Sidra Denominación d'Orixe Protexida (DOP) d'Asturies: Llagar Gobernador

Direición: El Gobernador S/N - Villaviciosa

Teléfonu: 985 891 655

Web: http://www.sidraelgobernador.com/
Facebook: https://www.facebook.com/EmilioMartinezBrutNature/
Twitter: [@embrutnature] https://twitter.com/embrutnature
Instagram: [@embrutnature] https://www.instagram.com/embrutnature/

Entamamos la visita nel Llagar Gobernador, qu'ufierta 3 sidres distintes: Sidra Gobernador (Sidra Natural), Sidra de Mesa Españar (DOP) y Sidra Esplumoso Emilio Martínez EM (DOP).

Ye una maravía visitar llagares nesta dómina, en plenu procesu de recoyida la mazana y d'ellaboración de la sidra. Ver el llagar a plenu funcionamientu, con xornaes derrangaes onde la precisión y la rapidez son indispensables pa que la sidra llegue en perfeutes condiciones a los toneles y entame'l procesu de fermentadura y asina dientro de 5 o 6 meses tea perfeuta pal so consumu.

Llagar fundáu en 1993, propiedá de los Hermanos Sopeña, con Francisco d'anfitrión que nos esplicó tol procesu d'ellaboración de la sidra, dende la recepción de la mazana nel llagar, pasando pol procesu de llimpieza, seleición manual y posterior prensáu. Amás, cuntamos en tou momentu cola presencia de Tino Cortina, Presidente del Conseyu Regulador de la Sidra y de Daniel Ruiz, Xerente del Conseyu Regulador de la Sidra, que fueron contestando toles nueses duldes demientres la visita.

Pudimos visitar unes instalaciones impresionantes, con distintes estayes tantu pa la ellaboración de la sidra, como los depósitos pa que repose hasta que pueda consumise. Tuvimos ocasión de probar la última sidra la collecha 2015, espichada dende los depósitos direutamente, cola que s'ellaboren toles sidres del llagar.

Ye un exemplu del procesu sele que na última década camudó los antiguos llagares de madera, muncho más llentos y delicaos d'avinagrar la sidra; poles nueves prenses d'aceru inoxidable, con programes d'autollaváu, muncho más rápides y llimpies.

Empezamos pola so Sidra Natural El Gobernador, sidra natural fora de la DOP. Yá ye la última sidra l'añu y parte d'ella va usase pa trasegar cola nueva sidra que s'ellabore agora.

Yá dientro la DOP, ellabórase la so Sidra de Mesa Españar (v. Arreventar, romper o arregallar [de golpe, pola presión]. 2 Tener munches ganes de [facer daqué]. Taba españando por contá-ylo. 3 Espresar [de sópitu una pena, un sentimientu]. Yá nun pudo más y españó. 4 Esconxurar. 5 Aspavientar, facer esparavanes. || Españar de risa, fam. rir [muncho]). Una sidra de mesa ye una sidra natural, pero penerada. Lo que fai que sía un productu paecíu al vinu blanco que nun ye necesariu d'echar, con gran potencial pa restoranes que nun quieren/pueden echar la sidra natural. Güel y sabe a sidra, anque evidentemente fálta-y la esplosividá que tien una sidra natural dempués de romper nel vasu. Ye un productu mui interesante qu'adulces va introduciendose nos restoranes y que va perfeuta con arroces, quesos y pexes.

Y llegamos al so productu estrella, EM (Emilio Martínez), la so sidra esplumoso con segunda fermentadura na botella por aciu el métodu champenoise. Ye una sidra dientro la DOP (la única d'esti tipu xuntu con Prau Monga del Llagar Viuda de Angelón). Francisco enseñónos el so procesu d'ellaboración de la segunda fermentadura na botella, y pudimos ver cómo les botelles pasen 11 meses en crianza en posición de rima (horizontal). Una vegada realizada la segunda fermentadura, el lleldu muertu -la madre- tien de depositase nel pescuezu la botella; pa ello utiliza una máquina que remueve amodo les botelles "boca abaxo" hasta que la madre termina nel pescuezu la botella.

Pa esniciar la madre, realízase la técnica del Degüelle, que consiste en conxelar el pescuezu la botella a -18º pa intentar perder el menos líquidu posible. Darréu rellénase n'otra botella, se corcha y la sidra va tar llista pal so consumu.

Como veis, un procesu llargu, cuidadosu y artesanal, dignu de les meyores bebíes del mundu, que se lleva años realizando nos nuesos llagares. EM Brut Nature foi escoyida Meyor Sidra Esplumoso 2015 y 2016.

Fiximos una cata de la Sidra Españar y d'EM, tantu en botella "normal" como "magnum". Y la botella magnum (1,5l) ganó en sabor por goliada gracies a la mayor capacidá de la botella que favorez esa fermentadura y que, amás, tien 14 meses de crianza en cuenta de los 11 de la botella normal.

La producción añal averada d'Españar ye de 5000 botelles y d'EM d'unes 50000. Y aumentando. De vós depende.