La Finca

Direición: C/ Gascona, 4 - Oviedo / Uviéu
Teléfonu: 985 218 234

Web: https://sidrerialafinca.es/

Facebook: https://www.facebook.com/lafincasidreria
Twitter: [@lafinca_agrobar] https://twitter.com/lafinca_agrobar
Instagram: [@la-finca-sidreriaagrobar] https://www.instagram.com/la-finca-sidreriaagrobar/

Calidá: 3/5
Preciu: 24€

Comentarios: Cola cai Gascona siempres tenemos sentimientos alcontraos, por  un llau trabaya perbién el marketing, cúriase la imaxe la sidra, suelen echala; pero por otru llau ye una cai bien masificada y onde cuesta atopar un sitiu onde comer bien (sobremanera agora que cerró'l 180º).

Va unos años abrió metanes la Cai, La Finca. Sidrería Agrobar (benditos Berrones) que va un pasu más allá. La decoración ta bien cuidada, con una combinación ente ambiente de chigre total y dalgún toque modernu. Tien dos zones estremaes. La zona de barra, nel pisu de baxo, pa tar de pie y tomar unos culetes de sidra o picar dalguna tapa rápida. Y la zona de riba con meses pa sentase a comer.

El trasiegu de xente ye enorme, escaezte de cenes nun ambiente sele, pero sorprenden dos coses: si cenes con sidra, échenla, en tou momentu, y a bon ritmu. Siempres tán bien sollertes y curienla enforma. Y segunda cosa, a pesar de tar llenu, y velos bien aforfugáos, la comida nun amenorga en calidá. Y ta bien bona.

Yá fuimos delles vegaes, dende un día ente selmana, en teoría, "más sele", hasta fines de selmana onde aquello ta a españar. Y siempres comimos bien.

La carta tien coses pa picar, con platos al centru, pa comer de forma informal. Pero siempres tienen un puntu creativu que fai interesante al llocal. Productu asturianu, con póster indicando'l orixe siempres de los mesmos, y amplia tabla de quesos del país.

Cena de compañeros d'empresa, 15 persones.

Empezamos con unos Carambelos de quesu la Peral. Cruxente con fuerte sabor a la Peral. Pa tomar n'unos bocaos, la verdá ye que la combinación ye xenial. Toque cruxente pero nada grasudu. Mui ricos.

Salpicón de Centollu y Fritos del Mar, perfeutu dempués de la Peral pa enfrescar la boca. Bona ración n'un bol, pa meter la cuyar de riba a embaxo.

Fungos Confitaos con Güevu Escalfáu y Pataca Trufada. Mítica "sartén del probe", pero cuatro pasos más allá. Buenísima. El toque de cogordes va xenial.

Pizza de Gochu Asturcelta. Una de les estrelles de la casa. Cruxente con un rellenu contundente. Pa partir en porciones y esfrutar. La base xenial, la carne bien bono ... foi de los favoritos de la nueche. Tanto ... que repetimos.

Costielles de Gochu Asaes. Yá la cosa entamaba ponese seria. Bones costielles, con un mueyu barbacoa percima p'adulzales (yo si la costiella ye bona, cásique prefiórola ensin nada). Bien riques, y desfáense soles. Volaron. Tamién repitimos.

Cachopu La Finca, con Afuega'l Pitu y guarnición de la Casa. Con mueyu y una base de pimientos percima. Equí tenemos l'alderique de siempre, hai cachoperos que lo prefieren ensin mueyu, otros que nos da igual namás que tea ricu. Nun ye'l meyor cachopu que probé na mio vida, pero ta ricu.

Tábamos a españar. Repetimos de Pizza, Costielles y Cachopu.

Pero pidimos postres pa compartir,

Pastel de Chocolate al Momentu. Un coulant ricu.

Copa Dalky de Fresa. El mio favoritu ensin dulda. Maraviyosa testura con un sabor a fresa. Nun lo podéis perder.

Tiramisú con Xeláu. Bien ricu.

Xeláu de Tarta la Güela.

Para beber, un pocu de too. Pero la mayoría tomamos Prau Monga. La Sidra DOP de Viuda de Angelón. Sidra qu'en tou momentu échente, perfeuta de temperatura y ... yá sabéis que ye una de les mios favorites.

Pagamos 24€ per cabeza. N'absolutu caru para tolo que comimos. Un sitiu que va un pasu más allá, onde se come ricu, cúriase la sidra mientres tán en plena cai Gascona.
En curtiu van ufiertanos dalguna sorpresa que vos cuntaremos.

(La semeya de portada y del interior son de la Web de La Finca)