Nueva Visita: Aramar

Direición: Playa Aramar, entrada por carretera de Antromero, AS-239. Gozón
Teléfonu: 634524651



Recomendaciones: Va prestavos too


Calidá: 4/5
Preciu: 23€


Facebook: https://www.facebook.com/pages/Aramar-Playa/
Instagram: [@aramarplaya] http://instagram.com/aramarplaya
Anterior Entrada: http://www.lesfartures.com/2016/08/nueva-visita-aramar.html


Comentarios: Aramar ye la cita obligada de cada branu asturianu. Amás de les novedaes qu'ufierten na carta, polos cambeos y meyores que van faciendo nel chiringu. Ye una pasada comprobar la evolución del llocal y de Marcos y David dende la so apertura nel branu de 2015, y como, a pesar del ésitu y tar prácticamente siempres llenos, esfuercien por ameyoralo y faelo inda más guapu y cómodu.


Anguaño, la principal novedá ye l'arreglu de la ponte que crucia'l ríu y enllaza cola carretera de Lluanco. Muncha xente quexaba del accesu, por cuenta la rimada y estrechez (colos problemes que suponíen cuando se cruciaben dos coches), pero agora hai dos accesos. Lo que facilita tou muncho más.


Amás, una nueva zona de terraza, xunto cola preciosa barca que tienen. Una zona perfecta para sentase y tomar daqué, y dexar un pocu más "llibre" les meses para comer. Asina, estrémense les dos zones.  Un aciertu.


Averamos a cenar 6 persones a probar la nueva carta de Marcos. La sensación que remanez n'Aramar ye que comes meyor qu'en munchos restoranes, y amás con una cocina pequena, con una sola persona y siendo un chiringu. La redolada ayuda, ta claro, pero la cocina ye una pasada.


Nueves cartes, que confunden con postales (señores veceros, nun fai falta que les llevéis pa casa :)). Según nos sentamos, la so clásica Fogaza de Pan  de Lluanco con Tomate n'Aceite y Sal de Naranxa. El pan ye increíble,y los tomates de la güerta d'a'l lao del chiriguito. Asina da gustu entamar, la verdá. Ta tan bonu, qu'has de contenete pa nun acabalo n'ese mesmu momentu.


Empezamos cola clásica Tosta de Bonitu con Pistu. Cruxente'l pan y con bonitu y pistu p'apurrir xugosidá. Estremáu yá en 6 partes para nun tener qu'armar estropicios. Per bona.


La idea yera probar los nuevos platos d'anguaño de la carta, asina que pidimos los Espaguetis de Mar con Calamares. Amestu ventureru (y muncho más para un chiringu) de Marcos que nos encantó. Calamares na so tinta con algues. Ye ciertu que ye una alga "aseiquible" y que los calamares tienen l'abonda potencia como para compensar so sabor. Encamiéntovos enforma que les probéis porque tán increíbles. Los calamares frescos y nel so puntu.


Fora de carta, y como sorpresa, una Ventresca de Bonitu de mediu quilu. Menudu espectáculu. Indescribible. Vien acompañada d'un mueyu de romescu y de pataques frites. Sería una ración pa dos, pero la compartimos ente toos.


 Perfeuta.


Otra de les sorpreses d'anguaño (y que ta funcionando perbién) ye'l Pitu Caleya con Cebada. La idea ye asemeyar un arroz dándo-y un toque más orixinal cola cebada, y ta bien consiguíu. Platu orixinal, con unos tacos de pitu caleya de tán de muerte. Pitos traíos directamente del nuevu mataderu d'El Vallín (Morcín), con certificáu que podéis pidir. Equí nun hai trampa. Y nótase cuando los comes.


P'acabar, non puedes dir ensin probar la Tarta de Quesu con Xeláu d'Heliu. Tarru enorme con una nidia mousse de quesu, mermelada de fresa y en mediu, una bola de xeláu de vanilla d'Heliu. Ún de los nuesos postres favoritos de siempre que yá paga la pena solo la visita. Espectacular.


Amás, probemos la novedá d'anguaño, Super Conguito. Postre de chocolate contundente, con un cruxente per fora y per dientro un amiestu de chocolate y cacagüés que va faer morrer a los chicolateros del llugar. Bien ricu.


Pa beber, dalguna copa de vinu, agua y Sidra Viuda de Angelón. O la eches tu o te dan un tapón d'esos. Pero llevantate, dir al práu y echar un culete con esa vista nocherniega ye impagable.


Esta vegada nun hubo cócteles. Con unos cafés pagamos en total 130€.


Un sitiu máxicu, una atención de primera, una comida que nada envidia a cualquier restorán asturianu de los bonos y precios algamadizos. Siguimos namoraos d'Aramar.

Siguen aceptando TicketsRestaurant. Y suel tar llenu, asina que si quies dir comer ... Reserva!

0 comentarios :

Publicar un comentario