Web: http://www.sidramanzanaseleccionada.com/
Twitter: [@sidra_seleccion] https://twitter.com/sidra_seleccion
Instagram: [@sidraseleccion] http://www.instagram.com/sidraseleccion
Comentarios: La marca Sidra d'Escoyeta, enantes conocida como Sidra de Selección, marca de calidá con sidra 100% asturiana formada polos Llagares Trabanco, Muñiz, Foncueva y Peñón, entama la primera de los cuatro pruebes añales de sidra para decidir qué sidra van poder sacar al mercáu so esta marca.
Para ello, reunen nun llocal, n'este caso Mesón El Forno, en La Pola Sieru, a un xuráu de profesionales que prebena ciegaes 21 llotes, evaluando caún d'ellos. La corte pa que pueda salir al mercáu como Sidra d'Escoyeta ye un 7 sobro 12.
El xuráu ye variable, siempres presidíu por Maximino Villarica, nesta ocasión formáu por 5 persones. Y paralelamente a la mesa profesional de xuráu, Sidra d'Escoyeta entamó una mesa especial pa medios pa evaluar nes mesmes condiciones los 21 llotes de sidra.
Pa ello, tuvimos una mini formación sobro los distintos aspeutos a evaluar na sidra. Y pa ello cuntamos con Jose Manuel Riestra, Xerente de Sidra Muníz y Presidente de Sidra d'Escoyeta, que nos punxo en contestu sobro la primer sidra del añu.
La sidra como sabéis s'ellaborr ente los meses d'Ochobre y Payares (inclusive dalgún llagar acaba de mayar n'Avientu, según lo tardía que sía la collecha mazana). Ye por ello que la sidra nun ta nes sos condiciones hasta los meses de Xunu, y xeneralmente, la meyor sidra del añu suelse dar a partir de los meses de Setiembre (anque tou esto depende de munchos factores).
Pa qu'haya sidra tou l'añu, y que se caltenga una estabilidá nel sabor, los llagares suelen entemecer sidra de la collecha anterior cola nueva, pa que ésta evolucione más rápidu y pueda sacase al mercáu n'Abril-Mayu, adelantrando 1 o 2 meses el procesu natural de la sidra.
Sicasí, Sidra d'Escoyeta quier estremase d'esti tipu de práctiques, y nun entemez la sidra nuevo cola de la collecha anterior. Polo que n'Abril, tola so sidra ta inda tienra, entá-y falta pa llegar a les sos condiciones de prestíu. Les razones pa ello ye reivindicar que la sidra evoluciona ya intentar ameyorar la cultura sidrera del públicu xeneral.
Como la sidra ta tienra, inclusive dalguna en plenu procesu de fermentadura, esta preba de sidra ye más difícil de les 4 que s'entamen yá que más que valorar la sidra en sí, ha de valorase lo que sidra va dar de sí. Y sobremanera, l'ausencia de defectos na sidra.
La preba estrema 3 grandes fases. El Comportamientu en Vasu, col Color, l'Espalme, Aguante y Pegue. L'Arume, que sía Francu, Llimpiu, Afrutáu y la so Intensidá; yá'l so Sabor, que sía Llimpiu, la so Intensidá, la so Persistencia, el so Equilibriu y el so Retrogustu. En función d'esos parámetros, puntuase de 1 a 12 cada palu de sidra.
La preba de sidra ta supervisada por Campoastur, con Jorge García, qu'exerz de notariu, curia la sidra hasta la preba y arrexunta les notes de corte final.
Pudimos probar nós mesmos, cola supervisión de Maximimo y Sabino Pérez, maestru escanciador. los palos de sidra, oldear les nueses notes coles del xuráu profesional, resolver les duldes naquellos llotes que nun coincidíamos, o escucar nes sensaciones que nos producíen los que sí. Una formación basada na práctica, bien enriquecedora y con tol mundu bien sollerte a resolver les nueses duldes.
A la fin, llogró la puntuación mínima un 80% de la sidra, nós nun fuimos tan arrogantes.
No hay comentarios
Publicar un comentario