Sidra Denominación d'Orixe Protexida (DOP) d'Asturies: Pumarada El Llendón

Dexamos el Llagar El Gobernador p'averanos a una finca per cerca de Playa España, El Llendón (Villaverde - Villaviciosa). Rexentada polos hermanos Igor y Aitor Ferreras, fíos de Cesario Ferreras, mercaron fai 15 años un ocalital  de más de 2 hectárees, pa tresformalo nuna pumarada adscrita a la DOP.

Tresformar un ocalital nuna pumarada nun ye nada fácil, yá que, como nos cuntaron Igor y Aitor, hai qu'esaniciar perbién toles raices yá que l'ocalitu tiende a "fadiar tolo que plante". Amás, pa qu'un pumar tea a plenu rendimientu precísense a lo menos 15 años (de media, yá depende enforma la variedá de mazana plantada).

Cuntáronnos cómo la DOP audita les variedaes de pumares que se llanten, y que namás  llanten variedaes de mazana almitíes pola DOP, inclusive yá tán faciendo prebes con una nueva variedá que se va almitir ceo nel Conseyu Regulador. Anguaño tienen llantaes De La Riega, Raxao, Fuentes, Blanquina y Durona de Tresali.

Esti ye añu de vecería pa la mayoría les pumaraes asturianes; pero ellos por casualidá, llantaron a añu camudáu, polo qu'esperen llograr unes 18 tonelaes de mazana DOP. Pertenecen a la cooperativa CampoAstur, que viende la so mazana a llagares soscritos a la DOP, asina que nun saben 100% seguro a qué sidra dirá parar la so producción.

El 99% les pumaraes asturianes se pañen a mano, otru de los raigaños identitarios de la sidra asturiano qu'apenes se conoz (nin se cobra). Por razones de rentabilidá y, sobremanera, d'orografía, apenes esisten máquines qu'ayuden a recoyer la mazana n'Asturies, apenes 3 o 4; sicasí en territorios de Bretaña o Ingleses (por casu) esisten llatifundios enormes onde se recueye la mazana con una máquina ensin apenes esfuerzu, lo qu'abarata la mazana (que dempués nos vienden equí. Yá veis que ye un círculu viciosu).

Sicasí, Aitor ya Igor, faciendo un gran esfuerzu pa modernizar les sos instalaciones, invertieron nuna máquina pa pañar la mazana que facilita enforma'l so llabor. Tamién ye ciertu que la orografía de el so finca ye perbona pa ello.

Fixéronnos una fuerte reivindicación de la mazana asturiana. Por clima y orografía, tenemos unes variedaes úniques, que consiguen la meyor sidra del mundu; y esti plus de sabor qu'algama la mazana asturiana namás llógrase consumiendo sidra fecho con mazana asturiana.

Mocedá que recueye'l llegáu de sos pas, lo amplia, modernizalu y aspira a faelo'l so mediu de vida. Tou esto solo por 50cts más la botella. Yo tengo claro qué sidra pidir la próxima vegada, ¿tu?