Sidra Denominación d'Orixe Protexida (DOP) d'Asturies

Direición: El Gobernador S/N - Villaviciosa

Teléfonu: 985 891 655

Web: http://www.sidradeasturias.es/

Facebook: https://www.facebook.com/sidradeasturiasdop
Twitter: [@sidradasturias] https://twitter.com/sidradasturias
Instagram: [@embrutnature] https://www.instagram.com/embrutnature/

Nun vamos afayar nada nuevo: n'Asturies bebemos sidra natural, muncha sidra natural; lo que quiciabes nun tenemos tan claro ye qué tipu de sidra natural tamos bebiendo.

Comercialícense 3 tipos distintos de Sidra: Sidra Natural, Sidra DOP Asturies y Sidra de Mazana d'Escoyeta.

• Sidra Natural ye aquella sidra fecha n'Asturies con mazana asturiana (o non). Ye la sidra "normal" que pidimos nuna sidrería, cola so etiqueta, el so llagar de procedencia, pero de la que desconocemos por completu'l so orixe, esto ye, la procedencia les sos mazanes. Ye sabío que munchos llagares asturianos merquen la mazana fora d'Asturies, por preciu, pola vecería los pumares asturianos (anguaño toca escasez de mazana asturiana, polo que si se quier caltener la producción del añu pasáu, va haber que mercar mazana fuera) ... o que direutamente traen el mostiu fechu de mazana de fora (si traen mazana de Normandia, nesos dos díes de viaxe nel camión, la mazana cuerre riesgu d'avinagrar, polo que se suel traer un camión cisterna esfrecíu col zusmiu de la sidra).
• Sidra de Mazana d'Escoyeta, ye una marca privada que crearon 4 llagares asturianos, Trabanco, Muñíz, Peñón y Foncueva. Yá vos falamos d'ellos en dalguna ocasión. Ye una marca independiente de la DOP y que garantiza l'orixe 100% asturianu de les sos mazanes.
• Sidra Denominación d'Orixe Protexida (DOP) d'Asturies, Marca pública, pero con calter independiente del Principáu, a la que tán soscritos 22 llagares, 272 productores y 522 hectárees. Una DOP ye una marca de calidá qu'estrema l'orixe concretu d'un productu, garantiza una trazabilidá d'entamu a fin, calidá y amás controla posibles engaños o incursiones per parte los non soscritos a ella. Y eso ye importante remarcalo: el Conseyu Regulador de la Sidra, amás de garantizar que les mazanes d'esa sidra son asturianes, garantiza la calidá del productu, yá que pasa unos controles de cata pola que nun pasa la Sidra Natural "normal". 

Un llagar suel tener sidra natural, sidra DOP o Sidra de Mazana d'Escoyeta. Por casu, Viuda de Angelón (Natural) y Práu Monga (DOP) correspondientes al llagar Viuda de Angelón; o Sidra Castañón (Natural) y Val de Boides (DOP)  correspondientes al llagar Castañón. Inclusive un llagar puede tener sidra natural (Trabanco), sidra de mazana escoyida (Trabanco Etiqueta Negra) y sidra DOP (Poma Áurea).

Esti baruyu ye'l que tenemos anguaño n'Asturies. Un baruyu nel que se pierde l'hosteleru, y, sobremanera, el consumidor, que desconoz quien ta detrás de cada marca. Por eso tán realizando campañes de sensibilización per parte de Mazana d'Escoyeta y la DOP pa que conozamos el so trabayu y, sobremanera, concienciar nel consumu de les sos marques esplicando perbién la causa de que les sos botelles cuesten un pocu más (unos 50cts) que la sidra natural.

Sicasí lo ideal sería que namás tuviéramos dos marques, sidra natural y l'unión de Mazana Escoyida y la DOP; pa consiguir, nun futuru lo más cercano posible, una sola marca. Una Asturies onde sía rentable vivir de la mazana y de la sidra, onde consumamos sidra asturiano 100% y onde volvamos sustituyir los ocalitos polos pumares. Una industria potente (como la d'otros países europeos) onde se pague un valor xustu pola mazana (y por tanto, sía rentable llantala), pola botella de sidra (ye insultante pagar lo mesmo por una botella de sidra que por un botellín de 33cl de cerveza industrial) y pol qu'echa la sidra.
Pero yá sabéis que nun seríamos asturianos si nos lleváramos bien, si tuviéramos xuníos y si valoráramos lo nueso. Asina que ye lo qu'hai, campaña informativa y que dempués caún decida qué consumir.

Por eso motivu, el Conseyu Regulador de la Sidra d'Asturies, axuntó a periodistes y medios gastronómicos pa dar a conocer la marca DOP Sidra d'Asturies. La llegada de la nueva direutiva, moza, con nueves idees y apostando pol sector, ta consiguiendo resultaos más que satisfactorios en pocu tiempu. Una medría de más d'1 millón de llitros de la campaña 2014 a 2015, y d'un 8%  en contraetiquetes no que va de campaña nel 2016.

La DOP Sidra d'Asturies almite 22 variedaes de mazana autóctona distintes pa poder realizar sidra asturiano. 22 que van ser 25 en curtiu y que quieren que siga creciendo (cuantes más variedaes, más llibertá va tener el llagareru pa estremar la so sidra). Pa certificar estes variedaes, toles finques soscrites tán auditaes, y contrólase el procesu de recoyida de cada llagar hasta'l so posterior precintáu nos toneles pa estremar el tonel con sidra DOP del de sidra natural.

Pa estremar qué botella pertenez a la DOP Sidra d'Asturies, namás tienes que comprobar que tenga esta contra etiqueta.

Favorecer que vivir del campu sía posible, con una industria sostenible, natural y ecolóxica (recordemos que toles botelles de sidra asturiano recíclense, daqué esceicional nel sector), con un productu 100% asturianu, únicu nel mundu pola so manera de tomalo y la calidá del mesmu. Tou esto namás por 50cts más la botella. Yo tengo claro qué sidra pidir la próxima vegada, ¿tu?