pero menos intensu.
Siguimos con Callos. Con pataques frites de verdá. Ricos y bien finos. Fálta-yos picante. Pero puedes añedilo aparte.
Mediu cachopu de Cecina y Quesu de Los Beyos 3 Lleches. Xata de casa. Xugosu, bien ricu.
Cabritu con Patatinos. De los meyores que probemos nunca. Espectacular. El mueyu ye maraviyosu.
De postre, a puntu d'españar, Arroz con Lleche. Buenísimo. De los que tas hores removiendo y removiendo. Requemáu. Xenial.
Y Mousse de Quesu Los Beyos. Maraviyosu. Y con quesu la zona.
Y pa beber, Sidra el Cabañón.
Nun pagué. Dexónos la cuenta paga Carlos de Los Llaureles, que son bonos amigos de les dueñes. Pero yá vos digo que los precios son populares que tuvi viendo la carta. Son famoses amás les sos Xornaes de la Matanza.
Amieva ye un paraísu por afayar, y el so complementu perfectu ye'l Camín de los Beyos. Como veis una Farturruta preciosa parando a comer nun descubrimientu maraviyosu al que nun vamos tardar en volver.
No hay comentarios
Publicar un comentario